• Created: 20.01.2022
• Updated: 20.01.2022
• Read: 2957

Journalists got acquainted with the work on localization

20-yanvar kuni press-turdan so‘ng tadbir ishtirokchilari uchun NMZ majlislar zalida matbuot anjumani tashkil etildi.    

Matbuot anjumanida “NKMK” AJ bosh direktorining xodimlar va maʼmuriy masalalar bo‘yicha o‘rinbosari, boshqaruv aʼzosi Q.Taparov, “NKMK” AJ “Navoiy mashinasozlik zavodi” ishlab chiqarish birlashmasi direktori J.Hayitov, “NKMK” AJ Jamoatchilik bilan aloqalar bo‘yicha direktori X.Raupov, “NKMK” AJ Mahalliylashtirish, ehtiyojlarni rejalashtirish va zaxiralarni boshqarish boshqarmasi bo‘lim boshlig‘i o‘rinbosari S.Alimov, ommaviy OAV vakillari va jurnalistlar ishtirok etishdi.

Tadbirda taʼkidlanganidek, mamlakatimizda mahalliylashtirilgan mahsulotlarni ishlab chiqarish, tarmoqlararo sanoat kooperatsiya aloqalarini yana-da kengaytirish iqtisodiyotning muhim yo‘nalishlaridan biri hisoblanadi. Bu masalaga davlatimiz Hukumati tomonidan alohida eʼtibor qaratilib, muhim qarorlar, dasturlar, yo‘l xaritalari qabul qilinmoqda.

Kombinatda 2017-2019-yillarda mahalliylashtirish dasturi doirasida 83 ta loyiha bo‘yicha umumiy qiymati 393,9 mlrd so‘mlik mahalliylashtirilgan mahsulotlar ishlab chiqarilgan bo‘lsa, birgina 2021-yilning o‘zida korxonada 154 ta loyiha bo‘yicha 442,2 mlrd so‘mlik mahsulot ishlab chiqarilgan.

“NKMK” AJ o‘zining ilg‘or tajribasi – tadbirkorlik subyektlarini qo‘llab-quvvatlashni nazarda tutuvchi “shatakka olish” mexanizmini muvaffaqiyatli amalga oshirmoqda. Bu, bugun kombinat va mahalliy ishlab chiqaruvchilar uchun o‘zining yaxshi samarasini berayapti. “Gidro Stanko Servis”, “Navpromlitmash”, “Chilon Lubricants”, “Uchquduq Prom Zona”, “SK Sanoat Kompaniyasi”, “Texno Rezina”, “Karmana-Sharqona Invest” masʼuliyat cheklangan jamiyatlari va boshqa korxonalar bilan yo‘lga qo‘yilgan mustahkam hamkorlik aloqalari kombinat uchun ham, ushbu ishlab chiqaruvchilar uchun keng imkoniyatlarni yaratib berilayotganligi taʼkidlab o‘tildi.

Tarmoqlararo sanoat kooperatsiyasi va elektron kooperatsiya portali orqali mahalliy ishlab chiqaruvchilardan 2021-yilda jami 4,3 trln so‘mlik, jumladan, elektron kooperatsiya portali orqali tuzilgan 2 392 ta shartnoma asosida umumiy qiymati 2,1 trln so‘mlik mahsulot xarid qilinib, o‘sish surʼati 2020 yilga nisbatan  116,2 foizni tashkil etdi. Shuningdek, 2021-yilda o‘tkazilgan respublika va hududiy sanoat yarmarkalari doirasida mahalliy ishlab chiqaruvchilar bilan 86 ta hamkorlik memorandumlari hamda mahsulot xarid qilish bo‘yicha 2,1 trln so‘mlik shartnomalar tuzildi.

Kombinatda import mahsulotlarni qisqartirishning maqsadli ko‘rsatkichlari bo‘yicha ham keng ko‘lamli ishlar olib borilmoqda. Xususan, uning 2021-yildagi ko‘rsatkichi 84,3 mln dollarni tashkil etdi. Korxonada kooperatsiya aloqlarini kengaytirish hisobiga 2021-yilda 23,5 mln dollar bo‘lgan 56 turdagi import o‘rnini bosuvchi mahsulotlar xarid qilindi.

Ilgarilari ishlab chiqarish korxonalari uchun kerakli dastgohlar, ehtiyot qismlari katta valyuta hisobiga chetdan olib kelinar edi. Bugunga kelib kombinat mutaxassislarining salohiyati evaziga eng murakkab bo‘lgan ehtiyot qismlaridan oddiylargacha Markaziy Osiyodagi eng yirik mashinasozlik korxonalaridan biri bo‘lgan Navoiy mashinasozlik zavodida hamda korxona bo‘linmalaridagi sexlarda ishlab chiqarilmoqda. Bu muvaffaqiyatlarning omili ishning to‘g‘ri tashkil etilgani, buning uchun barcha shart-sharoitlar yaratilgani, o‘zining innovatsion loyihalari bilan yangilik kiritayotgan mutaxassislar mehnati o‘z rag‘batini topayotgani amalda isbotlayotganidandir.

Matbuot anjumanida OAV vakillari va jurnalistlar savollariga atroflicha javoblar berildi.  

“NKMK” AJ matbuot xizmati.