Система Orphus

Shriftning o'lchamini

Qarama-qarshilik

        
Siz bu yerdasiz: Bosh sahifa Kombinat to'g'risida Ommaviy tadbirlar «Bolalarga bering dunyoni»

«Bolalarga bering dunyoni»

Atrof turli rang-barang gullar-u, sharlar bilan bezatilgan. Karnay-surnay sadolari uzoq-uzoqlarga taralmoqda. Barchaning yuzida samimiy tabassum. Ayniqsa, jajji o‘g‘il-qizchalarning ko‘zlari quvonchdan porlab turibdi. Bu – Zarafshon akva bog‘ining tantanali ochilish manzarasi.

Olam olam bo‘lib, makon makon bo‘lib yaralibdiki, inson umrining ko‘rki, mazmuni farzand. Zero, har qanday millatning ravnaqi, taqdiri va kelajagi tafakkuri erkin, irodasi mustahkam, dunyoqarashi teran o‘g‘il-qizlar qo‘lida. SHu bois mamlakatimizda bolalarga ko‘rsatilayotgan g‘amxo‘rlik cheksiz. 1 iyun kuni Zarafshon shahrida foydalanishga topshirilgan akva bog‘ ham kelajagimiz egalariga ko‘rsa¬tilayotgan e’tiborning namunasi bo‘ldi. Xalqaro bolalarni himoya qilish kuni asriy Qizilqum bag‘rida shunday zamonaviy akva bog‘ning ishga tushirilishi oltintoparlar shahri aholisi, ayniqsa, ularning farzandlari uchun, shubhasiz, qo‘shaloq shodiyonaga aylandi.

1,3 gektar maydonni egallagan, qurilishiga 3 milliard so‘mdan ortiq mablag‘ sarflangan akva bog‘ 8 oyda zamonaviy talablarga javob beradigan darajada qurib bitkazildi. Dam olish maskanining ochilish marosimi katta tantanaga aylandi. Unda Navoiy kon-metallurgiya kombinati bosh direktori Q.Sanaqulov bog‘ni bunyod etishda faollik ko‘rsatgan insonlarga minnatdorchilik bildirib, sovg‘alar topshirar ekan, bog‘ zarafshonliklar va shahar bolalarining yayrab dam oladigan maskaniga aylanishiga ishonch bildirdi. Yuzlab baxtiyor bolalarjonlarga bepul muzqaymoqlar ulashilgach, barcha boqqa taklif etildi. «Kamalak» deb nomlangan akva bog‘ bolalar va kattalar uchun uchta basseyn, suv tepalari, attraksionlar, huzur qilib, quvnoq hordiq uchun kerakli barcha shart-sharoitlarga ega. Butun atrof ko‘kalamzorlashtirilgan, turli anvoyi gullar, manzarali daraxtlar maskan ko‘rkiga-ko‘rk qo‘shib turibdi. Obodonlashtirilgan hududga 21 ming tup gul ko‘chati o‘tqazilgani bois, o‘zingizni go‘yo gulzor oralab yurgandek his qilasiz. Kichik yoshdagi bolalar suv havzasi va soyabonli o‘tirg‘ichlar atrofini sekin oquvchi kichik anhor o‘rab turibdi. SHu kuni anhorcha o‘nlab o‘g‘il-qizlarni o‘z bag‘riga oldi. Bundan tashqari bog‘da yaxna ichimliklar, muzqaymoq va shirinliklar bilan savdo qiladigan shaxobchalar, tibbiyot punkti mavjud. Bir so‘z bilan aytganda, «Kamalak» akva bog‘i – bu oilaviy hordiq uchun ajoyib imkon va maskandir.

Nodir: «Ilgarilari faqat oromgohlardagi basseynlardagina mazza qilib suzgan bo‘lsak, endi o‘rtoqlarimiz bilan uyimizning yonginasida, shunday chiroyli suv havzasida xohlaganimizcha suzamiz, yozgi ta’tilni quvnab o‘tkazamiz. Bundan xursand bo‘lib ketayapman. Men suzish bo‘yicha chempion bo‘lishdek orzuimga, albatta, erishaman».

Komil: «Bizning akva bog‘, hattoki, Navoiy shahridagidan ham zo‘r ekan. Bizga shunday bayram sovg‘asi qilgan insonlarga rahmat aytamiz».

Komil so‘zini tugatishi bilan uni o‘rab turgan o‘rtoqlari baravariga «ura» deyishib, o‘zlarini tanga orom bag‘ishlovchi salqin va tiniq suvga otishdi. Baxtiyor bolalar quvonchi qalbimizga ko‘chdi. Nevaralari bilan yangi dam olish maskanini aylanib yurgan Sharofat aya Mahmudova xursandchiliklarini biz bilan baham ko‘rdilar. «Qizim Zarafshonda yashaydi. Ota-onasi ishdaligi uchun ikkala nevaramni olib bu erga kelgandim. Farzandlarimizning shodliklarini ko‘rib, ulardan ham ko‘proq quvonayapman. Shunday olijanob ishlarning boshida turgan kombinat rahbariyatiga ota-onalar nomidan minnatdorchilik bildiraman».

Yurtimizda hukm surayotgan tinchlik, har sohada ro‘y berayotgan bunyodkorlik muhtaram Prezidentimiz tomonidan olib borilayotgan insonparvarlik siyosatining natijasidir. Osmoni musaffo, tinch zamindagina shunday ulkan yaratuvchanlik ishlari, g‘oyatda xayrli tadbirlar amalga oshiriladi. Akva bog‘ bunyodkorlari esa o‘z ishlaridan har qancha faxrlansalar arziydi. Chunki dunyoda odamlarga quvonch va shodlik bag‘ishlashdan ortiqroq insoniy baxt yo‘q!

Dilafro‘z BEKNAZAROVA.
Siroj ASLONOV
olgan suratlar.

Biz bilan bog'lanish

  • Umumiy bo‘limi (devonxona): 0(436) 227-71-64, +998 79 227-71-64
  • Ishonch telefoni: 0(436) 227-72-22, +998 79 227-72-22

    Mualliflik huquqi © NKMK, 2015. Barcha huquqlar himoyalangan.   

Axborotdan foydalanish shartlari

Siz bu yerdasiz: Bosh sahifa Kombinat to'g'risida Ommaviy tadbirlar «Bolalarga bering dunyoni»