• Yaratildi: 25.02.2020
• Yangilandi: 02.12.2020
• O'qildi: 882

Rahbar va yoshlar uchrashuvi: vazifalar belgilab olindi

Joriy yilning 25 fevral kuni Navoiy kon-metallurgiya kombinatida “Rahbar va yoshlar” uchrashuvi bo‘lib o‘tdi.

Videoselektor tarzida o‘tkazilgan ushbu uchrashuvda kombinat bo‘linma rahbarlarining o‘rinbosarlari, kasaba uyushma qo‘mitalari raislari, O‘zbekiston yoshlar ittifoqi boshlang‘ich tashkilotlari yetakchilari, ma’naviyat va ma’rifat bo‘yicha mas’ul xodimlar, kadrlar bo‘limlari boshliqlari, xotin-qizlar qo‘mitalari raislari hamda kombinatning ming nafardan ortiq yosh ishchi-xodimlari ishtirok etdi.

Uchrashuvda NKMK yoshlari yetakchilari Kengashi raisi S.Radjabovning 2020 yil yanvar-fevral oylarida kombinatda yoshlarga oid davlat siyosatini amalga oshirish natijadorligi to‘g‘risidagi hisoboti tinglandi.

Shuningdek, videomuloqot davomida O‘zbekiston Respublikasi Prezidenti Shavkat Mirziyoyevning 2019 yil 27 dekabr kuni mamlakat yoshlari bilan bo‘lib o‘tgan uchrashuvdagi topshiriqlari hamda kombinat bosh direktorining joriy yil 11 yanvar kuni korxona yoshlari bilan o‘tkazilgan uchrashuvda berilgan topshiriqlari ijrosi muhokama qilindi.

Uchrashuvda NKMK bosh direktori, senator Q.Sanaqulov bugungi kun talabidan kelib chiqib, kombinat bo‘linmalarida yoshlar bilan ishlashni tubdan yaxshilash, yosh oilalarda sog‘lom muhit bo‘lishi, yoshlar o‘rtasida oilaviy ajrimlar va jinoyatchilikning oldini olish bo‘yicha o‘z fikr-mulohazalarini bildirdi. Tadbirda yoshlarni innovatsion g‘oya va ishlanma, ratsionalizatorlik ishlari hamda to‘garaklarga keng jalb etish, har bir muhandis-texnik xodimning ijodiy rejasini tasdiqlash, so‘zdan amaliy ishga o‘tish kabi masalalar tahliliy va tanqidiy asosda ko‘rib chiqildi. Bosh direktorning yoshlar bilan ishlashga doir aniq takliflari asosida kombinat va bo‘linmalar yoshlar boshlang‘ich tashkilotlari oldida turgan kechiktirib bo‘lmaydigan vazifalar belgilab olindi. 

NKMK Matbuot markazi.