• Yaratildi: 17.11.2020
• Yangilandi: 02.12.2020
• O'qildi: 568

NKMK xotin-qizlar qo‘mitasi raisi saylandi

Joriy yilning fevral oyida “Farhod” madaniyat saroyining kichik majlislar zalida Navoiy kon-metallurgiya kombinati bo‘linmalari kasaba uyushma qo‘mitalari va xotin-qizlar boshlang‘ich tashkilotlari raislari ishtirokida o‘tkazilgan konferensiyada kombinat xotin-qizlar qo‘mitasi raisini saylash masalasi muhokama qilindi.

Unda NKMK kasaba uyushmalari Kengashi raisi I.Rahmatov bugungi kunda mamlakatimizda xotin-qizlarni qo‘llab-quvvatlash borasida olib borilayotgan ishlar to‘g‘risida gapirib, O‘zbekiston Respublikasi Prezidenti Shavkat Miromonovich Mirziyoyevning Parlamentga yo‘llagan Murojaatnomasida “Shu yil xotin-qizlarni qo‘llab-quvvatlashni yangi bosqichga ko‘taramiz, butun diqqatimizni xotin-qizlarimizga munosib barcha shart-sharoitlarni yaratib berishga qaratamiz”, degan so‘zlari kombinatda mehnat qilayotgan barcha xotin-qizlarni ham nihoyatda ruhlantirganligini ta’kidlab o‘tdi. Tadbirda “Navoiy kon-metallurgiya kombinati” davlat korxonasi xotin-qizlar qo‘mitasi raisligiga Jismoniy va yuridik shaxslarning murojaatlari bilan ishlashni nazorat qilish va muvofiqlashtirish bo‘limi – “NKMK Virtual qabulxonasi” yetakchi mutaxassisi Sabohat Nazarovaning nomzodi tavsiya etildi. Yig‘ilish ishtirokchilari ushbu nomzodni bir ovozdan qo‘llab-quvvatladilar.

Konferensiyada NKMK xotin-qizlar qo‘mitasining 9 nafardan iborat tarkibi tasdiqlandi. Navoiy viloyat mahalla va oilani qo‘llab-quvvatlash boshqarmasi boshlig‘ining birinchi o‘rinbosari N.Sodiqova so‘z olib, bugun Yurtboshimiz tomonidan xotin-qizlarga yaratilayotgan keng imkoniyatlar va bunga amaliy ishlar bilan javob berish borasida yangi tashkil etilgan boshqarma oldida turgan dolzarb vazifalarga alohida to‘xtaldi.

Navoiy kon-metallurgiya kombinati bosh direktorining umumiy masalalar bo‘yicha o‘rinbosari N.Raxmanov o‘z chiqishida yig‘ilish ishtirokchilari e’tiborini oilalarda ma’naviy-axloqiy qadriyatlarimizni mustahkamlash, erta nikoh va ajralishlarning oldini olish, xotin-qizlarning bandligini ta’minlash, ularning mehnat sharoitlarini yaxshilash, huquqlari va qonuniy manfaatlarini himoya qilish, muammolarini o‘z vaqtida aniqlab, yordamga muhtoj xotin-qizlarni moddiy jihatdan qo‘llab-quvvatlash lozimligi masalalariga qaratdi.