• Yaratildi: 16.03.2021
• Yangilandi: 16.03.2021
• O'qildi: 1553

Jaholatga qarshi maʼrifat bilan kurashamiz!

Bugungi axborot asrida, globallashuv jarayonida turli yot oqimlar, xususan diniy aqidaparastlarning zararlaridan saqlanish, uning oldini olish uchun chora-tadbirlar majmuini o‘z ichiga oladigan mafkuraviy profilaktik tadbirlarning o‘rni katta.

Kombinatning Geologiya-qidiruv ekspeditsiyasi ishchi-xodimlari bilan o‘tkazilgan “Jaholatga qarshi maʼrifat” mavzusidagi davra suhbatida xalqimizda, ayniqsa yoshlarda turli oqimlarga qarshi mafkuraviy immunitetni shakllantirish borasida so‘z yuritildi. Unda viloyat hokimi o‘rinbosari G‘.Musurmonov, O‘zbekiston Musulmonlar idorasi viloyat vakili, bosh imom xatib T.Ro‘ziyev, viloyat IIB terrorizm va ekstremizmga qarshi kurashish boshqarmasi boshlig‘i o‘rinbosari, podpolkovnik Y.Ismoilov, Navoiy davlat pedagogika instituti prorektori X.Qurbonov, viloyat Maʼnaviyat va maʼrifat bo‘limi rahbari A.Muqimovlar ayrim yurtdoshlarimizning bilib-bilmay xatarli yo‘llarga kirib qolayotganlari va buning ayanchli oqibatlari haqida o‘z fikrlarini bayon etdilar. Mamlakatimizda olib borilayotgan islohotlarda vatanparvarlik, millatparvarlikka qaratilgan ezgu yo‘nalishlar, islom dinining insonparvarlik, tinchlik va do‘stlik kabi olijanob maqsadlarga xizmat qilishini alohida taʼkidlab o‘tdilar.

– Bugungi globallashuv jarayonida yoshlarimiz turli g‘oyaviy xurujlarning nishoniga aylanmoqda. Internet tarmog‘i orqali diniy ekstremistik g‘oyalar, “ommaviy madaniyat” targ‘ibotchilari yoshlarimiz ongiga o‘zlarining g‘oyalarini singdirishga urinmoqdalar. Davra suhbatimizda soha mutaxassislari bu kabi salbiy tahdidlarning oldini olish, ularga qarshi maʼrifat bilan kurashish to‘g‘risida fikr-mulohazalarini bildirib o‘tishdi. Tadbirda maʼnaviyati yuksak, o‘zining mustahkam eʼtiqodi va milliy qadriyatlarini mahkam tutgan xalqni hech bir kuch yenga olmasligi, yoshlar ko‘p kitob mutolaa qilishi kerakligi taʼkidlandi, – deydi NKMK bosh direktori maslahatchisi Xolmamat Raupov.

Tadbir davomida ishtirokchilardan kelib tushgan barcha savollarga mutaxassislar tomonidan zarur tushuntirishlar berildi.

NKMK Matbuot markazi.