• Yaratildi: 26.04.2021
• Yangilandi: 06.07.2021
• O'qildi: 1624

Sanoat yarmarkasi: sarhisob va tahlil

Joriy yilning 22-24 aprel kunlari Navoiy kon-metallurgiya kombinatida Respublika tarmoqlararo kooperatsiya sanoat yarmarkasi bo‘lib o‘tdi. Unda mamlakatimizning 60 ga yaqin yirik sanoat korxonalari, shuningdek, 600 dan ortiq tadbirkorlik subyektlari vakillari o‘zlarining ikki ming turdan ortiq mahsulotlari bilan ishtirok etishdi.

Uch kunlik tadbir ishlab chiqaruvchilar va xaridorlar uchun haqiqiy muloqot, hamkorlik maydoniga aylandi. Ishlab chiqaruvchi va xaridorlar o‘zaro fikr almashib, istiqboldagi hamkorlik bo‘yicha o‘z taklif va tavsiyalarini bildirishdi. Do‘stona aloqalarni yo‘lga qo‘yish yuzasidan o‘zaro kengashib oldilar. Ko‘rgazmaga qo‘yilgan mahsulotlar bilan tanishdilar. Pirovardida kutilganidan ziyoda natijaga erishildi.

Xususan, O‘zbekiston Respublikasi Iqtisodiy taraqqiyot va kambag‘allikni qisqartirish vazirligi huzuridagi Elektron kooperatsiya portali markazidan olingan maʼlumotga ko‘ra, ushbu yarmarka doirasida umumiy qiymati 421 milliard so‘mlik 1 336 ta shartnoma hamda 269 ta hamkorlik memorandumlari imzolangan.

Navoiy kon-metallurgiya kombinati ham yarmarkada o‘zining keng turdagi mahsulotlari bilan ishtirok etdi. Yakuniy natijalarga ko‘ra, korxona tomonidan kooperatsiya birjasi orqali mahalliy ishlab chiqaruvchilardan qiymati 225,7 milliard so‘m bo‘lgan sanoat mahsulotlari xarid qilish bo‘yicha umumiy 117 ta shartnoma, shuningdek, o‘z mahsulotlarini sotish bo‘yicha qiymati 2,72 milliard so‘m bo‘lgan 10 ta shartnoma imzolandi. Bundan tashqari, 45 ta ishlab chiqaruvchilar bilan hamkorlik memorandumlari tuzildi.

Bir so‘z bilan aytganda, har jihatdan yuqori saviyada o‘tgan ushbu sanoat yarmarkasi qizg‘in muloqotlar, kelishuv va yangi hamkorlar topishda katta imkoniyatlarni yaratdi.

NKMK Matbuot markazi.