• Yaratildi: 12.11.2021
• Yangilandi: 12.11.2021
• O'qildi: 2510

Yana bir bor NKMK jamoasi birinchi

2017-2019-yillarda Navoiy kon-metallurgiya kombinati jamoasi mamlakatimiz vazirlik va idoralar, yirik korxona va tashkilotlarning Idoraviy harbiylashtirilgan qo‘riqlash xizmatlari xodimlari o‘rtasida o‘tkazilgan respublika musobaqasida g‘oliblikni qo‘lga kiritgandi.

Joriy yilning 12-oktabrida Farg‘ona viloyatida o‘tkazilgan navbatdagi musobaqada kombinat jamoasi to‘rtinchi bor g‘oliblik shohsupasiga ko‘tarildi. Jami musobaqada Mudofaa va Energetika vazirliklari, Milliy gvardiya, “Olmaliq kon-metallurgiya kombinati”, “O‘zbekiston temir yo‘llari”, “O‘zkimyosanoat” aksiyadorlik jamiyatlari kabi vazirlik va idoralar, yirik korxona va tashkilotlardan 12 ta jamoa ishtirok etdi.

Jamoalar sportning 3000 va 100 metr masofaga yugurish, turnikda tortilish, o‘qotar qurollardan foydalanish, birinchi tibbiy yordam ko‘rsatish, maxsus va harbiy tibbiy tayyorgarlik borasida test sinovlari bo‘yicha o‘zaro kuch sinashdilar. Yakuniy natijalar bo‘yicha kombinat vakillari raqiblariga hech qanday imkoniyat qoldirmay, umumjamoa hisobida ham, yakka tartibda ham faxrli birinchi o‘rinni qo‘lga kiritishdi.

Shu yilning 11-noyabr kuni g‘olib jamoa aʼzolari: kombinat bo‘linmalari Idoraviy harbiylashtirilgan qo‘riqlash otryadlari xodimlari – Shimoliy kon boshqarmasidan F.Yodgorov, O.Islomov, S.Obidov, Janubiy kon boshqarmasidan J.Norchayev, “1-GMZ” kon boshqarmasidan A.Mamasodikov, A.Yarashev va ularning murabbiysi M.Bochkarevlar Navoiy kon-metallurgiya kombinati rahbariyatining faxriy yorliqlari, qimmatbaho sovg‘alar bilan taqdirlandi va moddiy rag‘batlantirildi. Taqdirlash marosimida jamoa aʼzolari yutug‘i eʼtirof etildi.

Kombinat jamoasini respublika musobaqalariga tayyorlashda o‘z hissasini qo‘shgan NMZ Harbiylashtirilgan qo‘riqlash otryadi guruh boshlig‘i A.Salomov, “1-GMZ” kon boshqarmasi Harbiylashtirilgan qo‘riqlash otryadi yo‘riqchisi A.Jamilov va Navoiy mashinasozlik zavodi jismoniy tarbiya va sog‘lomlashtirish majmuasi uslubchisi R.Bakeyevga ham faxriy yorliq, qimmatbaho sovg‘alar topshirildi va moddiy rag‘batlantirildi.

NKMK Matbuot markazi.