• Yaratildi: 17.11.2021
• Yangilandi: 17.11.2021
• O'qildi: 2256

“Yashil makon” umummilliy loyihasi amalda

Prezidentimiz tomonidan respublikamiz bo‘ylab “Yashil makon” umummilliy loyihasi doirasida yiliga 200 million tup daraxt va buta ko‘chatlarini ekish hamda shaharlardagi yashil maydonlarni hozirgi 8 foizdan 30 foizga oshirish dolzarb vazifa qilib belgilangan. Shu bois Yurtboshimiz tashabbusi bilan joriy yilning 10-dekabr sanasigacha yurtimizda "Dolzarb 40 kunlik" eʼlon qilindi.

Mazkur tadbir doirasida amalga oshirilayotgan "Yashil makon" umummilliy loyihasiga salmoqli hissa qo‘shish maqsadida Navoiy kon-metallurgiya kombinatida “Dolzarb 40 kunlik”da daraxt va buta ko‘chatlarini ekish yuzasidan chora-tadbirlar rejasi belgilab olindi. Unga ko‘ra, yaqin vaqtda 122,7 gektar maydonda 100 ming tup mevali va manzarali daraxt ko‘chatlari o‘tqaziladi.

Ayni paytda ushbu loyiha asosidagi amaliy ishlar jadal olib borilmoqda. NKMK Korporativ ijtimoiy masʼuliyatlari bo‘limi maʼlumotiga ko‘ra, shu kungacha joylarda 20 ming tupdan ortiq mevali va manzarali daraxt ko‘chatlari o‘tqazildi. Bu xayrli ishda kombinat bo‘linmalari va “NKMK jamg‘armasi” davlat muassasasining hududiy boshqarmalari ishchi-xodimlari faol ishtirok etmoqdalar.

– Kombinatimiz ishchi-xodimlari, umuman har bir fuqaro bunday xayrli ishdan chetda turmasligi kerak, - deydi NKMK Korporativ ijtimoiy masʼuliyatlari bo‘limi boshlig‘i Begzod Saidov. – Bugun biz ekayotgan ko‘chatlar shahar va qo‘rg‘onlarimizning ekologik muhitini yaxshilashga xizmat qiladi. Buning uchun ko‘chatlarning ildiz otib, daraxtzorlarga aylanishi uchun ularni muntazam parvarishlashimiz lozim.

Ko‘chat ekish jarayonida hududning tuproq va iqlim sharoitiga alohida eʼtibor qaratilmoqda. Ko‘chatlarni tomchilatib sug‘orish texnologiyasi orqali parvarishlashni hisobga olgan holda meʼyordan ortiqcha suv talab qilmaydigan tut, qayrag‘och, aylant, shumtol, saksovul, gujum, jiyda kabi manzarali va mevali daraxt turlari tanlab olingan.

NKMK Matbuot markazi.