• Yaratildi: 10.12.2021
• Yangilandi: 10.12.2021
• O'qildi: 806

10-dekabr – O‘zbekiston Respublikasi Davlat madhiyasi qabul qilingan kun

Bugun Navoiy shahridagi Prezident maktabida O‘zbekiston Respublikasi Davlat madhiyasi qabul qilinganligining 29 yilligiga bag‘ishlangan maʼnaviy-maʼrifiy tadbir o‘tkazildi.

Tadbirda “Navoiy kon-metallurgiya kombinati” aksiyadorlik jamiyati Jamoatchilik bilan aloqalar bo‘yicha direktori X.Raupov, Navoiy davlat konchilik instituti prorektori T.Normurodov, Prezident maktabi direktori D.Tuxfatullina hamda mazkur taʼlim muassasi pedagog va o‘quvchilari ishtirok etishdi.

So‘zga chiqganlar davlatimiz madhiyasining muallifi O‘zbekiston xalq shoiri, O‘zbekiston Qahramoni Abdulla Oripov ekanligi, musiqasini O‘zbekiston xalq artisti, atoqli bastakor Mutal Burhonov yaratgani, madhiya – qalbida o‘z Vataniga muhabbat va sadoqat tuyg‘usi bor har qanday kishida milliy g‘urur, o‘ziga xos faxr, eng muhimi yurtga mehr uyg‘otishi, bu milliy timsolda xalqning o‘tmishi, buguni va kelajagi, shuningdek, ziynati, orzu-o‘yi, maslak-maqsadi mujassamligi, “Serquyosh” so‘zi jaranglashi bilan butun vujudimizda va dilimizda cheksiz iftixor tuyg‘usini his etashimizni mamnuniyat bilan taʼkidlashdi. Shuningdek, kombinat va institut vakillari so‘nggi yillarda O‘zbekistonda xalqimizning maʼnaviyatini yuksaltirish, yoshlarni vatanparvarlik ruhida tarbiyalash masalasiga alohida eʼtibor qaratilgani, madhiyamiz yoshlarda Vatanga muhabbat, boy tariximizga, milliy o‘zligimizga chuqur hurmatni shakllantirishda, farzandlarimizning har tomonlama barkamol va yetuk insonlar bo‘lib voyaga yetishida muhim tarbiyaviy vosita bo‘lib xizmat qilishi haqida so‘zlab berishdi.

Maʼnaviy-maʼrifiy tadbirda Prezident maktabi pedagog va o‘quvchilari o‘zlarini qiziqtirgan savollarga, jumladan, konchilik va metallurgiya sohasida qo‘llanilayotgan innovatsiyalar haqida batafsil javoblar olishdi.

  

Shuningdek, mazkur taʼlim muassasining o‘qituvchilari tomonidan 10-dekabr – O‘zbekiston Respublikasi Davlat madhiyasi qabul qilingan kuniga bag‘ishlangan videolavha, qiziqarli maʼlumotlar namoyish etildi hamda milliy timsolimizni madh etuvchi qo‘shiq kuylandi.

“NKMK” AJ matbuot xizmati.