Система Orphus

Shriftning o'lchamini

Qarama-qarshilik

        
Siz bu yerdasiz: Bosh sahifa Rahbariyat Rahbariyatning rasmiy bayonotlari XUSH KELDING, NAVRO‘ZI OLAM!

XUSH KELDING, NAVRO‘ZI OLAM!

Qadrli do‘stlar!

Ona tabiat yashillikka burkanib, bahor tarovati qalblarimizga cheksiz shodu xurramlik ulashib turgan shu kunlarda, yana bir ezgu ayyom – Navro‘zi olamni munosib kutib olmoqdamiz.

Fursatdan foydalanib, ko‘pming kishilik, turli millat va elat vakillaridan tarkib topgan ahil mehnat jamoamiz, aziz hamkasblarimiz va mehnat faxriylarini tinchlik-totuvlik, farovonlik va mehr-oqibat bayrami bo‘lgan ushbu qutlug‘ shodiyona bilan chin qalbimdan samimiy tabriklayman.

Yurtimizga o‘z tarovati, go‘zalligi bilan tashrif buyurgan bahor tabiatda yasharish va yangilanish mavsumini boshlab, qalbimizga yaqin bayramlarni yetaklab kelmoqda.

Jumladan, ona tabiat, keng dala-qirlar, tog‘lar va bog‘lar sir-sinoati va maftunkorligi barchamizga bayramona jo‘shqinlik va shukronalik ulashib, qalblarimizda olijanob tuyg‘ularni o‘yg‘otmoqda.

Bunday ko‘tarinkilikni bugun Navoiy kon-metallurgiya kombinatining turli bo‘linmalarida fidokorona mehnat qilayotgan ishchi-xizmatchilar hayotida ham yaqqol ko‘rishimiz mumkin.

Jannatmakon yurtimizda bebaho an’ana va milliy qadriyatlarimiz, boy ma’naviy merosimiz o‘z qadr-qimmatini topayotgani har birimizga cheksiz g‘urur va iftixor bag‘ishlaydi.

Yangidan sayqal topgan qadriyatlarimizdan biri, o‘zining uch ming yillik tarixiga ega bo‘lgan – Navro‘zi olamdir.

Asrlar osha xalqimizning orzu-niyatlarini ifoda etib, insoniyatni ruhan poklanish, ma’naviy yuksalishga chorlayotgan, umuminsoniy ezgu g‘oyalarni o‘zida chuqur mujassam etgan – Navro‘zi olam mustaqillik yillarida yangicha ma’no-mazmunga ega bo‘lib, xalqimizning sevimli va ardoqli umumxalq bayramiga aylandi.

Ma’lumki, Navro‘z – qadimdan yangilanish, yasharish, yangi kun, yangi hayot ramzi, sharqona yangi yil, milliy iftixor, mehr-oqibat, poklik va shodlik, ahillik va birdamlik tantanasi sifatida ham keng nishonlanib kelinmoqda.

Biz istiqomat qilayotgan manzil-makonda xalqimizning umrboqiy bu ayyomi azaldan keng nishonlanib, uning ildizlari olis tarixga borib taqalishi turli manbalar, qo‘lyozmalar va shoh asarlarda o‘z ifodasini topgan.

Xususan, bunday tarixiy asoslar Hazrati Mir Alisher Navoiy bobomiz g‘azallari, Abu Rayhon Beruniyning “Qadimgi xalqlardan qolgan yodgorliklar”, Umar Xayyomning “Navro‘znoma”, Abulqosim Firdavsiyning “Shohnoma”, Mahmud Qoshg‘ariyning “Devonu lug‘otit-turk”, Abu Bakr al-Narshaxiyning “Buxoro tarixi” kabi shoh asarlarda yozib qoldirilgani fikrimizning amaldagi tasdig‘idir.

Darhaqiqat, ayni paytda kombinatimiz ishchi-xizmatchilari, muhandis-texnik xodimlari ham azaliy bayramni yuksak ishchanlik ruhida qarshi olib, keng ko‘lamli bunyodkorlik va obodonlashtirish ishlari, hasharlarda faol ishtirok etishmoqda.

Pirovardida kombinat tasarrufidagi shaharlar, qo‘rg‘onlar ko‘cha va xiyobonlariga, konlar, zavodlar, sexlar ma’muriy binolari atrofiga ming-minglab tup manzarali va mevali daraxt ko‘chatlari o‘tqazilib, gulzorlar barpo etilmoqda.

Bundan tashqari, umumxalq bayramiga tayyorgarlik ko‘rish va o‘tkazish yuzasidan ishlab chiqilgan tadbirlar doirasida mehnat faxriylari, nogironlar, ijtimoiy himoyaga muhtoj oilalarga mehr-muruvvat ko‘rsatilib, ular holidan xabar olinmoqda. Kon, zavod va boshqa ishlab chiqarish hamda xizmat ko‘rsatish korxonalarida ko‘klam taomlariga to‘la dasturxonlar yozilib, turli ommaviy- madaniy tadbirlar tashkil etilmoqda.

Bundan keyin ham mehnat ahli haqida g‘amxo‘rlik ko‘rsatish, ijtimoiy masalalarni hal qilish kombinat rahbariyatining asosiy vazifalaridan biri bo‘lib qoladi.

Aziz do‘stlar!

Fursatdan foydalanib, yana bir bor sizlarni Navro‘zi olam bilan chin qalbimdan samimiy tabriklayman.

Ilohim, pok orzu-niyatlarimiz amalga oshib, sharqona yangi yilimiz har bir oila, har bir xonadonga baxt va quvonch, mo‘l-ko‘lchilik, qut-baraka olib kelsin!

Sizlarga mustahkam sog‘lik-salomatlik, oilaviy baxtu saodat, xonadonlaringizga fayzu baraka, ishlaringizga omadlar tilayman.

Navro‘zi olam muborak bo‘lsin!

 

Quvondiq SANAQULOV,

Navoiy kon-metallurgiya kombinati

bosh direktori, O‘zbekiston Qahramoni.

 

Biz bilan bog'lanish

  • Umumiy bo‘limi (devonxona): 0(436) 227-71-64, +998 79 227-71-64
  • Ishonch telefoni: 0(436) 227-72-22, +998 79 227-72-22

    Mualliflik huquqi © NKMK, 2015. Barcha huquqlar himoyalangan.   

Axborotdan foydalanish shartlari

Siz bu yerdasiz: Bosh sahifa Rahbariyat Rahbariyatning rasmiy bayonotlari XUSH KELDING, NAVRO‘ZI OLAM!