Система Orphus

Shriftning o'lchamini

Qarama-qarshilik

        
Siz bu yerdasiz: Bosh sahifa Rahbariyat Rahbariyatning rasmiy bayonotlari Navro'z tabrigi

Navro'z tabrigi

Quvondiq SANAQULOV,
Navoiy kon-metallurgiya
kombinati bosh direktori.

Aziz do‘stlar, qadrli hamkasblar!

Avvalo, barchangizni uyg‘onish va yasharish, poklanish va yangilanish ayyomi – Navro‘zi olam munosabati bilan chin qalbimdan qutlayman va muborakbod etaman. Ona yurtimizga fasllar kelinchagi bahor tashrif buyurdi. Butun tabiat go‘zallikka burkanmoqda. Atrof-muhitning betakror tarovatidan ko‘zingiz quvnaydi. Nafosat fasli odamlar qalbida ham sof va huzurbaxsh tuyg‘ularni uyg‘otib, yashash va yaratishga ruhlantirmoqda.

Xalqimizda «Tinch yurtga bayramlar, to‘ylar yarashadi» degan teran mazmun-mohiyatga ega hikmatli ibora bor. Yaratganga beadad shukronalar bo‘lsinki, muhtaram Yurtboshimizning dono siyosati tufayli xalqimiz tinch, osoyishta, farovon hayot kechirmoqda. Orzu niyatlariga yetishish uchun yurt istiqboli yo‘lida fidokorona mehnat qilmoqda. Farzand va nevaralarini tarbiyalab kamolini ko‘rmoqda. Inson uchun bundan ortiq baxt bo‘lmasa kerak! Maftunkor bahor fasli ajoyib bayramlari bilan ham ajralib turadi. Ayniqsa, sharqona yangi yilning boshlanishi, eng qadimiy udumimiz–Navro‘zi olam o‘ziga xos beqiyos jihatlariga ega. Navro‘z tinchlik, totuvlik, bag‘rikenglik, qut-baraka timsoli, mehr-muhabbat ayyomidir. Asl milliy bayramimizda xalqimizning qadimiy urf odatlari, an’analari, umrboqiy qadriyatlari o‘z ifodasini topgan. O‘zbekiston Respublikasi Prezidentining «2015 yilgi Navro‘z umumxalq bayramiga tayyorgarlik ko‘rish va uni o‘tkazish to‘g‘risida»gi qarorida ta’kidlanganidek, necha ming yillar davomida azaliy qadriyatlarimizni o‘zida mujassam etib, ajdodlarimizdan bizga meros bo‘lib kelayotgan Navro‘zning istiqlol yillaridagi o‘rni va mohiyati oshib bormoqda. Xalqimiz uchun tabiat uyg‘onishi, sharqona yangi yilning boshlanishi, asl milliy, eng ardoqli bayram bo‘lmish Navro‘z ayyomini yurtimizning barcha hudud va mintaqalarida har tomonlama chuqur tayyorgarlik bilan kutib olish va nishonlash ezgu, bir so‘z bilan aytganda, tabiiy an’anaga aylanib qoldi. Umumxalq bayrami tarixining uch ming yilliklar bilan bog‘lanishi Sharq xalqlari dunyo tamaddunida katta o‘rin va mavqega ega ekanligidan nishona sifatida har birimizning qalbimizda faxr-iftixor tuyg‘ularini uyg‘otadi.

Yurtdoshlarimiz yasharish va poklanish ayyomini intizorlik bilan qarshi olishadi. Chunki bahor dashtu cho‘llar, qirlaru tog‘larga ajib tarovat baxsh etadi. Navro‘z bilan bog‘liq urf-odatlar, umrboqiy an’analar zamirida mehr-muruvvat, o‘zaro hurmat-e’tibor, oqibatli bo‘lish singari insoniy fazilatlar qorishib ketgan. Qutlug‘ bayram kunlari bemorlar, keksalar, nogironlar, yolg‘izlar holidan xabar olish, mehr-muruvvat ko‘rsatish, ko‘cha, hovli va xiyobonlarni tozalash, obodonlashtirish, bunyodkorlik ishlarini amalga oshirish Navro‘zi olamning hayotimizda va farzandlarimiz tarbiyasida tutgan ahamiyatini yanada oshiradi. Bayram arafasida butun yurtimiz bo‘ylab o‘tkaziladigan hasharlar, shanbaliklar va boshqa xayrli tadbirlardan yoshu qari hech kim chetda qolmayapti. Barcha aholi ezgu niyatlar bilan dalaga chiqadi, ko‘cha va xiyobonlarning bo‘sh joyi borki, tartibga keltirilib, bog‘u gulzorga aylantiriladi. Navoiy kon-metallurgiya kombinatining ahil jamoasi har doim bunday umumxalq hasharlarida faol ishtirok etib kelayapti. Kombinatda Navro‘z umumxalq bayramiga tayyorgarlik ko‘rish va uni o‘tkazish yuzasidan ishlab chiqilgan reja tadbiriga muvofiq bo‘linmalar jamoalari mart oyining har shanba kuni hasharlar tashkil etib, tozalash, obodonlashtirish, mevali, manzarali ko‘chatlar, gullar o‘tqazishdek xayrli ishlarni bajarmoqdalar. «Do‘stlik» agrofirmasi jamoasining kuchi bilan Nurota tumanida yuz gektar maydonda intensiv bog‘ barpo etilmoqda. Qutlug‘ ayyom sharafiga 14-15 mart kunlari o‘tkazilgan shanbaliklarda kombinat ishchi-xizmatchilari, mutaxassis xodimlaridan 35 ming nafardan ko‘proq kishi ishtirok etdi. Hasharda juda katta hajmdagi tozalash, ko‘kalamzorlashtirish va obodonlashtirish ishlari amalga oshirildi. Turli bayram sanalariga munosib mehnat sovg‘alari hozirlash xalqimizning azaliy odatlaridan biridir. Shu ma’noda baho beradigan bo‘lsak, kombinatimizning ko‘pming kishilik ahil jamoasi bahor ayyomi-Navro‘zni yorug‘ yuz, ko‘tarinki kayfiyat, zo‘r shodu xurramlik bilan kutib olmoqda. Kombinatda asosiy mahsulotlar ishlab chiqarish bo‘yicha ikki oylik rejalar sharaf bilan uddalandi. Oltin va uran kukuni ishlab chiqarish ko‘rsatkichlarini o‘tgan yilning shu davriga taqqoslaganda muvofiq ravishda 102,6 va 100,8 foizni tashkil etayapti. Qariyb 1 milliard 281 million so‘mlik xalq iste’mol mollari ishlab chiqarildi. Mahsulot tannarxini arzonlashtirish yuzasidan belgilangan topshiriqni 100,2 foizga bajarganimiz quvonch bilan tilga olishga arzigulik yutuqlarimizdandir. Erishilayotgan muvaffaqiyatlarda barcha yirik bo‘linmalar jamoalarining munosib hissasi bo‘layapti.

Ma’lumki, Prezidentimiz I.Ka­rimovning taklifi bilan 2015 yil mamlakatimizda «Keksalarni e’zozlash yili» deb e’lon qilindi. Yil davlat dasturida ilgari surilgan vazifalar Navro‘z bayrami g‘oyalariga to‘la hamohangligini alohida ta’kidlab o‘tmoqchiman. Kombinatda dastur ijrosini ta’minlash yuzasidan kompleks chora-tadbirlar ishlab chiqildi. Ana shunday olijanob maqsadlar uchun 12 milliard 328,5 million so‘m mablag‘ sarflash mo‘ljallanayapti. Piru badavlat otaxonu onaxonlarimizga izzat-ikrom ko‘rsatish, ularga mehnat, dam olish, tibbiy xizmat ko‘rsatishni yaxshilash uchun yangi imkoniyatlar tug‘iladi. Ayni paytda ana shu tadbirlar muvaffaqiyatli amalga oshirilmoqda. Kombinat ishchi-xizmatchilaridan 153 nafar kishiga joriy yilda namunaviy loyiha asosida qishloq joylarida bunyod etilayotgan kottej-hovli qurilishi boshlang‘ich badalini to‘lash uchun jami 6 milliard 839,5 million so‘mlik foizsiz ssuda ajratildi.

Navro‘z kombinat bo‘linmalarida keng nishonlanmoqda. Bayram sharafiga to‘kin-sochin dasturxonlar yozilib, ko‘ngilochar tadbirlar uyushtirilayapti. Keksalar va nogironlarga Navro‘z sovg‘alari ulashilmoqda. Bunday xayrli tadbirlar hali davom etaveradi. Zotan, qadimiy ayyomimiz zamirida aynan shunday ezguliklar va qadriyatlar o‘z ifodasini topgan bo‘lib, Navro‘z bejizga mehr-muruvvat bayrami deyilmaydi.

Aziz hamkasblar! Sizlarni yana bir bor Navro‘z ayyomi bilan chin qalbdan qutlayman. Barchalaringizga sihat-salomatlik, xotirjamlik, baxt-saodat, xonadonlaringizga fayzu baraka, farovonlik tilayman. Bahor bayramingiz muborak bo‘lsin, qadrli do‘stlar!

Biz bilan bog'lanish

  • Umumiy bo‘limi (devonxona): 0(436) 227-71-64, +998 79 227-71-64
  • Ishonch telefoni: 0(436) 227-72-22, +998 79 227-72-22

    Mualliflik huquqi © NKMK, 2015. Barcha huquqlar himoyalangan.   

Axborotdan foydalanish shartlari

Siz bu yerdasiz: Bosh sahifa Rahbariyat Rahbariyatning rasmiy bayonotlari Navro'z tabrigi