Unvon muborak!

O'zbekiston Respublikasi Prezidentining 2015 yil 25 avgustdagi Farmoniga muvofiq Vatanimiz mustaqilligini mustahkamlash, uning jahon miqyosidagi shon-shuhratini yuksaltirish, islohotlarni muvaffaqiyatli amalga oshirish borasida davlat va xalq oldidagi ulkan xizmatlari, ishlab chiqarish va ijtimoiy sohalardagi ko'p yillik fidokorona mehnati hamda yosh avlodni vatanparvarlik va istiqlol g'oyalariga sadoqat ruhida tarbiyalashga qo'shgan katta hissasi uchun 4 nafar turli soha vakillari «O'zbekiston Qahramoni» degan oliy unvonga sazovor bo'ldilar. Ular orasida «Navoiy kon-metallurgiya kombinati» davlat korxonasi bosh direktori Quvondiq Sanaqulov ham bor.

Biz kombinatning ko'pming kishilik ahil jamoasi nomidan Quvondiq Sanaqulovni va uch nafar hamyurtlarimizni Vatanimizning yuksak mukofoti bilan chin qalbdan muborakbod etamiz. Ulkan korxonamiz rahbarining yurtimiz iqtisodiyotini rivojlantirish yo'lidagi xizmatlari Yurtboshimiz tomonidan shunday yuqori baholanganligi konchilar va metallurglar mehnatining oliy darajadagi e’tirofi sifatida barchamizni cheksiz quvontirmoqda.