Система Orphus

Shriftning o'lchamini

Qarama-qarshilik

        
Siz bu yerdasiz: Bosh sahifa Matbuot ILM VA IZLANISH - YUKSALISH OMILI

ILM VA IZLANISH - YUKSALISH OMILI

Harakatlar strategiyasi asosida olib borilayotgan keng ko‘lamli islohotlarning dastlabki natijalari yurtimiz aholisi hayotida o‘zining yaqqol ifodasini topmoqda. Bu esa ularning ijtimoiy faolligi, ertangi kunga ishonchi mustahkamlanishida muhim omil bo‘layapti. Prezidentimiz tashabbusi bilan mamlakatimizda yetakchi soha va tarmoqlarni innovatsion rivojlantirish, innovatsion g‘oyalar va texnologiyalarni ishlab chiqarishga keng joriy etish yuzasidan izchil ishlar amalga oshirilmoqda. Joriy yil “Faol tadbirkorlik, innovatsion g‘oyalar va texnologiyalarni qo‘llab-quvvatlash yili” deya e’tirof etilishida ham ushbu mazmun-mohiyat mujassam.

Janubiy kon boshqarmasi Navoiy kon-metallurgiya kombinatining zamonaviy texnika va texnologiya bilan jihozlangan, salohiyatli kadrlarga ega, ko‘p tarmoqli yirik bo‘linmalaridan biridir. Mustaqillik yillarida hukumatimiz, ayniqsa kombinat rahbariyatining bevosita qo‘llab-quvvatlashi tufayli boshqarmamizda ishlab chiqarish va ijtimoiy sohalarda salmoqli yutuqlar qo‘lga kiritildi va bugun yirik sanoat korxonasi sifatida innovatsion rivojlanish yo‘lidan hamqadam bormoqda. Bosib o‘tilgan shonli yo‘lga, tashkilotimiz tarixiga nazar soladigan bo‘lsak buning yaqqol guvohi bo‘lamiz.

1996 yilda Nurobod shahrida plastmassa quvurlari va mah­sulotlari ishlab chiqarish sexi ishga tushirilib, bu mo‘’jazgina korxonada ishlab chiqarilayotgan  turli plastmassa quvurlari va mahsulotlari kombinat bo‘linmalarining ehtiyojini qondirdi hamda yangi uran konlarini o‘zlashtirish imkonini bermoqda. 2003 yildan boshlab esa tashkilotimizda Fransiya davlatidan keltirilgan jihozlar bilan ma’danli suv ishlab chiqarish sexi yo‘lga qo‘yildi. Aholi iste’moliga yetkazib berilayotgan ma’danli suvimiz nafaqat kombinat tarkibidagi bo‘linmalar, balki boshqa iste’molchilarga ham ma’qul bo‘lmoqda.

Odatda, Nurobod kabi chekka shaharlarda xotin-qizlarni ish bilan ta’minlash masalasi doimo dolzarb vazifalardan biri bo‘lib kelgan. Shu munosabat bilan 2009 yilda shahrimizda maxsus kiyimlar tikish sexi tashkil etildi. Mazkur korxonada 300 nafardan oshiq xotin-qiz mehnat qilib, ishchi va xizmatchilar uchun maxsus ish kiyimlari, korjomalar, qo‘lqoplar, xalat kabi 70 dan ortiq trikotaj mahsulotlarini ishlab chiqarmoqda.

Bugun Marjonbuloq shah­rining va Zarkent qo‘rg‘onining me’moriy qiyofasi tubdan o‘zgarib ketdi. Mustaqillik davrida Zarkent shahrida 21 ta ko‘p qavatli, shu jumladan, Zarmitan sanoat maydonida o‘z xizmat burchini o‘tayotgan harbiylar uchun alohida ko‘p qavatli turar-joy binolari, muhandis-texnik xodimlar uchun kottedjlar, qator ma’daniy-maishiy binolar, 200 o‘rinli “Konchi” madaniyat uyi, sport majmuasi, yotoqxonalar, mehmonxona, 50 o‘rinli ishchilar oshxonasi qad rostladi. Yosh oilalar uchun 4-qavatli 44-xonadonli ko‘p qavatli turar-joy binosi ham foydalanishga topshirildi.

Yurtboshimiz va hukumatimiz tomonidan Zarmitan sanoat maydonini o‘zlashtirish bo‘yicha tashkilotimiz oldiga qo‘yilgan vazifalarni bajarish maqsadida, kombinatimiz bosh direktori Quvondiq Sanaqulovning bevosita rahbarligida ushbu hududda 4-Gidrometallurgiya zavodi qisqa muddatda foydalanishga topshirildi. Natijada, tashkilotimiz bo‘yicha oltin ishlab chiqarish miqdori ko‘paydi. Zavodda xorijdan keltirilgan eng zamonaviy, so‘nggi innovatsion texnologiyalar bilan jihozlangan uskunalarni bugun o‘zimizning mahalliy yosh muttaxassislarimiz ishonch bilan boshqarishmoqda.

Mustaqilligimizning 25 yilligi arafasida Nurobod shahrida 4-Tibbiy-sanitariya­ qismining Pulmonologiya bo‘­limi joylashgan bino suv bilan davolash shifoxonasiga aylantirildi. Shifoxona Polsha, Germaniya, Italiya kabi xorijiy davlatlardan keltirilgan eng zamonaviy tibbiyot asbob-uskunalari bilan jihozlandi. Zarkent shahridagi “Akvapark” foydalanishga topshirildi.

“Bir haqiqat barchamizga yaxshi ma’lum: ilm va izlanish bo‘lmagan joyda hech qanday rivojlanish, yuksalish va umuman, biror-bir sohaning kelajagi bo‘lmaydi”, - degan edi muhtaram Prezidentimiz Shavkat Mirziyoyev. So‘z sanoatda innovatsion rivojlanish haqida borar ekan, bu sohada tashkilotimizda ham ilm-fan yutuqlaridan keng foydalanib, innovatsion texnologiyalarni ishlab chiqarishga joriy etishga doimo intilib keladi. Buning uchun esa rivojlangan infrastrukturani yaratishimiz, kadrlar salohiyatini oshirish, yangi ish o‘rinlarini yaratish, ishlab chiqarishni mexanizatsiyalash va avtomatlashtirish imkoniyatlaridan unumli foydalanish kabi manzilli dasturlarni amaliyotga tatbiq etishimiz zarur bo‘ladi. Aynan, innovatsion taraqqiyotni uzoq muddatli prognozlashtirish, strategik rejalashtirish va dasturlash tizimini yo‘lga qo‘yish maqsadga muvofiqdir.

Shu maqsadda 2018 yil va keyingi muddatlarda boshqarmamiz bo‘yicha Zarmitan oltin-ruda koni negizida kon-ruda kompleksining uchinchi bosqichini qurish, ma’naviy va jismoniy eskirgan texnologik, energetik va yordamchi asbob-uskunalarni almashtirish va modernizatsiyalash, “Zarmitan” konining quyi gorizontlarni o‘zlashtirish, “Zarmitan” koni “Asosiy” shaxta stvolini  yanada chuqurlashtirish, “Charmitan” oltin koni markaziy va sharqiy qismlarini ochish va o‘zlashtirish hamda Marjonbuloq oltin boyitish fab­rikasini yaqin kelajakda barqaror sur’atda xomashyo bilan ta’minlash ishlarini amalga oshirishimiz lozim.

Oldimizga qo‘yilgan ushbu maqsad­larni bajarish bilan birgalikda, uy-joy va ijtimoiy ahamiyatga molik ob’ektlarni qurish ishlariga e’tibor qaratiladi. 2018-2019 yillarda Zarkent qo‘rg‘onida yosh mutaxassislarning uy-joyga bo‘lgan talabini qondirish maq­sadida yana ikkita ko‘p qavatli uy-joy quriladi, sanoat maydonida istiqomat qilayotgan aholiga, ularning farzandlariga mo‘ljallangan istirohat bog‘ini bunyod etish ham nazarda tutilgan.

Bularning barchasi innovatsiya va innovatsiyaga intilish ortidan. Ana shu jihatlar, bosh­qarmamizning bugungi kun talablaridan kelib chiqib taraqqiyot darajasini belgilaydi. Chunki, yuqori sur’atlarda rivojlanishni saqlab qolish, uning bardavomligini ta’minlash uchun innovatsion texnologiyalar hal qiluvchi rol o‘ynaydi.

Yorqin SHAKAROV,

 Janubiy kon boshqarmasi direktori.

 

Jo‘rayev Abdumajid Irisovich

Matbuot markazi boshlig‘i – NKMK bosh direktorining matbuot kotibi – axborot siyosati masalalari bo‘yicha maslahatchisi.

+ (998 79) 2277-473

Sadriddinov Nizomiddin Xayriddinovich

“Konchilar hayoti” gazetasi muharriri.

+ (998 79) 2277-464

Biz bilan bog'lanish

  • Umumiy bo‘limi (devonxona): 0(436) 227-71-64, +998 79 227-71-64
  • Ishonch telefoni: 0(436) 227-72-22, +998 79 227-72-22

    Mualliflik huquqi © NKMK, 2015. Barcha huquqlar himoyalangan.   

Axborotdan foydalanish shartlari

Siz bu yerdasiz: Bosh sahifa Matbuot ILM VA IZLANISH - YUKSALISH OMILI