Система Orphus

Shriftning o'lchamini

Qarama-qarshilik

        
Siz bu yerdasiz: Bosh sahifa Выпуск №10 от 31.05.2018 EKOLOGIYA VA MONITORING

EKOLOGIYA VA MONITORING

Ona tabiatning go‘zalligini asrash, e’zozlash va ayni paytda uning bebaho saxovatidan ehtiyotkorlik bilan foydalanish bugungi kunning muhim vazifasidir. Biz tabiatning har bir qarich yerini, har tomchi suvini, musaffo havosini, nozu ne’matlarini ko‘z qorachig‘iday asrashimiz lozim.

Navoiy kon-metallurgiya kombinatiga qarashli 5-kon boshqarmasida tabiatni asrash, uni boyitish, kelajak avlodga sog‘lom ekologik muhitni qoldirish, atrof muhitni muhofaza qilish borasida mavjud imkoniyatlar to‘la ishga solinayapti. Atrof muhitni muhofaza qilish xizmati tomonidan yer, yer osti boyliklari, suv, o‘simlik va hayvonot dunyosi hamda boshqa tabiiy zahiralarni muhofaza qilish, ulardan oqilona foydalanish yuzasidan doimiy nazorat olib borilayapti.

Korxona bo‘linmalari hududi asosan cho‘l zonalarida joylashganligini inobatga olib, suvdan oqilona foydalanish muhim ahamiyat kasb etadi. Zafarobod qo‘rg‘onida yashovchi aholidan chiqadigan oqava suvlar ishlab chiqarish quvvati sutkasiga 4 ming 700 kub metr bo‘lgan tozalash inshootida tozalanib, undan qo‘rg‘ondagi ekinlarni sug‘orishda foydalanish evaziga yiliga o‘rtacha 900 ming kub metr suvni tejashga erishilmoqda. 1, 2 va 4-geotexnologik konlarda ishchi-xizmatchi xodimlarning yuvinish joyida hosil bo‘ladigan oqava suvni tozalab texnologik jarayonda qayta ishlatish, avtotransport vositalarini yuvish joyida aylanma suv sarfidan foydalanish kabi tabiatni muhofaza qilish tadbirlari amalga oshirilmoqda.

Hozirgi kunda transport vositalaridan chiqadigan tutun gazlar atmosfera havosini ifloslantiruvchi asosiy manba hisoblanadi. Transport vositalaridan chiqayotgan zararli gazlarni kamaytirish uchun transport vositalarini yilning har choragida bir marta ekologiya ko‘rigidan o‘tkazib turish lozimdir. Ekologiya ko‘rigida transport vositalaridan chiqadigan gazlar miqdori gaz-tutun o‘lchagich vositalari yordamida tekshiriladi va diagnostika qilinadi. Boshqarmamizda zaruriy gaz-tutun o‘lchagich vositalari bilan jihozlangan diagnostika punkti faoliyat ko‘rsatayapti. Tutun va gaz miqdori belgilangan me’yorlardan yuqoriligi aniqlangan hollarda transport vositalari diagnostika qilinib, qayta ta’mirlangandan keyingina ulardan foydalanishga ruxsat berilmoqda.

Issiqlik va suv ta’minoti sexiga qarashli bug‘ qozonxonalari atmosfera havosiga salbiy ta’sir ko‘rsatadi. 5- va 1-bug‘ qozonxonalarida mazut yoqilg‘isi o‘rniga tabiiy gazdan foydalanishga o‘tish atmosfera havosini ifloslantiruvchi gazlar miqdorini kamaytirishga imkon berayapti. “Shimoliy Konimex” va “Sugrali” geotexnologik konlaridagi bug‘ qozonxonalarida ham tabiiy gazdan foydalanishga o‘tish rejalashtirilgan.

Kon boshqarmada yer resurslarini muhofaza qilish bo‘yicha qator ishlar bajarilmoqda. 1997 yildan e’tiboran yerlarni yaroqli holga keltirish (rekultivatsiya) yuzasidan ishlar yo‘lga qo‘yilgan bo‘lib, yigirma yilda ishlab chiqarish jarayonida buzilgan 3070,3 gektar yer yaroqli holga keltirilib, xalq xo‘jaligida foydalanish uchun yer egalariga qayta topshirildi. Qattiq maishiy va ishlab chiqarish chiqindilari bilan atrof muhit ifloslanishining oldini olish maqsadida chiqindilarning hosil bo‘lishi, harakati va ularni zararsizlantirish masalalari o‘rganib chiqilgan. Chiqindilarning qayta ishlanadigan turlari tegishli qayta ishlash korxonalariga yuborilmoqda. Qolgan turlari esa Ekologiya va atrof-muhitni muhofaza qilish hududiy boshqarmalarining ruxsatnomasi asosida maxsus chiqindixonalarga ko‘mib tashlanayapti.

O‘zbekiston Respublikasining “Ekologik ekspertiza to‘g‘risida”gi qonunida barcha loyihalashtirilayotgan ob’ektlarning atrof tabiiy muhit holatiga va fuqarolar sog‘ligiga ta’sirini davlat ekologik ekspertizasidan o‘tkazishning majburiyligi ta’kidlangan. 5-kon boshqarmasida 2017 yil davomida barcha turdagi qurilish uchun yer uchastkalarini ajratish materiallari, loyiha oldi va loyiha hujjatlari, tabiiy resurslardan foydalanish, normativ-texnik va yo‘riqnoma-uslubiy hujjatlarining ekologik talablarga muvofiqligi xususida davlat ekologik ekspertizasining jami 19 ta xulosalari olindi.

O‘zbekiston Respublikasi Vazirlar Mahkamasining 2014 yil 21 yanvardagi 14-sonli qaroriga muvofiq tashkilot, korxona va muassasalar ifloslantiruvchi moddalarni atrof muhitga chiqarib tashlash, suvga oqizish va chiqindilarni joylashtirishning me’yoriy hujjatlarini tayyorlashlari, ishlab chiqishlari talab etiladi. Ushbu me’yoriy hujjatlar 5 yil muddatda yangilanib turilishi kerak. 5-kon boshqarmasining Samarqand, Buxoro va Navoiy viloyatlari hududlarida joylashgan barcha ob’ektlari uchun me’yoriy hujjatlar rasmiylashtirilgan va muddatlari nazoratga olingan. Boshqarma bo‘yicha 2017 yil davomida ifloslantiruvchi moddalarni atrof muhitga chiqarib tashlash, suvga oqizish va chiqindilarni joylashtirganlik uchun jami qariyb 65 million so‘m to‘lov hisoblanib, Ekologiya va atrof muhitni muhofaza qilish hududiy boshqarmalarining hisob raqamlariga to‘lovlar to‘liq amalga oshirildi.

Aminjon XAYITMUROTOV,

5-kon boshqarmasi Atrof muhitni 

muhofaza qilish xizmati yetakchi muhandisi.

 

Biz bilan bog'lanish

  • Umumiy bo‘limi (devonxona): 0(436) 227-71-64, +998 79 227-71-64
  • Ishonch telefoni: 0(436) 227-72-22, +998 79 227-72-22

    Mualliflik huquqi © NKMK, 2015. Barcha huquqlar himoyalangan.   

Axborotdan foydalanish shartlari

Siz bu yerdasiz: Bosh sahifa Выпуск №10 от 31.05.2018 EKOLOGIYA VA MONITORING