Система Orphus

Shriftning o'lchamini

Qarama-qarshilik

        
Siz bu yerdasiz: Bosh sahifa 11.06.2015 dan №11 nashr OFTOBNI ELKALAGAN ODAMLAR

OFTOBNI ELKALAGAN ODAMLAR

Yozning saratoni bor erkaligini sahroda ko‘rsatadi. Quyosh tikkaga kelar-kelmas atrofga olov purkaydi. Yоqimsiz issiq shamol nafasni qaytarib, kishini behuzur qiladi. Qizilqumning qaynoq quyoshida toblangan, cho‘l zaxmatini totgan shoir bu manzarani shunday tasvirlaydi:

Yumronqoziq inidan ko‘tarolmas bosh,
Tirik jonzot borki, bari chalajon.
Birgina mavjudot ishlar, berib dosh,
Sahroni zabt etar Hazrati inson.

Ha, bugun sizga elkasida sahro oftobini opichlab, og‘ir ishlab chiqarish sohasida mardonavor mehnat qilayotgan ana shunday insonlar haqida hikoya qilishga chog‘landim.

Qahramon Sharipov – Navoiy kon-metallurgiya kombinati 5- kon boshqarmasiga qarashli 2-geotexnologik koni «Janubiy Bukinay» geotexnologik uchastkasi boshlig‘i. U asli cho‘l farzandi. 1965 yilda Qizilqum kengliklari etagida qad rostlagan G‘ijduvon tumaniga qarashli Ko‘kcha qishlog‘ida tug‘ilgan, uning bolaligiyu balog‘at yillari cho‘l bag‘rida kechyapti. Halol mehnati, saxovatpeshaligi, bag‘rikengligi bilan qishloqda o‘z o‘rni, o‘z so‘ziga ega bo‘lgan otasi Ochil boboning, 10 nafar farzandni oq yuvib, oq tarab voyaga etkazgan, qat’iyatli, bir so‘zli onajonisi Muqaddas buvining tarbiyasini olgan Qahramon aka har bir ishga jiddiy yondashishga, boshlagan ishini izchillik bilan oxiriga etkazishga odatlangan.

Q.Sharipov o‘rta maktabni tamomlagandan so‘ng, mehnat faoliyatini 1983 yilda 5- kon boshqarmasining 1- geotexnologik konida boshladi. Ko‘p o‘tmay harbiy xizmatga chaqirilgan yosh konchi 1986 yilda armiya safidan qaytgach, 2-geotexnologik konda dastlab chilangar-ta’mirlovchi, keyinchalik geotexnologik quduq¬lar operatori bo‘lib ishladi. Berilgan topshiriqlarni o‘z o‘rnida va o‘z vaqtida bajarayotgan Qahramon akaning sa’y-harakatlari rahbariyat e’tiboridan chetda qolmadi, oradan ko‘p o‘tmay u operatorlar brigadiri etib tayinlandi. 2006 yilda ishlab chiqarishdan ajralmagan holda, Shirin energetika texnikumini bitirgandan so‘ng unga uchastka ustaligi, 2008 yilda ishlab chiqarishning eng mas’uliyatli bo‘g‘inlaridan biri – geotexnologik uchastka boshlig‘i vazifasi ishonib topshirildi.

Bugungi kunda Qahramon aka boshchilik qilayotgan geotexnologik uchastka 4 ta brigadadan iborat bo‘lib, 94 nafar ishchi-xodim mehnat qiladi. Mazkur uchastkaning vazifasi mahsulotlarni sorbsiyalarga etkazib berish, geotexnologik quduqlar faoliyatini nazorat qilib borish, nosozlarini o‘z vaqtida ta’mirlashdan iborat. Uchastkaning ahil mehnat jamoasi kimyoviy reagent va energiya resurslaridan oqilona foydalanib, metall va mahsuldor eritmalarni qazib chiqarish bo‘yicha belgilangan reja topshiriqlarini ortig‘i bilan bajarib kelmoqda. Erishilayotgan yutuqlarda ishni to‘g‘ri tashkil qilish, jamoani yagona maqsadlar yo‘lida safarbar eta olish qobiliyatiga ega Qahramon Sharipovning xizmatlari kattadir.

«Kon boshqarmaga, shu jumladan, bizning uchastkamizga oliy o‘quv yurtlari va kasb-hunar kollejlarini bitirgan yosh yigitlar ishga kelishmoqda. Ularda nazariy bilimlar etarli, biroq ish tajribasi yo‘q. SHuning uchun farzandlarimiz qatori bu yigitlarga talabchanlik bilan ish o‘rgatamiz, chidamli bo‘lish, har qanday vaziyatda qiyinchiliklardan qo‘rqmasdan dadil harakat qilish kerakligini tushuntiramiz. Shogirdning unib-o‘sishida ustozning o‘rni katta, deb o‘ylayman. Erishgan yutuqlarimda menga kasb sirlarini o‘rgatgan ustozlarim, sohaning etuk mutaxassislari Natalya Konstantinovna Kargina va Boris Borisovich SHishkinlarning xizmati bor va ulardan bir umr qarzdorman», – deydi Q.Sharipov.

Shu o‘rinda, ishlab chiqarish topshiriqlarini vijdonan bajarib, yoshlarga har tomonlama o‘rnak bo‘layotgan uchastka ishchi-xodimlari Nurali YoOrmamatov, Aleksey Biryulin, Radik Tashev, Dilshod Fayziev, Yusupbek Xodjaev, Farhod Xalilov, Bobojon Tulaev, Jo‘rabek Fayziev, Alimurod Yorov, Egor Bazanov, Rustam Kipchakbaev, Alibek Karaev, Muzaffar Tursunov, Nuriddin Shamuratov, Nail Mulyukov, Salim Aslonov, Ilhom Azizov, Salim Teshaevlarga minnatdorchilik bildirmoqchiman. Mehnat jamoamiz erishayotgan yutuqlarda ularning xizmatlari beqiyodir. Qaerdagi hamjihatlik, birdamlik bo‘lsa, ishlar o‘z-o‘zidan yurishib, yutuqlar bo‘y ko‘rsataveradi».

Ha, kamtarga kamol, degandek, Qahramon aka o‘z kamtarligi, bag‘rikengligi, mehnatkashligi tufayli jamoada obro‘ qozondi, katta-yu kichik orasida hurmat topdi. Turmush o‘rtog‘i Rohila opa bilan to‘rt qiz va bir o‘g‘ilni tarbiyalab voyaga etkazdi. Otasini eru ko‘kka ishonmaydigan mehribon qizlari Sevara, Sayyora, Surayyo va Muhayyolarning, xuddi o‘ziga o‘xshagan qat’iyatli o‘g‘li Murodjonning olam-olam orzulari bilan turmushi maroqli. Bir-biridan shirin nevaralari Aziza, Azizjon, Nursilalarning sho‘xliklari bilan hayoti zavqli. Biz Qahramon akani tobora yaqinlashib kelayotgan 50 yoshlik yubileylari bilan tabriklab, qalbingizdagi g‘ayrat-shijoat sira so‘nmasin, umringiz ziyoda, rizqingiz butun, martabangiz bundanda ulug‘ bo‘lsin, deymiz.

Ishlab chiqarishning qaynoq qozonida qaynab, hayotining kuch-quvvatga to‘la navqiron yillarini sahroni zabt etishga bag‘ishlagan jonkuyar mutaxassislardan yana biri – Geotexnologik quduqlarni qurish va ta’mirlash bo‘yicha ekspluatatsion uchastka boshlig‘i Ikrom Parmonovdir. U mazkur geotexnologik konga burg‘ilash mashinisti yordamchisi bo‘lib ishga kelganiga 22 yil bo‘ldi. Bu orada qancha suvlar oqib ketdi, bu dargohga kimlar kelib, kimlar ketmadi. Biroq, o‘z ahdida qat’iy Ikrom tanlagan yo‘lidan qaytmadi. O‘qidi, izlandi, bilmaganlarini so‘rab o‘rgandi. Burg‘ilash uskunasi mashinistlari brigadiri, Aleksandr Nikolaevich Roppeldan nafaqat kasb sirlaridan, balki tartib-intizomdan ham dars oldi. U ishlab chiqarishdan ajralmagan holda, dastlab Toshkent geologiya qidiruv texnikumini, keyinchalik Rossiya davlat geologiya-qidiruv universitetini bitirdi. «Foydali qazilmalarni qazib olish texnikasi va texnologiyasi» mutaxassisligiga ega bo‘ldi.

Mehnat faoliyatini oddiy mashinist yordamchisi vazifasidan boshlagan Ikrom keyinchalik mashinist, kon ustasi, uchastka mexanigi, uchastka boshlig‘i o‘rinbosari va nihoyat, uchastka boshlig‘i darajasigacha ko‘tarildi. Ayni paytda u 11 ta brigadadan iborat 145 kishilik jamoaga etakchilik qilib kelmoqda. Uchastka jamoasi reja topshiriqlarini ortig‘i bilan bajarib, kon boshqarma rivojiga o‘z his¬sasini qo‘shmoqda. Ikrom Parmonov mehnat jamoasidagi Saurbek Djalgasbekov, Barnoqul Eshnazarov, Nodir Elibaev, Shavkat Normurodov, Matyoqub Botirovlarning fidokorona mehnatlarini alohida ta’kidladi.

Ikrom Parmonov shu yilning mart oyida NKMK boshqarmasi Uran, nodir va kamyob-er metallarini ish¬lab chiqarish bo‘y¬icha texnologik bo‘¬limning burg‘ilash ishlari etakchi muhandisi Yakub Kosbaevich Djalgasbekov hamrohligida Xitoyning Tyanjin shahridagi mashinasozlik zavodida xizmat safarida bo‘ldi. Xitoy davlatidan sotib olingan SPT – 600 E rusumli burg‘ilash uskunasi xarakteristikasi va ishlash prinsiplarini o‘rganib kelish maqsadida tashkil qilingan bu xizmat safaridan mutaxassislarimiz katta taassurotlar bilan qaytishdi.

1971 yilda Navbahor tumanining Qorajon qishlog‘ida tug‘ilgan Ikrom «5- kon boshqarma mening tengdoshim», deb faxrlanib yuradi. SHundanmi, kon boshqarma jamoasining quvonchu tashvishlariga o‘zini daxldor, deb biladi. Ishxonasini asosiy uyi, deydigan Ikromning ishga kelishining vaqti bor, ammo ketishining vaqti yo‘q. Ishlab chiqarish topshirig‘ini ko‘ngildagidek bajarmaguncha hech qaerga shoshmaydi. Yurakdan mehnat qiladi, boshqalardan ham shuni talab qiladi. Etti farzandni tarbiyalab voyaga etkazgan ota-onalari – mehnatkash inson Xudoyberdi aka va Maxfiratxon ayalar insonni faqat mehnati ulug‘lashini farzandlariga shaxsiy namuna qilib ko‘rsatganlari bor. Bugun Ikrom ham o‘z farzandlariga inson mehnatdan to‘xtasa, rivojlanishdan to‘xtashini uqtirib kelmoqda. Ot izini toy bosadi, deganlaridek, Ikromning katta farzandi Ilhom Navoiy konchilik kollejini tamomlab otasining qanotiga kirdi, u hozir mazkur bo‘limda apparatchi vazifasida ishlayapti. Kichik farzandi Adham esa hali maktab o‘quvchisi, u ham hademay, otasi va akasi yo‘lidan ketishi tabiiy. Turmush o‘rtog‘i, pedagog Lolaxon bilan farzandlari kamolini ko‘rishdek yaxshi niyatlari bor.

O‘zbekiston Respublikasi konchilik va metallurgiya sanoati xodimlari kuni arafasida 5-kon boshqarma 2-geotexnologik konning «Janubiy Bukinay» konida 6-mahalliy sorbsion uskuna ishga tushirildi. Mazkur qurilma metall qazib olish bo‘yicha asosiy ko‘rsatkichlarni so‘zsiz bajarishga imkoniyat yaratib, ishchi-xodimlarning ertangi kunga bo‘lgan ishonchini mustahkamlaydi. Nafaqat kon boshqarma, balki kombinat istiqboli uchun ham muhim sanalgan ushbu ob’ektning ishga tushirilishida albatta, Qahramon Sharipov va Ikrom Parmonov kabi fidoyilar rahbarlik qilayotgan uchastkalar ishchi-xodimlarining ham xizmatlari beqiyosdir.

Geotexnologik kon muhandisi Otabek Ro‘ziev Qahramon Sharipov va Ikrom Parmonovlar haqida samimiy fikrlar bildirdi: «Nafaqat o‘z ishini, balki o‘z qadr-qimmatini biladigan bunday insonlar bilan ishlash biz uchun maroqli. Ular ishlab chiqarish unumdorligini oshirish, mahsulot tannarxini kamaytirish, kimyoviy reagentlar va elektr energiyadan oqilona foydalanish yuzasidan tinmay izlanadilar, asosli takliflar bilan chiqadilar. Ishlab chiqarishda ro‘y beradigan favqulodda vaziyatlarda to‘g‘ri ish tutib, kamchilik¬larni zudlik bilan bartaraf qilish yo‘llarini biladilar. Shuning uchun ular boshqarayotgan uchastkalar ishidan hamisha ko‘nglimiz to‘q. Mehnati bilan yaxshi nom qozonib yashayotgan bu insonlarga havas qilsang arziydi».

Otabekning so‘zlarini eshitib, Tohir Malikning «Odamiylik mulki» kitobida yaxshi nom haqida o‘qiganlarim yodimga keldi: «Yaxshi nomni mehnat bilan orttirish kerak. Yaxshi nom chiroyli so‘zlar uchun, va’dalar uchun berilmaydi. Balki mehnat natijasi uchun, mehnatga astoydil qo‘yilgan mehr uchun beriladi».

Salima XOLDOROVA.

Jo‘rayev Abdumajid Irisovich

Matbuot markazi boshlig‘i – NKMK bosh direktorining matbuot kotibi – axborot siyosati masalalari bo‘yicha maslahatchisi.

+ (998 79) 2277-473

Sadriddinov Nizomiddin Xayriddinovich

“Konchilar hayoti” gazetasi muharriri.

+ (998 79) 2277-464

Biz bilan bog'lanish

  • Umumiy bo‘limi (devonxona): 0(436) 227-71-64, +998 79 227-71-64
  • Ishonch telefoni: 0(436) 227-72-22, +998 79 227-72-22

    Mualliflik huquqi © NKMK, 2015. Barcha huquqlar himoyalangan.   

Axborotdan foydalanish shartlari

Siz bu yerdasiz: Bosh sahifa 11.06.2015 dan №11 nashr OFTOBNI ELKALAGAN ODAMLAR