Система Orphus

Shriftning o'lchamini

Qarama-qarshilik

        
Siz bu yerdasiz: Bosh sahifa Выпуск №11 от 14.06.2018 MUROJAAT ORTIDA – INSON BOR

MUROJAAT ORTIDA – INSON BOR

Mamlakatimiz ijtimoiy hayotining barcha jabhalarida shiddatli jarayonlar kechmoqda. Ularning zamirida turli sohalarda yillar davomida to‘planib qolgan muammolarni hal etish, xalqimizga munosib turmush tarzini yaratish, odamlarning hayotdan rozi bo‘lib yashashlarini ta’minlashdek ezgu maqsadlar mujassamlashgan. Muhtaram Prezidentimiz Shavkat Miromonovich Mirziyoyev rahnamoligida shunday insonparvarlik siyosati ilgari surilmoqda. Uning samarasi o‘laroq “Odamlar davlat idoralariga emas, davlat idoralari odamlarga xizmat qilishi kerak” degan g‘oya hayotga joriy etilib, ro‘yobga chiqarilmoqda. Bugun barcha darajadagi rahbarlar amaliy faoliyati shu mezon bilan baholanayapti. Davr talabidan kelib chiqib, odamlarni qiynayotgan masalalarni o‘rganish va bartaraf etish tizimi takomillashtirilmoqda. O‘zbekiston Respublikasi Prezidentining Virtual qabulxonasi, joylarda Xalq qabulxonalari tashkil etildi. So‘nggi ikki yilda aholining murojaatlari bilan ishlash borasida o‘n yilliklarga tatigulik ishlar amalga oshirilganligini yurtdoshlarimiz minnatdorlik bilan e’tirof etishmoqda.

Navoiy kon-metallurgiya kombinatida bu muhim masalaga alohida e’tibor berilmoqda. Yaqinda kombinat bo‘linmalari rahbarlarining umumiy va kadrlar masalalari bo‘yicha o‘rinbosarlari, Tibbiy-sanitariya qismlari boshliqlari, bo‘linmalar mehnatni tashkillashtirish va ish haqi, jismoniy va yuridik shaxslarning murojaatlari bilan ishlash bo‘limlari boshliqlari va mas’ul xodimlari ishtirokida boshqarma majlislar zalida bo‘lib o‘tgan seminar jismoniy va yuridik shaxslarning murojaatlari bilan ishlash natijadorligini oshirish mavzusiga bag‘ishlandi. Seminarda Jismoniy va yuridik shaxslarning murojaatlari bilan ishlashni nazorat qilish va muvofiqlashtirish bo‘limi boshlig‘i – NKMK “Virtual qabulxonasi” rahbari Sh.Idiev 2018 yil 10 may holatiga jismoniy va yuridik shaxslarning NKMK rahbariyati nomiga kelib tushgan murojaatlarini ko‘rib chiqish natijalari to‘g‘risida axborot berdi. Joriy yilning 10 mayigacha kombinat rahbariyatiga yozma, og‘zaki va elektron tarzda jami 1 232 ta murojaat bo‘lgan. O‘zbekiston Respublikasi Prezidentining Virtual qabulxonasi orqali kelib tushgan 615 ta murojaatning 65,6 foizi mehnat va bandlik, ish bilan ta’minlash, ishga tiklash va ish haqi bilan bog‘liq ekanligi bu masalalarning naqadar o‘tkirligini ko‘rsatib turibdi. Murojaatlarning 129 tasi ijobiy hal qilingan. Yig‘ilish ishtirokchilariga Prezidentning Virtual qabulxonasi orqali kelib tushayotgan har bir murojaatga alohida e’tibor bilan yondashib, ijobiy hal etish choralarini ko‘rish yuzasidan topshiriqlar berildi. Ba’zi murojaatlar chuqur o‘rganilmasdan muallifga javob xati berilayotganligi aytib o‘tildi. Kombinat ishchi-xodimlari bevosita joylarda hal etilishi mumkin bo‘lgan masalalarning yechimini izlab yuqori tashkilotlarga murojaat qilish hollari mavjud. Har bir rahbar va mas’ul xodim jismoniy va yuridik shaxslarning murojaatlarini ko‘rib chiqishda mas’uliyatni oshirishi, xalq bilan ochiq muloqot qilishi, sayyor qabullar o‘tkazishi va masalani joyida hal qilish chorasini ko‘rishi lozim.

Seminarda NKMK boshqarmasi mehnat va ish haqini tashkil etish bo‘limi boshlig‘i B.Tursunov ishtirokchilarni Shimoliy kon boshqarmasiga qarashli 2-Tibbiy-sanitariya qismi tibbiyot hamshirasi G.Do‘stovaning 2-TSQ rahbariyati tomonidan buzilgan mehnat huquqlarini tiklash to‘g‘risidagi murojaatida keltirilgan vajlarni o‘rganish natijalari yuzasidan tuzilgan ma’lumotnoma bilan tanishtirdi. NKMK rahbariyatining farmoyi¬shiga muvofiq kombinat Tibbiy-sanitariya bo‘limi rahbariyati hamda mutasaddi mutaxassislaridan tuzilgan Ishchi guruhi murojaatni chuqur o‘rgandi. 2-Tibbiy-sanitariya qismi shtat jadvallari ishlab chiqilganda “O‘zbekiston Respublikasi Sog‘liqni saqlash vazirligining tibbiyot muassasalari xodimlarining shtat me’yorlari” talablariga rioya qilinmasdan ularga asossiz ravishda o‘zgartirishlar kiritilgan. Komissiya xulosalari asosida ShKB rahbariyatining 2017 yil 21 iyundagi “2-sonli Tibbiy-sanitariya qismining shtat jadvallariga o‘zgartirish kiritish to‘g‘risida”gi 910-sonli buyrug‘i bekor qilindi. “Jismoniy va yuridik shaxslarning murojaatlari to‘g‘risida”gi O‘zbekiston Respublikasi Qonuni va O‘zbekiston Respub¬likasi Mehnat qonunchiligining me’yoriy hujjatlariga rioya qilinmaganligi sababli ShKB hamda 2-TSQning tegishli mansabdor shaxslariga intizomiy choralar qo‘llanildi. Eng muhimi, adolat qaror topdi va tibbiyot hamshirasi G.Do‘stovaning qonuniy huquqlari tiklandi.

NKMK TSB reja-iqtisod bo‘limi boshlig‘i Sh.Begmatova Tibbiyot xodimlarining me’yoriy soniga rioya qilish va shtat jadvallarini ishlab chiqish mavzusidagi ma’ruzasida seminar qatnashchilari e’tiborini Tibbiy-sanitariya qismlarida 2018 yilning 1 iyuligacha “O‘zbekiston Respublikasi Sog‘liqni saqlash vazirligining tibbiyot muassasalari xodimlarining shtat me’yorlari”ga rioya qilgan holda shtat jadvallarini ishlab chiqish va kombinat boshqarmasi hamda Tibbiy-sanitariya bo‘limining tegishli bo‘limlari bilan kelishilishi lozimligiga qaratdi. Seminarda kun tartibidagi masalalar muhokamasida so‘zga chiqqanlar jismoniy va yuridik shaxslarning murojaatlari bilan ishlashni tubdan yaxshilash yuzasidan fikr-mulohazalarini bildirdilar. Jumladan, Markaziy kon boshqarmasi direktorining umumiy masalalar va kadrlar bo‘yicha o‘rinbosari A.Hamidov murojaatlar bilan ishlashda yo‘l qo‘yilayotgan kamchiliklarni bartaraf etish uchun bunday oshkora muloqot, tahliliy va tanqidiy ruhdagi seminarlarni joylarda ham o‘tkazish taklifini kiritdi. Seminarda jismoniy va yuridik shaxslarning murojaatlarini ko‘rib chiqish samaradorligini yanada oshirish bo‘yicha zarur vazifalar belgilab olindi.

Murojaatlar bilan ishlash haqida so‘z borayotgan ekan, kombinatda odamlarga qulaylik yaratish maqsadida jismoniy va yuridik shaxslarni shaxsiy masalalar bo‘yicha qabul qilish Ishchi guruhi tuzilganligi va guruh NKMK bosh direktori tasdiqlagan jadval asosida bo‘linmalarda sayyor qabullarni o‘tkazayotganligini ta’kidlash lozim. Navoiy kon-metallurgiya kombinati bosh direktorining umumiy masalalar va kadrlar bo‘yicha o‘rinbosari I.Rahmatov, Kadrlar boshqarmasi boshlig‘i F.Hoshimov, Jismoniy va yuridik shaxslarning murojaatlari bilan ishlashni nazorat qilish va muvofiqlashtirish bo‘limi boshlig‘i –  NKMK “Virtual qabulxonasi” rahbari Sh.Idiev, yuridik bo‘lim boshlig‘i T.Demuralardan tarkib topgan Ishchi guruhi Markaziy, Janubiy, Shimoliy kon boshqarmalari, Zarafshon qurilish boshqarmasida sayyor qabullarni o‘tkazdi. Qabul¬larda murojaatlarning bir qismi hal qilindi, ba’zi masalalar yuzasidan esa murojaatchilarga tegishli huquqiy maslahatlar berildi.

Har bir murojaat ortida inson taqdiri, uning muammolari, orzu-istaklari yotibdi. Shunday ekan, odamlarning murojaatlarida ko‘tarilayotgan dardu tashvishlarini yurakdan his etish va ularni hal qilishga shu nuqtai-nazar bilan yondashish har bir rahbarning burchidir. Zero, muhtaram Prezidentimiz Sh.M.Mirziyoyevning “Biz xalqimizni ertangi kunimizga ishontirishimiz, inontirishimiz kerak”, deya kuyinchaklik bilan qayta-qayta aytayotgan so‘zlari, da’vatlari ham shuni taqozo etadi. Odamlarni ishontirish esa ularga g‘amxo‘rlik ko‘rsatish, dardu tashvishlariga sherik bo‘lishdan, demakki, murojaatlariga jiddiy e’tibordan boshlanadi.

Nizomiddin SADRIDDINOV.

 

Biz bilan bog'lanish

  • Umumiy bo‘limi (devonxona): 0(436) 227-71-64, +998 79 227-71-64
  • Ishonch telefoni: 0(436) 227-72-22, +998 79 227-72-22

    Mualliflik huquqi © NKMK, 2015. Barcha huquqlar himoyalangan.   

Axborotdan foydalanish shartlari

Siz bu yerdasiz: Bosh sahifa Выпуск №11 от 14.06.2018 MUROJAAT ORTIDA – INSON BOR