Система Orphus

Shriftning o'lchamini

Qarama-qarshilik

        
Siz bu yerdasiz: Bosh sahifa Выпуск №11 от 14.06.2018 TURMUSH FAROVONLIGINI OSHIRISH – BOSH VAZIFA

TURMUSH FAROVONLIGINI OSHIRISH – BOSH VAZIFA

Muhtaram Prezidentimiz Sh.M.Mirziyoyev rahnamoligida mamlakatimizda amalga oshirilayotgan keng ko‘lamli islohotlar nihoyatda dolzarbligi, izchilligi hamda yurtdoshlarimiz hayotining barcha jabhalariga daxldorligi bilan alohida ahamiyat va mazmundorlik kasb etayapti. Islohotlardan ko‘zlangan eng asosiy maqsad xalqimiz turmush tarzini yaxshilash, farovonligini oshirish, ya’ni hayotidan rozi bo‘lib yashashini ta’minlashga erishishdir.

Respublikamizning yirik sanoat korxonasi hisoblangan Navoiy kon-metallurgiya kombinati O‘zbekiston iqtisodiyotini rivojlantirishga ulkan hissa qo‘shish barobarida o‘zining ko‘pming kishilik jamoasi misolida islohotlarni ro‘yobga chiqarishda faol ishtirok etmoqda. Ishlab chiqarish jarayonlarida vujudga kelayotgan murakkabliklarga qaramasdan kombinatda mamlakat rahbariyatining qo‘llab-quvvatlashi, jamoaning fidokorona mehnati tufayli har yili asosiy ishlab chiqarish ko‘rsatkichlari bajarilishi ta’minlanmoqda va korxona ishchi-xizmatchilari turmush darajasini muttasil oshira borish uchun zarur mablag‘ni qidirib topishga muvaffaq bo‘linayapti. 2017 yilda kombinatda tovar mahsulot ishlab chiqarish rejasi oshirib bajarildi. Boshqacha aytganda, 2017 yilda 2016 yildagidan 48,7 milliard so‘mlik ko‘proq tovar mahsulot ishlab chiqarildi. Mahsulot tannarxi 257,6 milliard so‘mga kamaydi, 357,1 milliard so‘m sof foyda olindi. 

2018 yilning birinchi choragida ulkan korxonamizda o‘tgan yilning shu davridagiga taqqoslaganda tovar ishlab chiqarish hajmi 9,3 milliard so‘mga oshdi. Joriy yilning birinchi choragida asosiy texnik-iqtisodiy ko‘rsatkichlar uddalandi. Mahsulot ishlab chiqarish tannarxi 97,4 milliard so‘mga arzonlashdi. Moliya-xo‘jalik faoliyatining uch oylik yakuniga ko‘ra 216,1 milliard so‘m sof foyda olindi. Ahil jamoa jasoratli mehnatining samarasi bo‘lgan bu raqamlarni bejizga keltirayotganim yo‘q. Olingan sof foyda ishlab chiqarishni modernizatsiyalash va texnik jihatdan qayta jihozlantirish, kombinat mehnat ahli ish haqlarini oshirish, ishchi-xizmatchilar va ularning oila a’zolari maishiy sharoitlarini yaxshilash, madaniy-ma’rifiy, sport-sog‘lomlashtirish tadbirlarini tashkil etish, respublika mintaqalarida shunday tadbirlarni amalga oshirishda homiylik yordamlari ko‘rsatishga imkon berishini ta’kidlamoqchiman. Bu hol kombinat mehnat jamoasining shu yil bo‘lib o‘tgan kasaba uyushma konferensiyasida qabul qilingan 2018-2020 yillarga mo‘ljallangan Jamoa shartnomasiga kiritilgan qator o‘zgartirish va ko‘shimchalarda o‘z ifodasini topdi. Kombinat ish haqi fondidan madaniyat va sport sohasi xodimlarini saqlash hamda ommaviy-madaniy, ommaviy-sport tadbirlarini o‘tkazish va ijtimoiy masalalarni hal etish uchun ajratiladigan foiz miqdorini 1 foizgacha oshirishga qaror qilindi. Bu, shu maqsadlarga 2 milliard so‘mdan ortiqroq qo‘shimcha mablag‘ demakdir. 

“Zarafshon” pansionati va “To‘dako‘l” dam olish zonasiga yo‘llanmalar ishchi-xizmatchilar va ishlamaydigan pensionerlar uchun yo‘llanma to‘liq narxining 30 foizidan 25 foiziga, ishchi-xizmatchilarning oila a’zolari, shuningdek, ishlamaydigan pensionerlarga 40 foizidan 35 foizigacha kamaytirildi. 

Yalta va Kislovodsk shaharlaridagi sanatoriylarga yo‘llanma  uchun to‘lov kombinat xodimlariga yo‘llanma narxining 30 foizigacha, oila a’zolariga 50 foizigacha kamaytirildi. Bunda kombinat xodimlari uchun sanatoriyga borish yoki kelish chiptalari korxona hisobidan to‘lab beriladi. Zarafshon qurilish boshqarmasi Navoiy kon-metallurgiya kombinatining yosh mutaxassislariga yordam to‘lovlar to‘lab beriladigan asosiy bo‘linmalari ro‘yxatiga kiritildi.

Prezidentimiz Sh.M.Mirziyoyevning dono tashqi siyosati tufayli Qirg‘i-ziston Respublikasi bilan¬ siyosiy, iqtisodiy, madaniy va boshqa sohalarda o‘zaro hurmat, yaxshi qo‘shnichilik munosabatlari qaror topayapti.

NKMK ko‘p sonli mehnatkash¬larining talab, taklif va istaklarini hisobga olib, kombinat bilan “Issiqko‘l” sanatoriysi o‘rtasida 2018 yilning iyun oyidan boshlab, joriy yil uchun 200 ta yo‘llanma olish yuzasidan shartnoma imzolandi. Go‘zal tabiat qo‘ynida joylashgan va odamlar salomatligini mustahkamlashga xizmat qiladigan mazkur shifo maskaniga yo‘llanma oxirgi marta bundan o‘n yildan ko‘proq vaqt ilgari olingan. Dunyoning eng nufuzli dam olish maskanlaridan qolishmaydigan bu sanatoriyga yo‘llanma narxi nisbatan arzonligi, korxonamiz ishchi-xizmatchilari uchun hamyonbopligini ham aytib o‘tish joiz. Mehnatkashlarni ijtimoiy himoyalashni ko‘zlab “Issiqko‘l” sanatoriysiga yo‘llanma kombinat ishchi-xodimlari uchun yo‘llanma to‘liq narxining 30 foizi, oila a’zolari uchun esa yarmi miqdorida belgilandi. 

Prezidentimizning 2018 yilning mart oyida Navoiy viloyatiga qilgan tashrifi davomida bergan topshiriqlariga muvofiq kombinatning Uchquduq, Zarafshon, Nurobod, Navoiy, Marjonbuloq shaharlaridagi 653 ta uy-joy binolarini to‘la ta’mirlash yuzasidan 50 milliard so‘mdan ko‘proq mablag‘ sarflanishi ko‘zda tutilgan maqsadli dastur amalga oshirilayapti.

Yosh avlodni har tomonlama barkamol insonlar qilib tarbiyalashdek olijanob ishga hamisha daxldor bo‘lish kombinat jamoasining qalb amri, asosiy vazifalaridan biri bo‘lgan va shunday bo‘lib qolaveradi. Joriy yilda kombinat hisobidan Zarafshon shahridagi “Shodlik” mehribonlik uyi tarbiyalanuvchilari uchun Bolalar shaharchasi barpo etiladi. Darvoqe, Prezidentimizning viloyatimizga tashrifi chog‘ida shunday xayrli ishni amalga oshirish haqida so‘z borgandi. Shaharchada mehribonlik uyi tarbiyalanuvchilari o‘zlarini oilasi quchog‘ida his qilishi uchun barcha zarur shart-sharoitlar muhayyo etiladi. Kottej-hovli tipidagi yangi zamonaviy uylar qurilib, tarbiyalanuvchilar ixtiyoriga beriladi. Ana shu uylarda istiqomat qiladigan bolalarga mehribon tarbiyachilar parvona bo‘lishadi.

Jizzax viloyatining Zomin tumanida 150 o‘rinli sanatoriy foydalanishga topshiriladi. Uchquduq shahridagi “Konchi” profilaktoriysi to‘la ta’mirlanadi. Samarqand viloyatining Urgut tumanidagi 300 o‘rinli “Kelajak” bolalar sog‘lomlashtirish oromgohi qabul qilinib va mukammal ta’mirdan chiqarilib, foydalanishga topshirildi. Ayni paytda bu yerda kombinat ishchi-xizmatchilarining farzandlari miriqib hordiq chiqarmoqdalar.

Kombinatda mehnat qilayotgan turli kasb egalariga uy olishi, maishiy sharoitlarini yaxshilashi uchun Ijtimoiy qo‘llab-quvvatlash jamg‘armasidan 2013-2017 yillarda jami 31,2 milliard so‘m, birgina 2018 yilning o‘tgan davrida 7,5 milliard so‘mdan ortiqroq ssuda berildi. Navoiy viloyati va res-publikaning boshqa mintaqalari ijtimoiy-iqtisodiy sharoitlarini yaxshilashga qaratilgan tadbirlar uchun 50 milliard so‘mdan ziyod homiylik yordami ko‘rsatildi.

Kombinatimizning shonli 60 yillik yubileyiga hozirlik ko‘rayapmiz. Qutlug‘ sana arafasida kombinat shuhratini oshirish yo‘lida zahmatli mehnat qilayotgan insonlarning turmush farovonligini oshirish kombinat rahbariyatining doimiy e’tiborida. Kombinat bosh direktorining 2018 yilning 31 may kuni imzolangan “NKMK xodimlarining ish haqlarini oshirish haqida”gi buyrug‘i shu e’tibor va g‘amxo‘rlikning yana bir namunasi bo‘ldi. Mazkur buyruqqa muvofiq 1 iyundan e’tiboran korxona sanoat ishlab chiqarishida band bo‘lgan ishchi-xizmatchilar, muhandis-texnik xodimlarining ish haqi o‘rtacha 15 foiz, kapital qurilish va ishlab chiqarishga bevosita bog‘liq bo‘lmagan tarmoqlar xodimlariniki esa 20 foizga oshirildi. Ish haqlarini oshirish masalasiga 2017 yilda bo‘lganidek, mehnat ahlining ijtimoiy himoyaga muhtoj qatlamlari ko‘proq qo‘llab-quvvatlanganligi juda muhimdir. Ish haqlari sanoat va kapital qurilish tarmoqlarida differensial tarzda, aniqrog‘i sanoatda ishchilarniki 17 foizdan 15 foizgacha, xodimlar va mutaxassislarniki 15 foizdan 13 foizgacha, rahbarlarniki 13 foizdan 11 foizgacha; kapital qurilishda ishchilarniki 22 foizdan 21 foizgacha, mutaxassislarniki 21 foizdan 19 foizgacha, rahbarlarniki 19 foizdan 17 foizgacha oshiriladigan bo‘ldi. Ish haqlarini ko‘paytirish bilan bog‘liq barcha qo‘shimcha xarajatlar kombinatning o‘z mablag‘lari, aynan mahsulot tannarxini arzonlashtirish va ishlab chiqarish samaradorligini oshirish hisobidan amalga oshirildi. Mamlakatimizda “Faol tadbirkorlik, innovatsion g‘oyalar va texnologiyalarni qo‘llab-quvvatlash yili” deb e’lon qilingan 2018 yilda NKMKda innovatsion ishlanmalarni qo‘llanish bilan ishlab chiqarish samaradorligini oshirishga erishilmoqda.

Muhtaram Prezidentimiz Sh.M.Mirziyoyev tomonidan Navoiy kon-metallurgiya kombinatini rivojlantirishning 2026 yilgacha bo‘lgan davrga mo‘ljallangan dasturida 27 ta investitsion loyihani amalga oshirish belgilab berilgan. Yaqin kelgusida bajarilishi lozim bo‘lgan mas’uliyatli vazifalar zamirida davlatimiz Rahbarining kombinat jamoasiga bo‘lgan yuksak ishonchi ham mujassamlashgan. Yurtboshimiz ishonchini oqlash esa korxonamiz mehnat ahli uchun sharafli ishdir. Ayni paytda kombinat ishchi-xizmatchilari istiqbol rejalarini ro‘yobga chiqarish yo‘lida fidokorona mehnat qilmoqdalar. Dasturda “Auminzo-Amantoy” koni bazasida 5-gidrometallurgiya zavodini barpo etish mo‘ljallangan. Hozirgi kunda bu yerda ana shu maqsadda qurilish jadal sur’atda olib borilmoqda. Dastur doirasida 2-gidrometallurgiya zavodi qayta ishlash quvvatlarini kengaytirish, Oltinni uyumda tanlab eritmaga o‘tkazish sexi konida texnogen chiqindilarni qayta ishlash kompleksini bunyod etish, “Muruntov” koni 5-navbatini ishga tushirish, 3-gidrometallurgiya zavodida “Ko‘kpatas” va “Dovgiztov” konlarining ishlanishi qiyin bo‘lgan rudalaridan oltin ajratib olish texnologiyasini takomillashtirish kabi muhim investitsion loyihalar ham amalga oshirilmoqda.

Bugungi kunda kombinatimizning yetakchi mutaxassislari, muhandis-texnik xodimlari Prezidentimiz olib borayotgan izchil oqilona siyosatni teran anglab etmoqdalar. Zamon talabi asosida ularning ongu shuurida ijobiy o‘zgarishlar ro‘y bermoqda va o‘z vazifalariga yuksak mas’uliyat bilan, davlat va jamiyat, pirovardida xalq manfaatlari nuqtai-nazaridan yondashmoqdalar. Bu hol ishda yaxshi samaralar berishiga shubha yo‘q.

Ishlab chiqarishni yanada rivojlantirish, iqtisodiy tejamkorlikni ta’minlash, rejalarning bajarilishiga arzigulik ulush qo‘shish kombinat har bir xodimining muqaddas burchidir. NKMK mehnatkashlari ularning turmush sharoitlarini yaxshilash yo‘lida ko‘rsatilayotgan g‘amxo‘rliklarga amaliy ishlari bilan javob beradilar, deb ishonaman.

Nurmat JO‘LIBEKOV,

Navoiy kon-metallurgiya kombinati bosh direktorining

iqtisod masalalari bo‘yicha o‘rinbosari.

 

Biz bilan bog'lanish

  • Umumiy bo‘limi (devonxona): 0(436) 227-71-64, +998 79 227-71-64
  • Ishonch telefoni: 0(436) 227-72-22, +998 79 227-72-22

    Mualliflik huquqi © NKMK, 2015. Barcha huquqlar himoyalangan.   

Axborotdan foydalanish shartlari

Siz bu yerdasiz: Bosh sahifa Выпуск №11 от 14.06.2018 TURMUSH FAROVONLIGINI OSHIRISH – BOSH VAZIFA