Система Orphus

Shriftning o'lchamini

Qarama-qarshilik

        
Siz bu yerdasiz: Bosh sahifa Выпуск №12 от 22.06.2017 DOLZARB MAVZU — OLIMLAR MUHOKAMASIDA

DOLZARB MAVZU — OLIMLAR MUHOKAMASIDA

12-13 iyun kunlari Navoiy davlat konchilik institutida O‘zbekiston Respublikasi Oliy va o‘rta maxsus ta’lim vazirligi, Navoiy kon-metallurgiya kombinati, O‘zbekiston Respublikasi Fan va texnologiyalar agentligi va Navoiy davlat konchilik instituti hamkorligida «Kon-metallurgiya majmuasi: yutuqlar, muammolar va rivojlantirishning istiqbollari» mavzusida IX – xalqaro ilmiy-texnik anjuman o‘tkazildi. Anjumanda O‘zbekiston Respublikasi Fanlar akademiyasining prezidenti vazifasini vaqtinchalik bajaruvchi Baxtiyor Ibragimov, akademiklar Nodirbek Yusupbekov, Habibulla Akbarov, Nusrat Parpiev, Saidahror To‘xtaev va sohaning boshqa ko‘plab taniqli olimlari ishtirok etgani uning nufuzi yuksak, mavzusi naqadar muhim va dolzarbligini ko‘rsatib turibdi. Anjumanning 12 iyun kuni bo‘lib o‘tgan yalpi majlisi Navoiy kon-metallurgiya kombinati bosh direktori, Navoiy davlat konchilik instituti rektori, texnika fanlari doktori, professor Q.Sanaqulovning anjuman qatnashchilariga tabrigi bilan boshlandi. Notiq ta’kidlaganidek, anjumanni o‘tkazishdan maqsad respublikamizda kon-metallurgiya majmuasini rivojlantirish, sohaning ilmiy-texnik salohiyatini oshirish, xorijiy davlatlar olimlari va mutaxassislari bilan hamkorlikni yanada kengaytirish, fundamental va amaliy tadqiqotlar, yangi innovatsion ishlanmalar borasidagi yutuqlar, fan va texnikaning dolzarb muammolarini muhokama qilish hamda hamkorlikdagi faoliyat doirasida ustuvor yo‘nalishlar va vazifalarni belgilab olishdir. Anjuman xalqaro integratsiya aloqalarini mutahkamlashda yangi bosqich bo‘ladi. Navoiy davlat konchilik instituti kon-metallurgiya sohasida oliy va o‘rta maxsus ta’limning eng yaxshi an’analari va tan olingan ilmiy yo‘nalishlar, maktablarni o‘zida to‘la mujassam etgan. Markaziy Osiyoda yagona konchilik oliygohi hisoblangan institutni tamomlagan ko‘plab etuk mutaxassislar ishlab chiqarishning turli sohalarida muvaffaqiyatli faoliyat ko‘rsatishayapti. Institut kon-metallurgiya va texnika-iqtisodiyot yo‘nalishlari bo‘yicha kadrlar tayyorlaydigan oliy o‘quv yurti bo‘libgina qolmasdan, balki ta’lim, fan va ishlab chiqarishni integratsiyalashtirish hamda yirik ilmiy-tadqiqot maskani hamdir. Xalqaro anjumanda qator ilmiy yo‘nalishlar bo‘yicha erishilgan yutuqlar, muammolar va istiqboldagi amaliy loyihalar, innovatsion ishlanmalar chuqur muhokama etilgani buning isboti bo‘la oladi. Anjumanda O‘zbekiston Respublikasi Fanlar akademiyasining akademigi, texnika fanlari doktori, professor Nodirbek YUsupbekovning «Ishlab chiqarishni avtomatlashtirish va boshqarish tizimini rivojlantirish», Qozog‘iston Respublikasi Jubanov nomidagi Aktyubinsk mintaqaviy davlat universiteti professori, texnika fanlari doktori Serik Kulniyazning «Chuqur konlarni o‘zlashtirishda siklli-oqimli texnologiyalardan foydalanishning qulay muddatlari», O‘zbekiston Milliy universiteti professori, kimyo fanlari doktori Rashid Qulmatovning «Navoiy viloyatida suv va er resurslarini muhofaza qilish hamda barqaror foydalanish muammolari», O‘zbekiston Respublikasi Fanlar akademiyasining Umumiy va noorganik moddalar kimyosi instituti laboratoriya mudiri, texnika fanlari doktori, professor SHafoat Namozovning «O‘zbekistonda modifikatsiyalangan ammiak selitrasi va samarali fosfor o‘g‘itlar ishlab chiqarishning hozirgi ahvoli va istiqbollari» mavzudagi ma’ruzalari tinglandi. SHundan so‘ng anjuman o‘z ishini «Foydali qazilmalarni qazib olish hamda qayta ishlashning zamonaviy, an’anaviy va noan’anaviy texnologiyalari», «Metallurgiya va mineral xomashyolarni boyitish hamda qayta ishlashning ilg‘or texnologiyalari», «Kon-metallurgiya ishlab chiqarishini modernizatsiyalashda menejment, ekologiya muammolari va iqtisodiyot», «Kimyo va kimyoviy texnologiyaning dolzarb muammolari», «Kon-metallurgiya ob’ektlari texnologik jarayonlarini avtomatlashtirish va modellashtirish», «Muqobil va qayta tiklanadigan energiya manbalari borasidagi innovatsiyalar» deb nomlangan sho‘‘balarda davom ettirdi. Tadbirning ikkinchi kuni ilmiy-texnik anjuman ishtirokchilari «Navoiy» erkin iqtisodiy zonada bo‘lishib, u erdagi korxonalarda amalga oshirilayotgan ishlar bilan yaqindan tanishdilar. Zamonaviy texnologiya va asbob-uskunalar bilan jihozlantirilgan bu korxonalarda O‘zbekistonda ishlab chiqarilayotgan avtomobillar uchun ehtiyoj qismlar va boshqa xaridorgir mahsulotlar tayyorlanayapti. Dasturlashtirilgan ishlab chiqarish jarayonlari, ishchi-xodimlarga yaratilgan shart-sharoitlar olimlarda zo‘r qiziqish va taassurot uyg‘otdi. Xalqaro ilmiy anjumanning yakunlovchi yalpi majlisi «Navoiy» erkin iqtisodiy zonasi direksiyasining majlislar zalida o‘tkazildi. Unda «O‘zbekenergo» aksionerlik jamiyati Ilmiy-texnik markazi professori, texnika fanlari doktori To‘lagan Kamalov «Kon-metallurgiya sanoatida energiya va resurslar sarfini iqtisod qiladigan elektromexanik tizimning hozirgi ahvoli va uni rivojlantirish istiqbollari» mavzusida ma’ruza qildi. Shu bilan IX xalqaro ilmiy-texnik anjuman o‘z ishini yakunladi. SHubha yo‘qki, mazkur anjumanda kon-metallurgiya sohasi istiqbollarini ko‘zlab ilgari surilgan ilmiy xulosalar, ishlanmalar, fikr-mulohazalar fan, ta’lim va ishlab chiqarish integratsiyasini kuchaytirish, ularni amaliyotda qo‘llash asnosida respublikamiz iqtisodini rivojlantirishga xizmat qiladi.

Nizomiddin SADRIDDINOV.

Biz bilan bog'lanish

  • Umumiy bo‘limi (devonxona): 0(436) 227-71-64, +998 79 227-71-64
  • Ishonch telefoni: 0(436) 227-72-22, +998 79 227-72-22

    Mualliflik huquqi © NKMK, 2015. Barcha huquqlar himoyalangan.   

Axborotdan foydalanish shartlari

Siz bu yerdasiz: Bosh sahifa Выпуск №12 от 22.06.2017 DOLZARB MAVZU — OLIMLAR MUHOKAMASIDA