Система Orphus

Shriftning o'lchamini

Qarama-qarshilik

        
Siz bu yerdasiz: Bosh sahifa Выпуск №12 от 22.06.2017 Zarafshonlik «Yaxshi xola»

Zarafshonlik «Yaxshi xola»

Xonaning bir burchagida nogironlar aravachasida nimjon oyoqlarini osiltirib o‘tirgan qizaloq unsiz yig‘lamoqda. Qaniydi yura olganda otasining oyoqlarini quchib, onasini kaltaklar zarbidan qutqarib qolgan, erga sirg‘alib tushgan ro‘molini boshiga o‘rab qo‘ygan bo‘lardi. Afsus, oyoqlari jonsiz... «Dadajon, onamni urmang», - degan ojiz nolishlari esa otasi qulog‘iga etib bormaydi. Shu payt to‘satdan eshik ochilib, xonaga barvasta «xola» vajohat bilan kirib keldi-da, uning joniga oro kirdi. U onasining sochlarini tortqilab, azoblayotgan otasini shiddat bilan elkasidan tortib o‘tqazdi va unga qattiq-qattiq tanbeh berdi. Otasi yuvosh tortganday bo‘ldi. Onaning ko‘z yoshlari tindi. Qizaloqning yuziga tabassum indi. «Yaxshi xola» o‘sha kunning ertasiga ham ularnikiga keldi. Qizaloqning peshonasidan o‘pib, shirinliklar bilan siyladi. Endi qizaloq bu «Yaxshi xola»ni har kuni kutadigan, sog‘inadigan bo‘ldi... Oilaviy mojarolarni aql-idrok bilan hal qilib, kemtik qalblarga yupanch ulashayotgan bu ayol Zarafshon shahridagi Alisher Navoiy nomli mahalla fuqarolar yig‘inining yarashtirish komissiyasi a’zosi Musallam Qurbonovadir. U kishini zarafshonliklar e’zozlab «Masha opa», - deb chaqirishadi. Musallam opa insonlar taqdiriga befarq qarab turolmaydi, bolalarning ko‘z yoshlariga chidolmaydi. Oilalardami, ko‘cha-ko‘ydami, jamoat joylaridami yuz beradigan ko‘ngilsizliklarni bartaraf qilish, etim-esirlar boshini silash, janjalli oilalarni yarashtirish, qariyalar holidan xabar olishni o‘zining burchi, deb biladi. Musallam Qurbonova ko‘p yillar Davlat bojxona tizimida xo‘jalik mudiri vazifasida sidqidildan faoliyat yuritdi. Hozirgi kunda Markaziy kon boshqarmasining Uy-joy kommunal boshqarmasiga qarashli issiqxonada mehnat qiladi. O‘zbekiston Liberal-demokratik partiyasi Zarafshon shahar Kengashining faol a’zosi bo‘lgan Musallam Qurbonova ibratli oila sohibasi ham. Uning Hikmat aka Qo‘ldoshov bilan turmush qurganiga 35 yildan oshdi. Ularning oilasi 2012 – «Mustahkam oila yili»da o‘tkazilgan tanlovda Zarafshon shahridagi «Eng namunali oila» nominatsiyasida g‘olib bo‘lgan. Hikmat aka Markaziy kon boshqarmasi tizimida salkam qirq yildan buyon ishlab, yoshlarga o‘rnak bo‘lib kelmoqda. Ular uch nafar farzandni tarbiyalab voyaga etkazdilar. To‘ng‘ich farzandi Ahmed Rossiyaning Tomsk politexnika universitetida o‘qidi va muhandis-fizik mutaxassisligiga ega bo‘ldi. Sportning fudokan karate-do turi bilan muntazam shug‘ullangan Ahmed shahar, viloyat, respublika miqyosidagi musobaqalarda g‘oliblikni qo‘lga kiritib, 2002 yilda MDH bo‘lib o‘tgan musobaqada 1-o‘rinni egalladi va qora belbog‘ sohibi bo‘ldi. Oilaning ikkinchi farzandi Alisher Moskva davlat texnologiya universitetining rangli metallarni qayta ishlash fakultetini 2011 yilda tugallab, Markaziy kon boshqarmasining «Muruntov» koni laboratoriyasida smena boshlig‘i bo‘lib ishlamoqda. U ishlab chiqarishdan ajralmagan holda Tomsk davlat politexnika universitetida iqtisod yo‘nalishi bo‘yicha sirtqi bo‘limda tahsil oldi. Alisher ayni kunlarda diplom ishini muvaffaqiyatli himoya qilib, O‘zbekistonga qaytadi. Etti yoshidan boshlab sportning fudokan karate-do turiga qiziqib shug‘ullangan Alisher qator respublika va xalqaro turnirlarda g‘olib bo‘lgan. Moskva shahrida bo‘lib o‘tgan xalqaro turnirda 1-o‘rinni qo‘lga kiritib, 1-«dan» qora belbog‘ sohibi bo‘ldi. U 2007 yildan buyon fudokan karate-do Respublika federatsiyasining Navoiy viloyati raisidir. Kenjatoy – Marina yoshligidan musiqaga oshno bo‘lib o‘sdi. U Zarafshon shahridagi 1-ixtisoslashtirilgan umumta’lim maktabida o‘qib yurgan vaqtlaridanoq turli ko‘rik- tanlovlar va tadbirlarning faol ishtirokchisi edi. Marina Zarafshon tibbiyot kollejini bitirgach, Sibir davlat tibbiyot universitetiga o‘qishga kirdi. U universitetning faol talabalardan biri sifatida turli tanlovlarda g‘oliblikni qo‘lga kiritmoqda. Farzandlari baxtidan, kamolidan quvonmaydigan inson bo‘lmasa kerak. Hikmat aka va Musallam opa ham dilbandlaridan faxrlanishadi. Olam ajoyib fazilatli insonlarga boy. Har bir shahar va qishloqning o‘z fidoyilari bo‘lgani singari Zarafshonning ham M.Qurbonovaday «Yaxshi xolasi» bor. Musallam opa kabi xalq dardini o‘z dardi deb biladigan olijanob insonlarning mehnatlarini e’tirof etish biz uchun ham qarz, ham farzdir.

Salima XOLDOROVA.

Biz bilan bog'lanish

  • Umumiy bo‘limi (devonxona): 0(436) 227-71-64, +998 79 227-71-64
  • Ishonch telefoni: 0(436) 227-72-22, +998 79 227-72-22

    Mualliflik huquqi © NKMK, 2015. Barcha huquqlar himoyalangan.   

Axborotdan foydalanish shartlari

Siz bu yerdasiz: Bosh sahifa Выпуск №12 от 22.06.2017 Zarafshonlik «Yaxshi xola»