Система Orphus

Shriftning o'lchamini

Qarama-qarshilik

        
Siz bu yerdasiz: Bosh sahifa Выпуск №12 от 28.06.2018 KITOBXON OILALAR

KITOBXON OILALAR

Insonning yoshi ulg‘aygan sari hayot haqiqatlarini anglay boshlaydi. Ana shunday hayotiy haqiqatlardan biri haqida o‘rtoqlashmoqchiman. Dunyoda muvozanat saqlaydigan yagona narsa – kitob. Hamma uchun eshigi ochiq turadigan xazina – kutubxona. Hech qachon chirimaydigan boylik – bilimdir. Bilim manbai esa bebaho kitobdir. Kitobning inson ma’naviy hayotidagi o‘rni beqiyos.

Ma’lumki, O‘zbekiston Respublikasi Prezidenti Sh.Mirziyoyevning joriy yil 12 mayda imzolagan “Buyuk allomalar, adib va mutafakkirlarimiz ijodiy merosini keng o‘rganish va targ‘ib qilish maqsadida yoshlar o‘rtasida kitobxonlik tanlovlarini tashkil etish to‘g‘risida”gi qarori asosida kitobxonlik madaniyatini oshirishga alohida e’tibor qaratilmoqda. Navoiy kon-metallurgiya kombinatining 60 yillik yubileyi munosabati bilan O‘zbekiston yoshlar ittifoqi Markaziy kon boshqarmasi boshlang‘ich tashkiloti 3-Birlashgan kasaba uyushma qo‘mitasiga qarashli kutubxona bilan hamkorlikda “Eng yosh kitobxon oila” ko‘rik-tanlovini tashkil etdi. Bu muhim tadbir ming nafarga yaqin yigit-qizlarni bir g‘oya atrofida birlashtirdi. Tanlovdan maqsad badiiy asarlar targ‘iboti orqali yoshlarimizni  barkamol insonlar etib tarbiyalash, iste’dodli yoshlarni har tomonlama qo‘llab-quvvatlashdan iborat va qaysidir ma’noda Res­publika miqyosida o‘tkaziladigan an’anaviy “Yosh kitobxon” ko‘rik-tanloviga tayyorgarlik desam yanglishmagan bo‘laman.

Ishtirokchilar “Tezkor savol-javoblar”, “Bir asar tahlili”, “Men sevgan adib”, “She’riyat” shartlarida o‘zaro bahslashdilar. Ishtirokchilar nutqiy mahorat­lari, fikrlarini ta’sirchan uslubda yetkaza olish, badiiy asarlarni o‘zlari yashab turgan hudud tabiati, hayoti  bilan bog‘lay olish qobiliyatlarini namoyon etdilar.

Yakuniy natijalarga ko‘ra Tar­moqlar va nimstansiyalar sexi byuro boshlig‘i Sayfiddin Sodiqov oilasi “Eng yaxshi kitobxon oila”, “Auminzo-Amantoy” koni iqtisodchisi Nurmurod Mirzaev va Temir yo‘l transporti boshqarmasi tokari  Rabbimali Botirov oilalari “Bilimdon kitobxon oila”, 2- gidrometallurgiya zavodi katta tabel yurituvchisi Feruza Qayumova va Uy-joy kommunal boshqarmasi ishchisi Bobur Qobulovlar oilalari “Zukko kitobxon oila”, Tarmoqlar va oststansiyalar sexi ustasi Aziz Egamov va 2-gidrometallurgiya zavodi apparatchisi Botir Istamov hamda Qizilqum fosfarit kompleksi navbatchi elektr chilangari Quvondiq Rahmonov oilalari “Faol kitobxon oila” nominatsiyalarida g‘olib deb topildi.

G‘oliblarga O‘zbekiston yoshlar ittifoqi Markaziy kon boshqarmasi boshlang‘ich tashkiloti va 3-Birlashgan kasaba uyushma qo‘mitasi tomonidan diplom hamda kitoblar jamlanmasi topshirildi. Bunday ko‘rik-tanlovlar oilaviy kitob mutolaasini oshiribgina qolmasdan, yosh avlod qalbida kitobga mehr-muhabbat uyg‘otishga ham xizmat qiladi.

Saodat BOBOYOROVA,

O‘zbekiston yoshlar ittifoqi

Markaziy kon boshqarmasi boshlang‘ich

tashkiloti etakchisi.

 

Biz bilan bog'lanish

  • Umumiy bo‘limi (devonxona): 0(436) 227-71-64, +998 79 227-71-64
  • Ishonch telefoni: 0(436) 227-72-22, +998 79 227-72-22

    Mualliflik huquqi © NKMK, 2015. Barcha huquqlar himoyalangan.   

Axborotdan foydalanish shartlari

Siz bu yerdasiz: Bosh sahifa Выпуск №12 от 28.06.2018 KITOBXON OILALAR