Система Orphus

Shriftning o'lchamini

Qarama-qarshilik

        
Siz bu yerdasiz: Bosh sahifa 17.08.2015 dan №15 nashr OQ YO‘L SIZGA, AZIZ BITIRUVCHILAR!

OQ YO‘L SIZGA, AZIZ BITIRUVCHILAR!

Yaqinda «Farhod» madaniyat saroyida Navoiy davlat konchilik instituti bakalavr va magistratura bitiruvchilariga mutaxassislik diplomlarini topshirishga bag‘ishlangan marosim bo‘lib o‘tdi. Tadbirda institut professor-o‘qituvchilari, talaba yoshlar, ota-onalar, jamoatchilik vakillari ishtirok etdilar.

Institutni tugatib, katta hayot bo‘sag‘asida turgan yigit-qizlar xotirasida muhrlanib qoladigan tantanali yig‘ilishda institut rektori, NKMK bosh direktori Q.Sanaqulov va viloyat hokimi o‘rinbosari U.Razzoqovlar so‘zga chiqib, mamlakatimizda yoshlarga oid davlat siyosatini amalga oshirish borasidagi izchil ishlar, ertamiz egalarining har tomonlama barkamol ulg‘ayishlari uchun yaratilayotgan sharoit va imkoniyatlar o‘z samarasini berayotganini ta’kidladilar. Bitiruvchilar orasida energomexanika fakulteti talabasi, Beruniy nomli davlat stipendiyasi sovrindori Nodira Umarova va yigirma nafar imtiyozli diplom sohiblarining borligini ana shunday e’tibor mevasi deyish mumkin. YUrtboshimiz rahnamoligida ishlab chiqilgan Kadrlar tayyorlash milliy dasturi jamiyat hayotining barcha jabhalari uchun yuqori malakali, yuksak ijodiy, intellektual salohiyatli mutaxassislarni tarbiyalash va shu asosda ijtimoiy-iqtisodiy, ma’naviy-ma’rifiy sohalarni yanada ravnaq toptirishda muhim omil bo‘lmoqda. Zero, yoshlarning etuk bilim sohibi, mustaqil fikrga ega shaxs bo‘lib kamol topayotgani mamlakatimizning barqaror taraqqiyoti, porloq kelajagiga mustahkam poydevor yaratadi.

Mazkur oliy o‘quv yurtini 2015 yilda bitirayotgan 809 nafar talaba bakalavriat, 36 nafar yosh esa magistrlik darajasidagi etuklik diplomlariga ega bo‘lishdi. Institut va ishlab chiqarish korxonalari o‘rtasida o‘zaro hamkorlik yaxshi yo‘lga qo‘yilib, joylarda hatto kafedra filiallari faoliyat ko‘rsatayapti. Ko‘pchilik talabalar korxonalarda amaliyot o‘tab, malaka oshirish jarayonidayoq kelgusida shu erda ishlashi yuzasidan uch tomonlama shartnomalar imzolashmoqda. Boshqacha aytganda, bo‘lajak kasbi sirlarini chuqurroq egallashga intiluvchan yoshlarning talabalik yillaridayoq ish o‘rniga ega bo‘lish kafolati tug‘ilayapti. O‘qish jarayonida bitiruvchilar Davlat ta’lim standartlari asosida tasdiqlangan o‘quv rejalariga muvofiq iqtisodiy, huquqiy, gumanitar, tanlagan mutaxassisliklari bo‘yicha ixtisoslashgan va axborot texnolo­gi­yalari kabi fanlarni o‘zlashtirdilar. Institutda 21 ta kafedra, amaliy mashg‘ulot, laboratoriya xonalari, shuningdek, zamonaviy yotoqxona, kutubxonalar, sport majmuasi yoshlar ixtiyorida. Talabalar olgan nazariy bilimlarini bevosita amaliyot bilan uzviy bog‘lashi, tanlagan mutaxassisliklari bo‘yicha dastlabki ko‘nikmalarni ho­sil qilish­lari uchun NKMK, «Navoiyazot» AJ kabi yirik korxonalar bo‘linmalarida amaliyot o‘tadilar. SHu kunlarda institutning 2 ming o‘ringa mo‘ljallangan zamonaviy va milliy xususiyatlarni o‘zida mujassamlashtirgan, barcha qulayliklarga ega, loyiha qiymati 59,4 milliard so‘mlik yangi binosi qu­rilishi yakuniga etkazilayapti. Oliy dargoh bitiruvchilarini, shubhasiz, tolei baland yoshlar deb atashimiz mumkin. Tadbirda mehnat faoliyatiga yo‘llanayotgan yigit-qizlarni ota-onalar, shuningdek, turli tashkilotlardan kelgan vakillar qutladilar. Yoshlarga diplom topshirish marosimi «Farhod» madaniyat saroyi ijodiy jamoalarining tantanali bayram dasturiga ulanib ketdi. Kombinat bosh direktori qo‘lidan mutaxassislik diplomini olgan «Noyob va radiaktiv metallar» fakulteti bitiruvchisi, respublika va Rossiya ommaviy axborot vositalarida ilmiy maqolalari bilan qatnashib turadigan Yulduz Yadgarova ko‘ngil kechinmalarini biz bilan baham ko‘rdi.

- Bugungi hayajonli daqiqalarni aslo unutmasam kerak. Diplomni qo‘limga olar ekanman, bunday quvonchli damlarni uzoq vaqt orzu qilganim, shu yo‘lda o‘qib, izlangan talabalik onlarim ko‘z o‘ngimda gavdalandi. «1-gidrometallurgiya zavodi» kon boshqarmasida ishlash uchun berilgan yo‘llanma esa meni yanada xursand qilmoqda. Shunday oliy dargohda o‘qib, shonli korxonada ishlash nasib etayotganidan baxtliman. Biz bitiruvchilar kelgusida institutda olgan nazariy bilimlarimizni amaliyotda qo‘llab, mahoratimizni oshiramiz, fidokorona mehnatimiz bilan bildirilgan ishonchni oqlaymiz.

Magistr keng ilmga ega, zamonaviy axborot texnologiyalari bilan hamnafas, ilmiy-tadqiqot ishlariga tayyor mutaxassisdir. Institutni 2015 yilda tugatgan yigit-qizlar ham korxonalarining bilimli, fidoyi va jonkuyar xodimlari sifatida e’tiborga tushishlari, respublikamiz konchilik va metallurgiya sohasini rivojlantirishga o‘z ulushlarini qo‘shishlariga ishonchimiz komil. Hozircha esa ularga «Oq yo‘l sizga, aziz yoshlar!» deymiz.

Dilafrro‘z BEKNAZAROVA.
Suratlar mualliflari
Siroj ASLONOV, Hamid YULDOSHEV.

Jo‘rayev Abdumajid Irisovich

Matbuot markazi boshlig‘i – NKMK bosh direktorining matbuot kotibi – axborot siyosati masalalari bo‘yicha maslahatchisi.

+ (998 79) 2277-473

Sadriddinov Nizomiddin Xayriddinovich

“Konchilar hayoti” gazetasi muharriri.

+ (998 79) 2277-464

Biz bilan bog'lanish

  • Umumiy bo‘limi (devonxona): 0(436) 227-71-64, +998 79 227-71-64
  • Ishonch telefoni: 0(436) 227-72-22, +998 79 227-72-22

    Mualliflik huquqi © NKMK, 2015. Barcha huquqlar himoyalangan.   

Axborotdan foydalanish shartlari

Siz bu yerdasiz: Bosh sahifa 17.08.2015 dan №15 nashr OQ YO‘L SIZGA, AZIZ BITIRUVCHILAR!