Система Orphus

Shriftning o'lchamini

Qarama-qarshilik

        
Siz bu yerdasiz: Bosh sahifa Выпуск №16 от 25.08.2016 IZLAGAN IMKON TOPADI

IZLAGAN IMKON TOPADI

Shimoliy kon boshqarmasi tarkibida shunday bir tashkilot borki, barcha korxonalar uning xizmatiga ehtiyoj sezadi. Ayniqsa, Qizilqum bag‘rida joylashgan Uchquduq shahri aholisi va ishlab chiqarish korxonalari uchun bu tashkilotning xizmati beqiyosdir. Shahar ko‘chalaridan ketayotib, yo‘llar chetidagi anvoyi gullar va so‘lim bog‘larni ko‘rib, cho‘lga suv keltirib, chamanzorga aylantirgan insonlar mehnatiga tasanno aytging keladi.

Issiqlik, suv, gaz ta’minoti va quvurlari sexi ishchi-xizmatchilari, muhandis-texnik xodimlari ana shunday  nihoyatda zarur va muhim vazifani  amalga oshirishadi. Ular «obi hayot» etkazib berishdan tashqari, aholini va ishlab chiqarish ob’ektlarini tabiiy va siqilgan gaz bilan ta’minlaydi, shahar hududining sanitariya holatini me’yorda saqlash uchun kanalizatsiya tarmog‘ini nazorat qiladi. Shahar chiqindi oqovasini zararsizlantirib, tozalangan suvni 3-gidrometallurgiya zavodi hamda shahar obodonchiligi uchun etkazib beradi. Davr talabi bilan innovatsion texnologiyalar har bir sohaga kirib kelmoqda. Kombinat va Shimoliy kon boshqarmasi rahbariyatining qarori bilan 3- gidrometallurgiya zavodining texnik suvga bo‘lgan ehtiyojini qondirish maqsadida Beshbuloq suv havzasidan 20 kilometr masofaga suv quvurlari tortib  kelinib, zavod hududida suvni tozalash uskunasi o‘rnatildi.

Uskunani ishga tushirish va undan muntazam samarali foydalanishni ta’minlash uchun bilimli muhandis-xodimlar va ishchilar zarur edi. Bunday mas’uliyatli vazifa yosh va serg‘ayrat rahbar Bobomurod Qurbonov rahbarlik qilayotgan tashkilot jamoasi zimmasiga yuklandi. Xodimlar yangi texnologiya uskunalarini mukammal o‘rganib, ishlatishlari uchun o‘quv mashg‘ulotlari tashkil etildi. Suv tozalash uskunasining 7 ta tozalash qurilmasi va 10 ta filtrdan iborat asosiy texnologiya jihozlari sinovdan o‘tkazilib, shu yilning fevral oyida ishga tushirildi. Suv Beshbuloq suv ko‘tarma inshootidan 4 ta suv nasoslari orqali tozalash uskunasiga etkazib beriladi. Uskuna soatiga 800 kub metr suvni qabul qilib, uni tuz va boshqa aralashmalardan tozalaydi, soatiga 600 kub metr  tozalangan  suv zavod ehtiyoji uchun ishlatiladi. Buning natijasida Amudaryo – Zarafshon suv quvurlaridan kelayotgan va Uchquduq shahri ehtiyoji uchun zarur bo‘lgan 1 million 830 ming kub metr suv tejab qolinadi.  Boshqacha aytganda, bu 1 milliard so‘m mablag‘ni iqtisod qilish demakdir.

Germaniyada ishlab chiqarilgan ushbu suv tozalash uskunasining ishlash va texnologiya jarayonini sex muhandis-texnik xodimlari va ishchilari tezda o‘zlashtirib oldilar. Tajribali muhandis Islom Nazarov boshchilik qilayotgan mehnat jamoasi a’zolari o‘zlariga ishonib topshirilgan vazifalarni a’lo darajada bajarib kelmoqdalar. Nasosli uskunalar mashinistlari Nishon Saidov, Dilobor Fayzullaeva, suv tozalash uskunalari apparatchilari Bahodir Temurov, Temur Yuldashev, Orif Suyunov, Ulug‘bek Pardaev, o‘lchash uskunalari nazorati va avtomatika chilangarlari Feruz Rajabov va Sobir Boyitovlar texnologik uskunalarni ko‘z qorachig‘idek asrab-avaylab ishlatib, o‘z vaqtida texnik ko‘rikdan o‘tkazishib, suv tozalash jarayoni uzluksiz davom etishini ta’minlashmoqda. Doimo izlanishda bo‘lgan, asosan yosh mutaxassislardan iborat sex jamoasi «Izlagan imkon topadi» – degan naqlni amalda isbotlayapti. Samarali mehnat evaziga tejalgan mablag‘lar mustaqillikning 25 yillik bayramiga munosib sovg‘asi bo‘layapti.

Rabbim SHOPO‘LATOV

Jo‘rayev Abdumajid Irisovich

Matbuot markazi boshlig‘i – NKMK bosh direktorining matbuot kotibi – axborot siyosati masalalari bo‘yicha maslahatchisi.

+ (998 79) 2277-473

Sadriddinov Nizomiddin Xayriddinovich

“Konchilar hayoti” gazetasi muharriri.

+ (998 79) 2277-464

Biz bilan bog'lanish

  • Umumiy bo‘limi (devonxona): 0(436) 227-71-64, +998 79 227-71-64
  • Ishonch telefoni: 0(436) 227-72-22, +998 79 227-72-22

    Mualliflik huquqi © NKMK, 2015. Barcha huquqlar himoyalangan.   

Axborotdan foydalanish shartlari

Siz bu yerdasiz: Bosh sahifa Выпуск №16 от 25.08.2016 IZLAGAN IMKON TOPADI