Система Orphus

Shriftning o'lchamini

Qarama-qarshilik

        
Siz bu yerdasiz: Bosh sahifa 16.09.2015 dan №17 nashr Istiqlol saodati

Istiqlol saodati

Mamlakatimizda davlat mustaqilligining shonli sanasi keng nishonlanayotgan shu fayziyob kunlarda boshqa hududlar qatori Navoiy kon-metallurgiya kombinatining ko‘p millatli mehnat jamoasi ham Istiqlol ne’matlari va rag‘batlaridan bahra olib, surur va g‘urur bilan yashamoqda.


Yaqinda Vatanimiz mustaqilligini mustahkamlash, uning jahon miqyosidagi shon-shuhratini yuksaltirish borasida davlat va xalq oldidagi ulkan xizmatlari, ishlab chiqarish sohasidagi uzoq yillik fidokorona mehnati hamda yosh avlodni vatanparvarlik va xalqiga sadoqat ruhida tarbiyalashga qo‘shgan katta hissasi uchun Prezidentimiz farmoniga muvofiq, «O‘zbekiston Qahramoni» unvoni berilib, oliy nishon – «Oltin yulduz» medali bilan taqdirlangan to‘rt nafar yurtdoshimizdan biri navoiylik ekani bu zaminga o‘zini qaysidir jihatdan bog‘liq, deb hisoblaydigan har qanday kishiga cheksiz faxr-iftixor bag‘ishlaydi. Zotan, «Navoiy kon-metallurgiya kombinati» davlat korxonasi bosh direktori Quvondiq Sanaqulov ana shu oliy mukofotga tom ma’noda loyiq insondir.
Hattoki, global moliyaviy-iqtisodiy inqiroz davrida ham, ya’ni keyingi o‘n yil davomida mamlakatimizda yalpi ichki mahsulotning o‘sish sur’ati 8 foizdan kam bo‘lmasdan kelayotgani, umuman, mustaqillik yillarida O‘zbekiston iqtisodiyoti 5,5 barobar, aholining yalpi real daromadlari jon boshiga 9 karra oshishida mamlakatimiz kon-metallurgiya sanoati bayroqdori hisoblangan ushbu kombinat jamoasining munosib hissasi bor, desak aslo mubolag‘a bo‘lmaydi.


Prezidentimiz ta’kidlaganidek, «tarixan qisqa bir davrda hayotimizda bo‘layotgan keskin o‘zgarishlar va yangilanishlarni chuqur anglash, tasavvur etish uchun biz kecha kim edig-u, bugun kim bo‘ldik, degan tabiiy savolni berish o‘rinli». Hech kimga sir emas, sobiq ittifoq tarkibida O‘zbekiston o‘z salohiyati va aholisining hayot darajasi bo‘yicha eng qoloq respublikalardan biri bo‘lib, bugungi kunda demokratik yangilanish va taraqqiyot yo‘lidan qat’iy qadamlar bosib borayotgan, kuch-qudrati tobora yuksalib, zamonaviy ko‘p tarmoqli iqtisodiyotga ega bo‘lgan, o‘z xalqining farovonligini oshirishga qodir mamlakatga aylanib borayotgani misolida bu fikrning yaqqol tasdig‘ini ko‘rish mumkin.
Mamlakatimiz iqtisodiyotida etakchi o‘rin tutgan yirik sanoat tarmoqlarida amalga oshirilayotgan islohotlar, modernizatsiya tadbirlari ishlab chiqarish quvvatini yildan yilga oshirmoqda. Jumladan, Navoiy kon-metallurgiya kombinatiga qarashli sanoat tarmoqlari tomonidan keyingi yillarda yangi ilmiy g‘oyalar, innovatsion texnologiyalar asosida ishlab chiqarish natijalari yuqori samara berdi.
O‘tgan yarim asrdan buyon «Muruntog‘» konida qazib olingan 1,5 milliard kubometrdan ortiq tog‘ jinslari avtomobil va konveyer transport vositalari orqali tashildi. Konda bir kunda  30 ta ekskavator va 60 tagacha yirik yuk tashish transport vositasi xizmat ko‘rsatadi. Madanni boyitish va qayta ishlash maqsadida 2-sonli gidrometallurgiya zavodiga jo‘natilayotgan tog‘ jinslarining hajmi yildan-yilga ortib borishida ham zamonaviy yuqori quvvatga ega transport vositalari hamda texnikalarning salmoqli o‘rni bor.


2011 yilda dunyoda yagona, ko‘tarilish balandligi 270 metr, eni ikki metr bo‘lgan noyob tik nishabli konveyer hamda osma kanat yo‘li ishga tushirildi. To‘rt yil davomida amalga oshirilgan modernizatsiya tadbirlari bois mazkur noyob texnologik uskunaning umumiy uzunligi uch kilometrdan oshdi. E’tiborli jihati, tik nishabli konveyerda tog‘ jinslari 37 gradus qiyalikda lenta orqali to‘g‘ri vagonlarga etkazib berilishidadir. Hozirgi kunda mazkur zamonaviy texnologik liniya bir kecha-kunduzda 13 ming kubometrdan ziyod tog‘ jinslarini o‘z manziliga etkazib berayapti. Yangi qurilma to‘rtta maydalash-yuk tashish punkti, ikkita odimlovchi ag‘darma hosil qilgichlar, ko‘chma konveyerlar va shag‘al tosh yig‘uvchi yuklagich kabilarni o‘z ichiga oladi. Zamonaviy konveyer kar’er avtomobil transportidan foydalanish unumdorligini oshirdi hamda transport xarajatlarini keskin qisqartirdi. Bundan tashqari, qo‘shimcha ravishda 130 ta yangi ish o‘rni ham yaratildi.
Tik nishabli konveyerdan foydalanish natijasida ekskavatorlar tog‘ ma’danlarini qazish ishlarini ko‘paytirib, yuk tashish ishlari har bir transportda sutkasiga 3,5 kilometrgacha qisqardi. Pirovardida, texnologik avtotransport parkini 8 ta birlikka kamaytirish va ulardan boshqa yo‘nalishlarda foydalanish imkoni yaratildi.


Navoiy viloyat sanoat korxonalari tomonidan oltin, uran, sement, fosforit, turli kimyoviy o‘g‘itlar, sun’iy tola, qorako‘l teri kabi xomashyo va mahsulotlar ishlab chiqarish yaxshi yo‘lga qo‘yilgan. Jumladan, voha etaloni hisoblangan kon-metallurgiya sanoati jadal ri­vojlanmoqda. Bugungi kunda qariyb 60 ming nafar ishchi-xizmatchi mehnat qilayotgan Navoiy kon-metallurgiya kombinati istiqlol yillarida zalvorli rivojlanish bosqichlarini bosib o‘tdi. Mamlakatimizda ishlab chiqarilayotgan rangli va qimmatbaho metallarning 73 foizi mazkur voha hissasiga to‘g‘ri kelayotgani yuqoridagi fikrimizga asos bo‘la oladi.


Shuni alohida qayd etish kerakki, samarali mehnati va erishayotgan yutuqlari bilan mamlakatimizning iqtisodiy qudratini oshirishga, yosh avlodni milliy va umuminsoniy qadriyatlar ruhida tarbiyalashga qo‘shgan katta hissasi, mehnatsevarligi, vatanparvarligi, jamoat ishlaridagi faolligi bilan umumxalq izzat-hurmatiga sazovor bo‘lgan, yorqin iste’dodi va ilmiy faoliyati, halol xizmati uchun joriy yilda munosib taqdirlangan hamyurtlarimiz orasida to‘rt nafar Navoiy kon-metallurgiya kombinatining fidoyi insonlari ham bor.


Muxtasar qilib aytganda, o‘tgan davrda qo‘lga kiritilgan yuksak marralarimizni tahlil etish mamlakatimizni tadrijiy va bosqichma-bosqich rivojlantirish bo‘yicha xalqimiz tanlagan yo‘l - taraqqiyotning «O‘zbek modeli» naqadar to‘g‘ri ekanini va shu yo‘ldan bundan buyon ham og‘ishmay qat’iyat bilan borishimiz zarurligini yaqqol ko‘rsatayapti.


Azamat ZARIPOV,
NKMK matbuot markazi rahbari.

Jo‘rayev Abdumajid Irisovich

Matbuot markazi boshlig‘i – NKMK bosh direktorining matbuot kotibi – axborot siyosati masalalari bo‘yicha maslahatchisi.

+ (998 79) 2277-473

Sadriddinov Nizomiddin Xayriddinovich

“Konchilar hayoti” gazetasi muharriri.

+ (998 79) 2277-464

Biz bilan bog'lanish

  • Umumiy bo‘limi (devonxona): 0(436) 227-71-64, +998 79 227-71-64
  • Ishonch telefoni: 0(436) 227-72-22, +998 79 227-72-22

    Mualliflik huquqi © NKMK, 2015. Barcha huquqlar himoyalangan.   

Axborotdan foydalanish shartlari

Siz bu yerdasiz: Bosh sahifa 16.09.2015 dan №17 nashr Istiqlol saodati