Система Orphus

Shriftning o'lchamini

Qarama-qarshilik

        
Siz bu yerdasiz: Bosh sahifa 16.09.2015 dan №17 nashr Azmu shijoatli rahbar yigitlar

Azmu shijoatli rahbar yigitlar

Janubiy kon boshqarmasi kombinat tizimidagi oltin va uran qazib olish bo‘yicha ishlab chiqarish topshiriqlarini ortig‘i bilan bajarib kelmoqda. Erishilayotgan bu zalvorli yutuqlar zamirida kon boshqarmasi jamoasi ishchi-xizmatchilari, muhandis-texnik xodimlaridan har birining fidoyiligi mujassam. Ayniqsa, og‘ir ishlab chiqarish yukini zabardast elkalarida ko‘tarib borayotgan Tolliboy, Xurshid, Olim va Sindor kabi yosh mutaxassislarning shahdu shiddati, muvaffaqiyatlarga qo‘shayotgan hissasi tahsinga munosibdir.


Yosh bo‘lishlariga qaramay, azmu shijoat bilan egnilariga rahbarlik to‘nini kiyib, ishlab chiqa­rishning og‘ir uchastkalarida ter to‘kib mehnat qilayotgan bahodir yigitlar haqida Janubiy kon boshqarmasi bosh muhandisi Norbo‘ta Boyxo‘rozovich Toshbatirov faxrlanib gapirdi. Katta jur’at bilan ulug‘ ishlarga bel bog‘lab, davlat topshiriqlarini vaqtida ado etayotgan ushbu o‘g‘lonlarning tengdoshlariga o‘rnak bo‘lgulik fazilatlarini hikoya qilish haqidagi ezgu niyatimiz Mustaqilligimizning 24 yillik shodiyonalari arafasida ijobat bo‘ldi. Biz ular bilan uchrashib, ajoyib suhbat qurdik.


Olim Bakirov, «G‘ujumsoy» koni er osti kon ishlarini mexanizatsiyalashtirish bo‘limi boshlig‘i, 33 yoshda.
Qo‘shrabot tumanida ziyoli oilada tug‘ilib o‘sgan Olim Navoiy davlat konchilik institutining «Avtomatika va boshqaruv» yo‘nalishini tamomladi. Olim Bakirov Janubiy kon boshqarmasidagi mehnat faoliyatini 2009 yilda «Zarmitan» koni tog‘ ishlari mexanizatsiya sexi chilangari vazifasidan boshladi. Keyinchalik nazorat-o‘lchov asboblari, avtomatika va aloqa bo‘linmasi chilangari vazifasida faoliyat yuritib, sohaga oid nazariy bilimlarini amaliyot bilan boyitdi.


2011 yildan  «Zarmitan» koni tog‘ ishlari mexanizatsiya sexi bosh muhandisi, oradan bir yil o‘tib, «G‘ujumsoy» koni er osti kon ishlarini mexanizatsiyalashtirish bo‘limi boshlig‘i vazifasida ishlab kelmoqda.
«G‘ujumsoy» koni boshlig‘i Akmal Jamanqulov Olim Bakirov  Rossiya, Germaniya, SHvetsiya, Finlyandiya kabi xorijiy davlatlardan  keltirilgan texnikalarni ta’mirlash, ishga tayyorlash sohasida jonkuyarlik bilan olib borayotgan ishlarini alohida e’tirof etdi. Olim ishlab chiqarish topshirig‘ini ko‘ngildagidek bajarmaguncha, hech qaerga shoshmaydi, yurakdan mehnat qiladi.
Olimdan rahbar uchun eng muhim qoida qanday bo‘lishi kerak, deb so‘raganimizda u shunday javob berdi: «Rahbar uchun eng muhim qoida – tartib-intizom bo‘lishi kerak. Avvalambor, rahbarning o‘zi bunga rioya qilishi, keyin boshqalardan talab qilishi zarur».


Tolliboy Yuldashev, «Zarmitan» koni bosh muhandisi, 32 yoshda.
Tolliboyning yoshligi Zarkentda kechgan.  O‘rta maktabni bitirgandan so‘ng ota kasbiga bo‘lgan qiziqish uni Toshkent davlat texnika universitetiga etakladi. U oliy o‘quv yurtini «Er osti foydali qazilmalarini qazish» mutaxassisligi bo‘yicha tamomlagandan keyin o‘z mehnat faoliyatini hech ikkilanmasdan «Zarmitan»  koni «G‘arbiy» bo‘limida oddiy kon ishchisi sifatida boshladi. Tolliboy dastlabki kunlardan boshlab ishga sidqidildan yondashdi, berilgan topshiriqlarni o‘z vaqtida sifatli qilib bajarishga harakat qildi. Uning mehnatsevarligi, tirishqoqligi, ishga bo‘lgan jiddiy munosabati rahbariyat e’tiboridan chetda qolmadi. Ko‘p o‘tmasdan Tolliboyga kon ustasi, katta kon ustasi kabi vazifalar ishonib topshirildi. Rahbarlar e’tirofi va ota-onasining daldasi unda o‘z kuchiga ishonch tuyg‘usini oshirib, etakchilik qobiliyatini shakllantirib bordi.
Janubiy kon boshqarmasi rahbariyati 2008 yilda uni «Zarmitan» koni er osti kon ishlari bo‘limi boshlig‘i o‘rinbosari vazifasiga tayinladi. Ishlab chiqa­rishdagi eng mas’uliyatli vazifaga   tayinlanganda Tolliboy endigina 25 yoshga to‘lgandi. Keyinchalik er osti kon ishlari uchastkasi boshlig‘ining o‘rinbosari, uchastka boshlig‘i, «Zarmitan» koni shaxta boshlig‘i, «Zarmitan» koni  er osti kon ishlari mexanizatsiya sexida katta kon ustasi, uchastka boshlig‘i vazifalarida muvaffaqiyatli faoliyat yuritdi.
Tolliboy o‘z faoliyatida ustozlari o‘gitiga amal qilib, talabchan, g‘amxo‘r va odil rahbar bo‘lishga intiladi. Uning hayotiy shiori – «Har doim oldinga intilib yashash».


Sindor Mavlonov, «G‘ujumsoy» koni ma’dan qazib olish va tayyorlash bo‘limi boshlig‘i o‘rinbosari,  30 yoshda.
Qo‘shrabot tumanida tug‘ilgan Sindorning otasi Hamroqul aka «Zarmitan» dala qidiruv ekspeditsiyasida buldozerchi bo‘lib ishlashi bois, yoshligidan zahmatlimehnati bilan farovonlikda kun kechiradigan konchilar hayotiga havas bilan o‘sdi. O‘rta maktabni tamomlagach, katta orzular bilan hujjatlarini Toshkent davlat texnika universitetining «Konchilik ishi» yo‘nalishiga topshirdi. 2010 yilda oliy o‘quv yurtini tamomlab, o‘z mehnat faoliyatini  «G‘ujumsoy» koni kon qurilish bo‘limida lahimchi vazifasidan boshladi. 30 yil mazkur korxonada fidoyilik bilan mehnat qilib, farzandlarini halol luqma bilan o‘stirgan aziz otasining o‘gitlariga amal qilgan Sindor korxonaga katta ixlos qo‘ydi. Olgan bilimlarini, bor kuchini ishlab chiqarishga safarbar qilishga urindi. Undagi sobitqadamlik, izchillik, tinib-tinchimaslik fazilatlari rahbariyat tomonidan e’tirof etilib, uni kon ustasi, keyinchalik kon boshlig‘i o‘rinbosari lavozimiga ko‘tarishdi.


2014 yildan boshlab Sindor Mavlonov «G‘ujumsoy» koni ma’dan qazib olish va tayyorlash bo‘limi boshlig‘i o‘rinbosari vazifasida katta mas’uliyat bilan faoliyat yuritib kelmoqda.
Sindordan yaqin kelajakda o‘zingiz mehnat qilayotgan korxonani qanday tasavvur qilasiz, deb so‘raganimda u shunday javob berdi:
«Zarkent qo‘rg‘oni besh yil ichida yangi zamonaviy infratuzilmaga ega shaharchaga aylandi. Bugungi kunda ishga tushirilganligining besh yilligi nishonlangan 4-gidrometallurgiya zavodida texnologik jarayonda Hamdo‘stlik davlatlarida o‘xshashi bo‘lmagan eng zamonaviy texnologiya va jihozlar qo‘llanilmoqda. Bizning «G‘ujumsoy» konimizga yaqinda Germaniyadan shaxtaga tushib-chiqadigan avtobus keltirildi. O‘ylaymanki, yana yaqin yillarda ishlab chiqarish bundan-da takomillashib, yuqori darajada avtomatlashtirilgan va mexanizatsiyalashtirilgan yirik gigant korxonaga aylanadi».


Xurshid Narmatov, «Zarmitan» koni bosh muhandisining kon ishlari bo‘yicha o‘rinbosari, 29 yoshda.
Shijoatli va etuk mutaxassis sifatida jamoada e’tibor qozongan Xurshid Samarqand shahrida tavallud topgan. U o‘rta maktabni tamomlagach, Toshkent davlat texnika universitetiga «Konchilik ishi» yo‘nalishi bo‘yicha o‘qish­ga kirdi. 2009 yilda institutni muvaffaqiyatli tamomlab, mehnat faoliyatini Janubiy kon boshqarmasiga qarashli «Zarmitan» konida marksheyder ishlari bo‘yicha kon ishchisi vazifasidan boshladi. U ish o‘rganishga bo‘lgan kuchli ishtiyoqi, qiyinchiliklardan qo‘rqmasligi, berilgan topshiriqni o‘z vaqtida bajarish kabi fazilatlari bilan hamkasblari orasida hurmat topdi. Ko‘p o‘tmay «Zarmitan» koni ikkinchi er osti kon ishlari uchastkasi marksheyderi, keyinchalik bosh marksheyder o‘rinbosari vazifalariga tayinlandi va bu mas’uliyatli vazifalarda sidqidildan faoliyat ko‘rsatdi.


2013 yildan buyon Xurshid Narmatov «Zarmitan» koni bosh muhandisining kon ishlari bo‘yicha o‘rinbosari vazifasida ishlab kelmoqda. Xurshid «Mehnatning tagi rohat» degan qadimiy sharqona aqidaga amal qilib yashashini, hukumatimiz, shu jumladan, kombinat rah­bariyati tomonidan yoshlarga ko‘rsatilayotgan katta e’tibor har doim unga g‘ayrat va shijoat bag‘ishlab turishini faxrlanib gapirdi. Harakatlarida sharq yigitlariga xos azmu jazm, o‘tkir nigohlarida teranlik aks etib turgan bu yigit ixchamgina jussasida ishlab chiqarishning zalvorli yukini elkalab borayotganidan cheksiz quvondik.


Yosh rahbar xodimlar Mustaqillik bayrami arafasida NKMK bosh direktori Q.Sanaqulovning davlatimizning eng yuksak mukofoti - «O‘zbekiston Qahramoni» unvoniga sazovor bo‘lganligi haqidagi xabarni katta xursandchilik bilan qarshi olganliklarini, kelgusida ishlab chiqarishda bundanda baland cho‘qqilarni zabt etib, u kishiga munosib kadr bo‘lishga harakat qilishlarini bildirdilar.
Ha, yuz-ko‘zlarida tug‘ilib o‘sgan yurtidan faxrlanish, o‘zlariga ko‘r­satilayotgan yuksak ishonchu e’tibordan mamnunlik hissi barq urib turgan yigitlar bilan bo‘lgan suhbat davomida kombinatimiz kelajagi ishonchli qo‘llarda ekanligidan suyunish hissini tuydik va «shaxdu shiddatingizga balli, aziz yigitlar», deya ular bilan xayrlashdik.


S.XOLDOROVA.
«Konchilar hayoti» muxbiri.

Jo‘rayev Abdumajid Irisovich

Matbuot markazi boshlig‘i – NKMK bosh direktorining matbuot kotibi – axborot siyosati masalalari bo‘yicha maslahatchisi.

+ (998 79) 2277-473

Sadriddinov Nizomiddin Xayriddinovich

“Konchilar hayoti” gazetasi muharriri.

+ (998 79) 2277-464

Biz bilan bog'lanish

  • Umumiy bo‘limi (devonxona): 0(436) 227-71-64, +998 79 227-71-64
  • Ishonch telefoni: 0(436) 227-72-22, +998 79 227-72-22

    Mualliflik huquqi © NKMK, 2015. Barcha huquqlar himoyalangan.   

Axborotdan foydalanish shartlari

Siz bu yerdasiz: Bosh sahifa 16.09.2015 dan №17 nashr Azmu shijoatli rahbar yigitlar