Система Orphus

Shriftning o'lchamini

Qarama-qarshilik

        
Siz bu yerdasiz: Bosh sahifa Выпуск №18 от 28.09.2018 IBRATLI UMR SOHIBI

IBRATLI UMR SOHIBI

Tangri taollo siylagan bandasiga beqiyos salohiyat baxsh etadi. Bunday  insonlar esa o‘z qobiliyatu imkoniyatlarini ezgu ishlarga sarflaydi. Kimdir oila muhitida olgan tarbiyasi ta’sirida otasi yoki onasining kasbini tanlab, ularning izidan boradi. Taqdiri azal boshqa bir, aytish mumkin bo‘lsa, omadli insonning peshonasiga Jaloliddin Rumiyning hayotida hal qiluvchi ahamiyat kasb etgan Shamsiddin Tabriziydek ustozni bitadi. Demak, ilm-fan egalari, ustozlarning el-yurt orasida alohida e’zozga munosib ekanligi bejizga emaskan-da! Har bir insonning o‘z hayot yo‘li, taqdiri bor, bo‘lgan, bo‘ladi.

Abdurashid Hasanov haqida o‘ylaganimda ilm-fan, ta’lim va ijod sohalarida ta’rif-tavsifga arzigulik natijalarga erishgan buyuk bobokonlarimizning nurli siymolari ko‘z oldimda gavdalanadi. Darvoqe, Abu Rayhon Beruniy, Abu Nasr Farobiy, Abu Ali ibn Sino, Alisher Navoiy singari ulug‘ ajdodlarimiz ilm-fan bilan jiddiy shug‘ullanishgan, badiiy ijod va musiqa san’atidan xabardor bo‘lishgan.

Oddiygina tarjimai hol inson amaliy faoliyatining ko‘zgusidir. Bugun zukko olim va taniqli ijodkor, g‘amxo‘r ustoz va murabbiy darajasiga yetgan A. Hasanov 1975 yilda cheksiz orzu-umidlar og‘ushida Toshkent politexnika instituti kon-metallurgiya fakultetining kechki bo‘limiga o‘qishga kirib, oliygohni 1983 yilda rangli metallar metallurgiyasi mutaxassisligi bo‘yicha tugalladi. Kechki o‘qish davrida “Olmaliq KMK” AJning qo‘rg‘oshin kon makonidagi markaziy mexanika-ta’mirlash zavodida oddiy ishchi bo‘lib ishladi. A. Hasanov oliy o‘quv yurtini tugatgach, ToshPI kon-geologiya fakultetining kunduzgi, Olmaliq kon-metallurgiya kechki fakultetida assistent, katta o‘qituvchi, dotsent, 1984-1998 yillarda kechki Olmaliq fakultetida bo‘lim mudiri, 2001 yildan esa Navoiy davlat konchilik instituti OKMF dekani lavozimida xizmat qildi. 2015 yildan joriy yilning yanvar oyigacha Navoiy davlat konchilik instituti metallurgiya fakulteti metallurgiya kafedrasini boshqardi. Qahramonimiz ilmiy va pedagogik faoliyatni birgalikda olib borib, 1988 yilda Moskva po‘lat va qotishmalar instituti aspiranturasiga o‘kishga kirdi. 1991 yilda texnika fanlari sohasida nomzodlik, 2008 yilda doktorlik dissertatsiyasini muvaffaqiyatli himoya qildi. Bundan o‘n sakkiz yil ilgari mamlakatimiz sanoati va iqtisodini rivojlantirishdagi xizmatlari uchun “Mehnat shuhrati” ordeni bilan taqdirlandi.

Hasanov ijodkor shaxs. U she’rlar, hikoyalar, esselar yozadi, she’rlarga musiqa bastalaydi, o‘zbek xalq cholg‘u asboblaridan sakkiztasini chalib biladi. Ijodkor olim arxeologiyaga oid uchta hujjatli film ssenariysi, qator badiiy va ilmiy asarlar muallifi sifatida haqli ravishda tomoshabinlar, keng kitobxonlar, konchilar, metallurglarning alohida hurmatini qozongan.

O‘zbekiston kon-metallurgiya sohasining yirik olimi, texnika fanlari doktori, professor A. Hasanov ko‘p yillik samarali ilmiy va pedagogik faoliyati tufayli Rossiya tabiiy fanlar akademiyasi akademigi, Xalqaro ekologiya va hayot xavfsizligi fanlari akademiyasining haqiqiy a’zosi, Xalqaro muhandislar akademiyasi akademigi, O‘zbekiston Turon fanlar akademiyasi akademigi degan yuksak nomga sazovor bo‘lgan. O‘tgan yili Navoiy kon-metallurgiya kombinati olimlari va mutaxassislaridan bir guruhi murakkab tarkibli, qayta ishlash qiyin bo‘lgan rudalardan oltin ajratib olishning yangi texnologiyasini yaratganliklari uchun Butunjahon intellektual mulk tashkilotining “Eng yaxshi ixtirochi” oltin medalini oldi. Mehnatlari dunyo miqyosida e’tirof etilgan ilm-fan fidoyilari safida A. Hasanov ham bor. Bularning barchasi uning hozirdayoq bir olim va mutaxassis qilishi mumkin bo‘lgan ishlarni uddalab qo‘yganligini yorqin isbotlab turibdi. O‘zining qutlug‘ 60 yilligini qarshi olayotgan Abdurashid Soliyevich ayni paytda jo‘shqin mehnat faoliyatini yoshlarga xos g‘ayrat-shijoat bilan “Olmaliq kon-metallurgiya kombinati” AJ Nodir metallar va qattiq qotishmalar ilmiy ishlab chiqarish birlashmasi direktorining ilm-fan bo‘yicha o‘rinbosari lavozimida davom ettirmoqda. A. Hasanov rahbarligida 6 nafar yosh tadqiqotchi doktorlik dissertatsiyasini himoya qilishga tayyorlashayapti.

Inson uchun sevimli farzandu nevaralari, shogirdlari kamolini ko‘rish, hamisha hamkasblar, diliga yaqin odamlarning qurshovida bo‘lish, ularning mehr-muhabbatini qozonishdan ortiq baxt bormi dunyoda?! To‘la ma’noda inson va olim Abdurashid Hasanov hech shubhasiz, ana shunday baxtga musharraf bo‘lgan ibratli umr sohibidir. Uning hayot yo‘liga har qanday kishi havas qilsa arziydi. A. Hasanov bilan bo‘lgan muloqotlarni eslasam, qo‘nglim charog‘on tortadi, mazmunu mundarijasi keng, insonning ma’naviy olami, tafakkur dunyosini boyitishga xizmat qiladigan dilkash suhbatlarni humsay boshlayman. Abdurashid Soliyevich menga o‘xshagan minglab odamlarning qalbi to‘ridan joy olganligiga aminman. Zero, qahramon shoirimiz Erkin Vohidov yozganidek, “Yerni go‘zal qilgani sayin, Go‘zal bo‘lar o‘zi ham inson...”.

Bag‘rikeng yurtimizda istiqomat qilgan yahudiylar “Siz yuzga kiring, biz ham ko‘raylik”, - deyishardi. Bu bilan ular o‘zlariga ham umr tilashardi Yaratgandan. Abdurashid Hasanovga yuz bilan yuzlashish, bizga esa o‘sha kunlarda piru badavlat, mo‘’tabar insonni bir asrlik yoshi bilan qutlash baxti nasib etsin!

  Dilmurod RO‘ZIYEV,

tibbiyot fanlari nomzodi,

NKMK “Metallurg” sihatgohi bosh vrachi.

 

Biz bilan bog'lanish

  • Umumiy bo‘limi (devonxona): 0(436) 227-71-64, +998 79 227-71-64
  • Ishonch telefoni: 0(436) 227-72-22, +998 79 227-72-22

    Mualliflik huquqi © NKMK, 2015. Barcha huquqlar himoyalangan.   

Axborotdan foydalanish shartlari

Siz bu yerdasiz: Bosh sahifa Выпуск №18 от 28.09.2018 IBRATLI UMR SOHIBI