Система Orphus

Shriftning o'lchamini

Qarama-qarshilik

        
Siz bu yerdasiz: Bosh sahifa 15.10.2015 dan №19 nashr 2- gidrometallurgiya zavodi unda ishlash yuksak sharaf

2- gidrometallurgiya zavodi unda ishlash yuksak sharaf

O‘zbekistonning jahon miqyosida obro‘-e’tibori, mavqei oshib bormoqda. Mamlakatimiz er osti boylik­larning katta zaxiralari, ularni o‘zlashtirishning eng zamonaviy texnika va texnologiyaga asoslangan keng imkoniyatlari, salohiyatli kadrlar potensialiga ega ekanligi hamda shu muhim omillar evaziga iqtisodiyotimiz jadal rivojlanayotganligi bunda asosiy rol o‘ynayapti. Shunday ekan, Navoiy kon-metallurgiya kombinati ishchi-xizmatchilari, muhandis-texnik xodimlari yurtimiz iqtisodiyotini yuksaltirishga ulkan hissa qo‘shayotganliklaridan har qancha faxrlanishga haqlidirlar. Bu jihatdan Markaziy kon boshqarmasiga qarashli 2-gidrometallurgiya zavodi jamoasining o‘ziga xos alohida o‘rni bor. Chunki korxonada O‘zbekiston tamg‘asi bilan ishlab chiqarilayotgan oltin timsolida yurtimizning beqiyos iqtisodiy qudrati butun dunyoga namoyish bo‘lmoqda.

Markaziy kon boshqarmasida xalqaro standartlar talabi asosida sifat, ekologiya, sog‘liqni muhofaza qilish va mehnat xavfsizligini ta’minlash bo‘yicha menejmentning integrallashgan tizimi joriy etilganligi undan ishlab chiqarishni boshqarishda muvaffaqiyatli foydalanish imkonini berayapti.

Shu o‘rinda zavod tarixi haqida ikki og‘iz so‘z. U 1967 yilning may oyida boshlangan bo‘lib, asriy Qizilqum bag‘rida ko‘rkam voha, zamonaviy shahar, qator korxonalar bunyod etilishiga poydevor yaratdi. Zavodning birinchi navbati qisqa muddatda ikki yilu ikki oyda qurib bitkazilib, foydalanishga topshirildi. 1969 yilning 21 iyuli nafaqat zavod, balki cho‘llar qa’rida yashirinib yotgan tabiiy boyliklarni qidirib topish va ularni yurt istiqboli, insonlarning farovon turmushi yo‘lida o‘zlashtirishga jazm qilgan kombinat jamoasi hayotida ham abadiy bitilib qoladigan sana bo‘ldi. Shu kuni korxonada birinchi oltin quymasi hosil qilindi. Ayni paytda 2-gidrometallurgiya zavodi oltin ishlab chiqarish bo‘yicha jahondagi eng yirik majmualardan hisoblanadi. Bu erda tarkibida qimmatbaho metall bo‘lgan  rudani maydalashdan boshlab, undan tayyor mahsulot ajratib olib, oliy sifatli quyma hosil qilishgacha bo‘lgan ishlab chiqarish jarayonlari to‘liq amalga oshiriladi. Rudani tayyorlash, maydalash, sorbsiya va regeneratsiyalashtirish, quyultirish, tayyor mahsulotlar, ta’mirlash-mexanika sexlari, zavod markaziy laboratoriyasi va sakkizta yordamchi uchastkalar ishchi-xizmatchilari, muhandis-texnik xodimlari ana shunday mas’uliyatli va sharafli ishni bajarishga safarbar etilganlar. 1998 yilda zavod tarkibiga respublikamiz qishloq xo‘jaligi  uchun zarur o‘g‘itlar ishlab chiqaradigan kimyo sanoati korxonalariga xom ashyo etkazib beradigan fosforit sexi ham qo‘shildi. Bu, korxona tizimida uchinchi ishlab chiqarish sikli paydo bo‘ldi, demakdir.

Ayni paytda uch ming nafarga yaqin turli kasb egalari mehnat qilayotgan korxonada, ayniqsa mustaqillik yillarida ishlab chiqarish hajmini har tomonlama oshirish borasida ulkan natijalarga erishildi. Barcha sex va uchastkalarda yangi texnika va texnologiyalarni joriy etish, eng zamonaviy asbob-uskunalar bilan jihozlantirish evaziga rudani qayta ishlash va tayyor mahsulot ishlab chiqarishda quvonchli ko‘rsatkichlar qo‘lga kiritilayapti. Texnologik jarayonlarni modernizatsiyalash borasida amalga oshirilgan ishlardan ba’zilarini eslatib o‘tish o‘rinli bo‘ladi. Rudani tayyorlash sexida maydalangan rudani qabul qilish liniyasi montaj qilinib, foydalanishga topshirildi. Maydalash sexida tegirmon almashtirildi, bitta tegirmon, yuqori unumdorli tegirmon blogi ishga tushirildi. 13 ta tegirmon blogida avtomatik boshqaruv tizimi joriy etildi. «Engineering Dobersek»  firmasining «Varman» nasosli 24 jamlanma gidrotsiklon qurilmalari o‘rnatildi. Sorbsiya va regeneratsiyalashtirish sexida beshta texnologik zanjir, uchta lokal sorbsion qurilma, oltinni magniy fraksiyasidan saralash liniyasi ishga tushirildi. Quyultirish sexida ikkita nasos stansiyasi qurildi, kuydirish pechlari mazut yonilg‘isidan tabiiy gazga o‘tkazildi, to‘rtta ohak kuydirish pechlari montaj qilindi va foydalanishga topshirildi. Tayyor mahsulotlar sexida tarkibida metall kam bo‘lgan qorishmadan grafitli anodlar yordamida eliktroliz qilish yo‘li bilan oltin ajratib olish texnologiyasi o‘zlashtirildi, ma’naviy va jismoniy jihatdan eskirgan ikkita filtr presslash qurilmasi yangi zamonaviysiga almashtirildi, qo‘shimcha induksion pech ishga tushirildi. Amalga oshirilgan bunday tashkiliy-texnik tadbirlarning samarasi o‘laroq istiqlol yillarida rudani qayta ishlash hajmi qariyb ikki baravarga o‘sdi va bugungi kunda bu raqam 37 million tonnadan ko‘proqni tashkil etayapti. Mahsulotning sifatlilik darajasi yuqoriligi hamda buni sohaga bevosita aloqador xalqaro tashkilotlar yuksak darajada e’tirof etishi kelajagi buyuk yurt farzandlari bo‘lgan har birimizning qalbimizda cheksiz iftixor tuyg‘ularini uyg‘otadi. 1994 yilda 2-gidrometallurgiya zavodi oltiniga London Quymalar bozori Assotsiatsiyasi tomonidan optimal mahsulot maqomi berildi. Bu, korxonada ishlab chiqarilayotgan oltin jahon standartlari talabiga to‘la javob berishining tasdig‘idir. Endilikda O‘zbekistonning oltin quymalardagi tamg‘asi butun dunyoda mahsulot yuqori sifatining nishonasi sifatida tan olinmoqda. 1998 yilda Navoiy kon-metallurgiya kombinati oltiniga Tokio sanoat mahsulotlari birjasining sifat sertifikati berildi. 2012 yilda o‘tkazilgan sinovda ham korxona mahsuloti sifati  yana qayta yuqori baholandi.

Zavodda kadrlarni tayyorlash, tarbiya­lash, joy-joyiga qo‘yish, malakasini oshirish, ishchi-xodimlarni ikkinchi kasblarga o‘qitishning kombinatning barcha bo‘linmalaridagi singari izchil tizimi shakllanganki, bunga har qanday jamoa havas qilsa arziydi. Joriy yilning o‘tgan davrida o‘quv kurslarida 181 nafar turli kasb egalarining malakasi oshirildi. 71 nafar kishi ikkinchi kasbga o‘qitildi. Korxonada aksariyat Navoiy davlat konchilik instituti, Toshkent davlat texnika universiteti va Zarafshon sanoat kasb-hunar kollejida tahsil olayotgan yoshlar amaliyot o‘tashdi va ular hisobidan ishchi-xodimlar safi to‘ldirilmoqda. 2015 yilda 135 nafar yigit-qiz zavodda amaliyot o‘tashadi. Birgina Zarafshon sanoat kasb-hunar kolleji bitiruvchilaridan 82 nafari bu erda ish o‘rniga ega bo‘lishdi.

Mamlakatimiz tarixiga «Keksalarni e’zozlash yili» bo‘lib kirgan 2015 yilning so‘nggi choragiga qadam qo‘ydik. Yil yakuni, belgilangan rejalarning qay darajada bajarilishi ko‘p jihatdan bugungi kundagi ishlar ko‘lami, ishchi-xizmatchilar, muhandis-texnik xodimlarning o‘z vazifalariga sidqidildan munosabatda bo‘lishiga bog‘liq. Zavod mehnat ahli buni yaxshi his qiladi va shunga munosib ish tutmoqda. Qolaversa, doimo ishlab chiqarishning yuksak maromini ta’minlash, har qanday sharoitda buyurtma va topshiriqlarni sharaf bilan bajarish ahil jamoa uchun an’anaga aylangan. Bu yutuqlarga ruda tayyorlash sexi boshlig‘i Habibullo Omonov, elektr montyori Shomurod Salomov, maydalash sexi konsentratorchisi Suvonqul To‘xtashev, tegirmon mashinisti Xayrilla Ro‘zimuratov, boshqaruv pulti operatori Abdulla Izzatov, sorbsiya va regeneratsiyalashtirish sexi boshlig‘i o‘rinbosari Sardor Polvonov, apparatchisi Farxat Qilichev, Dilmurod Jumaev, tayyor mahsulot sexi apparatchisi Foziljon Shukurov, ta’mirlash-mexanika sexi ta’mirlovchisi Ravshan Hamidov, quyultirish sexi nasos qurilmalari mashinisti Zafar Rahmonov, fosforit sexi ustasi Sirojiddin Kenjaevlar munosib hissa qo‘shmoqdalar. Qaysi kasbda bo‘lmasin, bu korxonada ishlash har bir inson uchun ulkan sharaf. Ana shu tuyg‘u yutuqlarga mustahkam poydevor, jamoa a’zolari uchun yangi, yuksak marralarni egallashda ularga qanot bo‘lmoqda.

Nizomiddin SADRIDDINOV.

Jumamurot MIRZAEV

 

Учредитель - трудовой коллектив НГМК

Полная или частичная перепечатка материалов из газеты допустима только с письменного разрешения пресс-центра. Редакция знакомится с письмами читателей, не вступая в переписку. Газета распространяется по подразделениям НГМК.

Газета зарегистрирована в Агентстве по печати и информации Навоийского облхокимията 29 июня 2015 года. Регистрационный номер - 07-070, ISSN 2010-5266.

Редакция

Джураев Абдумажид Ирисович
Начальник пресс-центра НГМК - пресс-секретарь генерального директора НГМК..
АДРЕС РЕДАКЦИИ: 210100, г.Навои, улица Навои 27, управление НГМК.
ТЕЛЕФОНЫ: 77-464(редактор), 77-363(техн.редактор), 77-366, 77-464(пресс-центр), 77-566(факс).

Biz bilan bog'lanish

  • Umumiy bo‘limi (devonxona): 0(436) 227-71-64, +998 79 227-71-64
  • Ishonch telefoni: 0(436) 227-72-22, +998 79 227-72-22

    Mualliflik huquqi © NKMK, 2015. Barcha huquqlar himoyalangan.   

Axborotdan foydalanish shartlari

Siz bu yerdasiz: Bosh sahifa 15.10.2015 dan №19 nashr 2- gidrometallurgiya zavodi unda ishlash yuksak sharaf