Система Orphus

Shriftning o'lchamini

Qarama-qarshilik

        
Siz bu yerdasiz: Bosh sahifa Выпуск №2 от 28.01.2016 Bilim, tajriba va qat’iyat – muvaffaqiyat kaliti

Bilim, tajriba va qat’iyat – muvaffaqiyat kaliti

Bukinay hududidagi uran konlarini o‘zlashtirish maqsadida tashkil etilgan 5-kon boshqarma ayni kunlarda 45 yoshga to‘ldi. Aslida bu erda uran qazib olish yuzasidan tajriba sinov ishlari oldinroq boshlangan edi. Sinov ishlari yaxshi natija bergach, ishlab chiqarish ob’ektlari qurilishi boshlanib ketdi. O‘shanda yillar o‘tib bu beadoq sahro bag‘rida zamonaviy texnika va texnologiyalarga asoslangan yirik sanoat korxonasiyu rivojlangan infratuzilmaga ega go‘zal shaharcha barpo bo‘ladi, deb kim o‘ylabdi deysiz.

O‘tgan tarixan qisqa davrda kon boshqarma hayotida yuksalishlar ham, murakkabliklar ham yuz berdi. Ayniqsa, sobiq Ittifoq parchalangandan keyin jamoa og‘ir sinovlarni boshidan kechirdi. Respublika hukumatining qorxona taqdirini hal qiluvchi qarori tufayli, kon boshqarma faoliyati to‘xtab qolishiga yo‘l qo‘yilmadi.  5-kon boshqarma bo‘linma sifatida Navoiy kon-metallurgiya kombinati tarkibiga kiritilgach, 1993 yildan boshlab ishlab chiqarishning o‘sish sur’atlari ta’minlandi. Bu, ijtimoiy soha va Zafarobod infratuzilmasi rivojlanishida ham o‘z aksini topdi.

Mustaqillik yillarida 5-kon boshqarma ahil jamoasi katta yutuqlarga erishdi. YAngi uran konlari foydalanishga topshirildi, barcha bo‘linmalar zamonaviy texnikalar bilan jihozlantirildi, ishlab chiqarishga innovatsion texnologiyalar tatbiq qilindi. Burg‘ilash va qazish ishlari hajmi oshishi natijasida tayyor mahsulot tannarxi pasayib, mehnat unumdorligi o‘sdi. Korxonada ishning ko‘zini biladigan, qiyinchiliklardan qo‘rqmaydigan, shijoatli, bilimli mutaxassislardan iborat jamoa shakllandi. Zafaroboddagi bolalar bog‘chasi rekonstruksiya qilinib, respublikada eng namunali maktabgacha tarbiya muassasasiga aylantirildi, zamonaviy madaniyat saroyi foydalanishga topshirildi. Bugungi kunda 5-kon boshqarma uran ishlab chiqarish bo‘yicha kombinatdagi etakchi bo‘linma hisoblanadi.

Shonli sana arafasida kon boshqarma direktori Valijon Fayzulloevich Nazarov bilan suhbatlashdik. U ishlab chiqarishni yuqori bosqichga ko‘tarish maqsadida mehnat jamoa tomonidan amalga oshirayotgan ishlar, istiqboldagi rejalar haqida quyidagilarni gapirib berdi.

- Kon boshqarmada rahbar sifatida ish boshlaganimga hali ko‘p bo‘lgani yo‘q. Korxona jamoasi hayoti, ishlab chiqarishning o‘ziga xos jihatlari, zafarobodliklarning turmush tarzi bilan yaqinroq tanishishga harakat qilyapman. «Sugrali» va «Shimoliy Konimex» konidagi ishlab chiqarish va maishiy ob’ektlarining foydalanishga topshirilishi jarayonida bu erda samimiy, bag‘rikeng, mehnatkash insonlar sidqidildan jonbozlik ko‘rsatib mehnat qilayotganiga guvoh bo‘ldim. 

Ayni paytda bor kuch va imkoniyatlarni tayyor mahsulot hajmini oshirishga safarbar qilayapmiz. Ishlab chiqarishni yangi, zamonaviy texnik vositalar bilan jihozlash, yuqori darajada avtomatlashtirish, yangi boshqaruv tizimlarini qo‘llash bugunning dolzarb vazifasidir. Geotexnologik konlarda texnologik jarayonlarni optimal boshqaruv tizimi joriy qilingan, bu boradagi ishlarni yanada takomillashtirish  yo‘lida izlanishlar olib borayapmiz.

Shuningdek, ishlab chiqarishning  qolgan tarmoqlarini ham avtomatlashtirish mahsulot sifatini yaxshilash, xarajatlarni kamaytirish, mehnat unumdorligini oshirish, ish sharoitlarini yaxshilashga xizmat qiladi. Masalan, yonilg‘i-moylash materiallarini texnologik hisobga olish, omborxonalar hisobotini avtomatlashtirilgan tarzda yuritish resurslardan oqilona foydalanish va uning sarfini masofadan turib nazorat qilish imkoniyatini tug‘diradi. Hozir ishchi-xodimlarning bajargan ish hajmiga qarab mukofotlash tizimini yo‘lga qo‘yish ustida ish olib borayapmiz. Mehnatni rag‘batlantirishning bu usuli avtobaza tizimida qo‘llanila boshlandi. 

2016 yilda ijtimoiy sohada ham bir qator ishlarni amalga oshirishga bel bog‘laganmiz. Kombinat bosh direktori Q.S.Sanaqulov tashabbusi bilan «Uchqun» bolalar sog‘lomlashtirish oromgohi hududida suzish havzasiga ega bo‘lgan basseyn, «Yoshlik» madaniyat saroyi oldida favvora qurishni rejalashtirganmiz.

Aniq maqsadga ega bo‘lgan professional bilimli, tajribali, qat’iyatli mutaxassislardan tashkil topgan hamda jadal o‘zgarib borayotgan davr bilan hamnafas qadam tashlaydigan mehnat jamoasigina o‘z maqsadiga erisha oladi. YAngi marralar sari intilish, doimo izlanib yashash, taraqqiyot va yangilanish yo‘lidan ilgarilab borish hayotiy shiorimizga aylanishi lozim.  Buning asosiy sharti esa tartib-intizom bo‘lishi kerak. Qaerdaki, ijro intizomi to‘g‘ri yo‘lga qo‘yilsa, o‘sha erda ish unumi yuqori bo‘ladi, rejalar o‘z vaqtida bajariladi. Bilim va tajribamiz, bor kuch-g‘ayratimizni ishlab chiqarish ko‘rsatkichlarini ko‘tarishga, mehnatkashlar turmush darajasini oshirishga qaratamiz. Zero, bilim, tajriba va qat’iyat muvaffaqiyat kalitidir.

Salima XOLDOROVA suhbatlashdi.

 

Ta'sis etuvchi - NKMK mehnat jamoasi

Gazeta materiallarini to’la yoki qisman qaytadan bosish tahririyatning yozma ruxsati bilan amalga oshiriladi. Tahririyatga kelgan qo’l yozmalar taqriz qilinmaydi va muallifga qaytarilmaydi. Gazeta NKMK bo’linmalari orasida tarqatiladi. 

Gazeta Navoiy viloyat matbuot va axborot boshqarmasida 2006 yil 21 dekabrda 07-025 raqam bilan ro’yxatga olingan.
MUHARRIR

Sadriddinov Nizomiddin Xayriddinovich 

- matbuot markazi boshlig’i.
TAHRIRIYAT MANZILI : 210100, Navoiy shahri, Navoiy ko’chasi 27, NKMK boshqarmasi. 
TELEFONLAR: : 77-464 (muharrir), 77-363 (texn. muharrir), 77-366, 77-464 (matbuot markazi), 77-566 (faks).

Biz bilan bog'lanish

  • Umumiy bo‘limi (devonxona): 0(436) 227-71-64, +998 79 227-71-64
  • Ishonch telefoni: 0(436) 227-72-22, +998 79 227-72-22

    Mualliflik huquqi © NKMK, 2015. Barcha huquqlar himoyalangan.   

Axborotdan foydalanish shartlari

Siz bu yerdasiz: Bosh sahifa Выпуск №2 от 28.01.2016 Bilim, tajriba va qat’iyat – muvaffaqiyat kaliti