Система Orphus

Shriftning o'lchamini

Qarama-qarshilik

        
Siz bu yerdasiz: Bosh sahifa 29.10.2015 dan №20 nashr Yaratuvchanlik hissi bilan

Yaratuvchanlik hissi bilan

Mamlakat iqtisodiyotida avtomobil transporti muhim ahamiyat kasb etadi. Bugungi kunda ishlab chiqarishning biror  sohasi rivojini avtomobil transportisiz tasavvur qilib bo‘lmaydi. Transportchilar Navoiy kon-metallurgiya kombinati jamoasi  erishayotgan ulkan muvaffaqiyatlarga munosib hissa qo‘shib kelmoqdalar. Markaziy kon boshqarmasiga qarashli Avtomobil transporti boshqarmasi nafaqat respublikamiz, balki butun dunyoda eng yirik va zamonaviy texnologik avtotransport korxonalari sirasiga kiradi.

Bundan qirq sakkiz yil muqaddam tashkil topgan bu birlashma ishchi-xizmatchilari, muhandis-texnik xodimlari zimmasiga «Muruntov» konidan qazib chiqarilayotgan tog‘ jinslarini omborlarga tashib berish, yuk ortish, suv sepish texnikalari, buldozerlar va boshqa konchilik transporti vositalari bilan ta’minlash, shuningdek, «Toshqo‘ra» koni, oltinni uyumda eritmaga o‘tkazish sexiga transport xizmati ko‘rsatish vazifalari yuklatilgan. Avtomobil transporti xodimlari kuni arafasida shuni alohida ta’kidlash kerakki, jamoa o‘z oldiga qo‘yilgan topshiriqlarni sharaf bilan uddalayapti. Ma’lumki, boshqarma transport asosini og‘ir yuk ko‘taradigan o‘ziag‘dargichlar tashkil etadi. Konning kengligi va chuqurligi oshgani sayin unda yuk ko‘tarish quvvati yuqoriroq transport vositalaridan foydalanila bordi. Konda dastlab 27 tonnalik BelAZ mashinalari ishlatilgan bo‘lsa, ayni paytda tog‘ jinslari yuk ko‘tarish quvvati 220 tonna bo‘lgan avtotransportlarda tashilmoqda. Ayniqsa, mustaqillik yillarida avtokorxonaning moddiy-texnika bazasini mustahkamlash, transport vositalarining ko‘proq va samaraliroq ishlashiga, iqtisodiy tejamkorlikka imkon beruvchi yangiliklar, mashina-mexanizmlardan samarali foydalanishga qaratilgan zamonaviy texnologiyalarni joriy etish, ta’mirlash-sozlash ishlarini takomillashtirish, ish sharoitlarini yaxshilashga alohida e’tibor berilmoqda. 

Og‘ir yuk ko‘tarish avtoag‘¬dargichlaridan foydalanish evaziga mehnat unumdorligi oshayapti, tog‘ jinslarni ma’lum masofaga tashishda sarflanadigan yonilg‘i sarfi kamaymoqda. SHu o‘rinda o‘sish sur’atlarini ifodalovchi bir raqamni keltirib o‘tmoqchiman. Istiqlol yillarida yuk tashish hajmi undan oldingi davrga solishtirganda 64 foizdan oshdi. So‘nggi yillarda Belorussiya avtomobil zavodi bilan o‘zaro manfaatli hamkorlikning tobora mustahkamlanib borayotganligi jamoa faoliyatidagi diqqatga sazovor jihatlardandir. Ana shu hamkorlikning samarasi o‘laroq boshqarma avtoparki BelAZda ishlab chiqarilgan qudratli zamonaviy mashinalar hisobidan yangilanmoqda. 2013 yilda Navoiy kon-metallurgiya kombinatida ilk bor 220 tonna yuk ko‘tarish quvvatiga ega 13 ta avtoag‘dargich qabul qilindi hamda «Muruntov» konida ishlatila boshlandi. 2014 yilda esa zavodda tayyorlangan, sisterna sig‘imi 110 kub metr bo‘lgan  birinchi raqamli suv sepish mashinasi ham aynan Markaziy kon boshqarmasiga qarashli Avtomobil transporti boshqarmasi texnika vositalari parkini to‘ldirganligi e’tiborga molikdir. Zarafshonlik transportchilarning belorus avtomobilsozlari bilan doimiy hamkorligi har ikkala tomon uchun foydali bo‘layapti. ATB mutaxassislarining takliflari bilan hamkorlar avtomobillariga ma’lum o‘zgartirishlar kiritib, avtokorxonaga Qizilqumning yozda jazirama, qishda izg‘irinli iqlim sharoitiga mos, kabinasida haydovchilar uchun qulayliklar yaratilgan  avtoag‘dargichlar etkazib berishayapti. 

Korxonada konchilik transport vositalarini ta’mirlash va xizmat ko‘rsatishning texnologik jarayonlari takomillashtirilmoqda. Xorijiy texnikalarga xizmat ko‘rsatadigan yuqori unumdorli yangi asbob uskunalar foydalanishga topshirildi.  Zamonaviy kon texnikalarida foydalanilayotgan materiallarga talabning oshayotganligini hisobga olib, boshqarmaning yonilg‘i moylash materiallari markaziy laboratoriyasida to‘liq rekonstruksiya ishlari amalga oshirildi. Laboratoriyada ishga tushirilgan yangi asboblar yordamida transportdagi nosozliklar aniqlanib, u yoki bu agregatda nazoratsinov ishlari o‘tkazilmoqda. Boshqarmada 2013 yilning oktyabr oyidan e’tiboran yonilg‘i-energetika resurslarini monitoring qilish byurosi faoliyat ko‘rsatib, ko‘chma tarkib yuz foiz «YOMM nazorati» dasturiy axborot tizimiga ulangan. Bu, texnika vositalarining ma’lum vaqt mobaynidagi ishini kuzatish, harakat marshruti, yonilg‘i sarfini nazorat qilish imkonini berayapti.  Mahalliylashtirish dasturi doirasida ehtiyot qismlar olish va agregatlarni ta’mirlash yuzasidan respublikamizdagi Jizzax akkumulyator zavodi, Andijon mexanika zavodi, «Qarshiradiator», «Tashkvatransservis», «Texplast», «Latofat» mas’uliyati cheklangan jamiyatlar bilan aloqalar kengaymoqda. Avtomobil transporti bosh¬qarmasining yirik gabaritli shinalarni ta’mirlash bo‘linmasi mehnat ahlining ishlariga xorijlik  hamkasb mehmonlar ham qoyil qolishayapti. Bu erda shinalar jahonga mashhur «Bridjstoun» firmasining TIP-TOP texnologiyasi va asbob-uskunalari qo‘llanilib ta’mirlanib, ulardan foydalanish muddati ancha uzaytirilmoqda. 

Ahil jamoa an’anaviy kasb bayramini munosib kutib olayapti. Avtokorxona haydovchilari, muhandis-texnik xodimlarining g‘ayrat-shijoati bilan joriy yilning to‘qqiz oyida 47 million kub metr tog‘ jinslari tashib berildi. Bu, o‘tgan yilning shu davridagiga nisbatan 5.2 foizga ko‘p, demakdir. Mehnat zafarlarida ishlab chiqarish ilg‘orlari va yuksak malakali mutaxassislardan avtoag‘dargich haydovchilari SHarif Alaev, Rasul Rustamov, dispetcher Lyudmila Petrova, chilangarlar Nurgali Agindikov, G‘afur Egamov, Qobil Toshev, G‘iyos Toshev, transport vositalaridan foydalanish bo‘limi boshlig‘i vazifasini bajaruvchi Valeriy Xashimov, reja iqtisod byurosi boshlig‘i Serik Umarov, texnologik transportni ta’mirlash sexi boshlig‘i Vladimir Achilov, ta’mirlash uchastkalari boshliqlari Fazliddin Xalilov, Ro‘zimurod Rahmatovlarning xizmatlari beqiyos bo‘layapti. Ayni paytda transportchilar yaratuvchanlik hissi, yutuqlarni yanada ko‘paytirish ishtiyoqi bilan mehnat qilmoqdalar.

 

Nizomiddin SADRIDDINOV

Учредитель - трудовой коллектив НГМК

Полная или частичная перепечатка материалов из газеты допустима только с письменного разрешения пресс-центра. Редакция знакомится с письмами читателей, не вступая в переписку. Газета распространяется по подразделениям НГМК.

Газета зарегистрирована в Агентстве по печати и информации Навоийского облхокимията 29 июня 2015 года. Регистрационный номер - 07-070, ISSN 2010-5266.

Редакция

Джураев Абдумажид Ирисович
Начальник пресс-центра НГМК - пресс-секретарь генерального директора НГМК..
АДРЕС РЕДАКЦИИ: 210100, г.Навои, улица Навои 27, управление НГМК.
ТЕЛЕФОНЫ: 77-464(редактор), 77-363(техн.редактор), 77-366, 77-464(пресс-центр), 77-566(факс).

Biz bilan bog'lanish

  • Umumiy bo‘limi (devonxona): 0(436) 227-71-64, +998 79 227-71-64
  • Ishonch telefoni: 0(436) 227-72-22, +998 79 227-72-22

    Mualliflik huquqi © NKMK, 2015. Barcha huquqlar himoyalangan.   

Axborotdan foydalanish shartlari

Siz bu yerdasiz: Bosh sahifa 29.10.2015 dan №20 nashr Yaratuvchanlik hissi bilan