Система Orphus

Shriftning o'lchamini

Qarama-qarshilik

        
Siz bu yerdasiz: Bosh sahifa Выпуск №23 от 08.12.2016 Toqatliga tog‘lar egar boshini

Toqatliga tog‘lar egar boshini

Hayoti davomida kishining boshi uzra g‘alaba-mag‘lubiyat, shodlik-musibat, kenglik-tanglik, to‘qlik-ochlik otlig‘ quyoshli shu’lalaru tashvish bulutlari suzib yuradi. Umri faqat shodliklardan iborat kimsani tarix bilmaydi. Ollohning sinovlariga sabr bilan bardosh berish esa har kimning ham qo‘lidan kelmaydi.

Qizilqum bag‘ridagi mo‘‘jaz shahar – Uchquduqda yashab, salkam qirq yildan beri ishlab chiqarishning qaynoq qozonida qaynab, qiyinchiliklarni mardonavor engib, qaddini tik tutib umrguzaronlik qilib kelayotgan Rahmat aka Mirzaev bilan bo‘lgan suhbat mening odam va olam haqidagi tushunchalarimni boyitib, inson ruhiyatining ochilmagan qirralarini namoyon qildi. Beixtiyor xayolimga xassos yozuvchi Tohir Malikning «Odamiylik mulki» kitobidagi quyidagi purma’no satrlar keldi: «Qanoatli kishini noyob donishmand deb ham izzat qiladilarkim, qanoat bandaga berilgan tuganmas ne’matdir».

Uchquduqliklar Rahmat akani nafaqat etuk mutaxassis, balki noyob donishmand sifatida ham qadrlashlaridan, e’zozlashlaridan suyundim. Bo‘lmasa, mustaqil yurolmaydigan insonni har tong opichlab ish joyiga, ish yakunida yana asrabgina elkalab uyiga kuzatib qo‘yisharmidi?...

Xatirchi tumanida tug‘ilib voyaga etgan Rahmat aka Uchquduqda ish boshlaganida endigina 18 yoshga kirgandi. Kombinatning beshigi sanalgan Shimoliy kon boshqarmasining Temir yo‘l sexiga montyor bo‘lib ishga kirgan qahramonimiz keyinchalik ishlab chiqarishning turli uchastkalarida sidqidildan mehnat qilib, tajriba orttirdi. Bu orada Toshkent davlat politexnika institutida sirtdan ta’lim olib, «Kon muhandisi» mutaxassisligiga ega bo‘ldi. Ko‘p yillar konboshqarmaning 2-geologiya-qidiruv partiyasida quduqlarni burg‘ilash chilangari, GQP ga qarashli «Yangi» karerida kon ustasi, Ta’mirlash-qurilish uchastkasi ustasi vazifalarida ishlab, barcha jamoalarda obro‘-e’tibor topdi.

Rahmat aka ayniqsa, 3-gidrometallurgiya zavodidagi apparatchi, kimyoviy himoya ishlari ustasi lavozimlaridagi qizg‘in faoliyatini, korxonani ishga tushirish arafasidagi va keyingi o‘ta mas’uliyatli kunlarni o‘zgacha quvonch va g‘urur bilan eslaydi:

– Mustaqillikning ilk yillari. Hukumatimiz Uchquduqda qurilishi to‘xtatib qo‘yilgan oltin saralash zavodini bunyod etishga qaror qildi. Buning uchun katta harakat boshlanib, unga butun respublikadan quruvchilar jalb qilindi. Men umrim bino bo‘lib bunday ulkan qurilish maydonini, buncha ko‘p odamni ko‘rmagan edim. Korxona juda qisqa muddatlarda qurib bitkazildi. O‘zbekiston Respublikasi Birinchi Prezidenti Islom Karimovning 3-gidrometallurgiya zavodining ishga tushirilishi munosabati bilan Uchquduqqa tashrif buyurishi katta tarixiy voqea bo‘ldi. Men res¬publika delegatsiyasini kutib olish komissiyasi tarkibida edim. O‘sha kunlardagi hayajonli daqiqalar, Islom Abdug‘anievich bilan bo‘lgan uchrashuvni hali-hanuz entikib xotirlayman».

Yurt rivoji, el ravnaqi yo‘lida mana shunday to‘lib-toshib mehnat qilayotgan bir paytda Rahmat Umarovich taqdirning og‘ir sinoviga duch keldi. Yigitlik davrida qattiq yiqilishdan olgan jarohati  asoratini ko‘rsatmay qolmadi. To‘rt-besh yildan keyin qo‘llari, o‘n etti yil o‘tib oyoqlari o‘ziga bo‘ysunmay qoldi. Shifokorlar Rahmat Umarovichga bunday holda ishlab chiqarishda faoliyat yuritishni taqiqlashdi. Ammo Shimoliy kon boshqarmasi rahbariyati kon-metallurgiya sohasining etuk bilimdoni, tajribali bu mutaxassisga javob berib yuborishga shoshmadi. Rahmat aka Shimoliy kon boshqarmasining Ishlab chiqarish – texnik bo‘limiga muhandis-dispetcherlikka ishga o‘tkazildi. Mana bir necha yillardan buyon u mazkur vazifada astoydil mehnat qilib, rah¬bariyatning ishonchini oqlab, yoshlarga namuna bo‘lib kelmoqda.

– Shunday paytlar bo‘ladiki, odamlardan xijolat chekaman. «Shu ahvolda ishlab nima qiladi?», deyishmayaptimikin, deb o‘ylayman. Bu haqda kon boshqarmasi direktori Yuriy Petrovich Zolotaryovga aytganimda, u «Siz bizga mutaxassis sifatida keraksiz,» - dedi. Bu so‘zlar menga qanot bag‘ishladi, hali korxona rivojiga hissa qo‘shish imkoniyatim borligidan  quvondim. Ish kunlarining birida dispetcherlar xonasiga kombinat bosh direktori Quvondiq Sanaqulovich kirib keldi. Men o‘tirgan joyimda salom berib, o‘rnimdan turolmasligimni bildirdim. Shunda bosh direktor qarshimga kelib o‘tirdi va suhbatga chog‘landi. Suhbatimiz sohani rivojlantirishning o‘ziga xos jihatlari haqida bo‘ldi. U kishiga fikrlarim ma’qul keldi shekilli, kon boshqarmasi direktoriga qarab:

–  Bu kishi qanday mutaxassis? - deb so‘radi.

– Rahmat Umarovichday mutaxassislar kam topiladi, - dedi direktorimiz.

Raxmat Mirzaev o‘z hayoti, mehnat faoliyati, atrofidagi yaxshi odamlar haqida to‘lib-toshib hikoya qildi. Ayniqsa, padaribuzrukvori  Umar ota hayotiga oid ibratli o‘gitlar bizda katta taassurot qoldirdiki, bu haqda gazetxonlarga alohida hikoya qilish niyatimiz bor.

Darhaqiqat, Rahmat Mirzaev bor bilimi, kuch-g‘ayratini ishlab chiqarish sohasiga bag‘ishlab, yigitlikning sho‘x-shodon yillarini Uchquduqning betizgin shamollariga berdi. Bag‘rikeng mehnatkash ayoli Maxsad opa bilan turmush qurib, uch farzandni voyaga etkazishdi. Farzandlari Odinaxol, Asliddin va Husniddinlar ham ota izidan borib, Shimoliy kon boshqarmaning turli bo‘linmalarida sidqidildan mehnat qilib kelmoqdalar. Bugun nabiralar qurshovida, baxtli-saodatli umr kechirayotgan Rahmat akaning hayoti haqida mulohaza yuritib, insondagi jismoniy noqislik hech qanday ahamiyatga ega emasligini, hamma gap uning iymoni butun, ruhiyati sog‘lomligida ekanligini angladim. Dono xalqimiz «Toqatliga tog‘lar egar boshini» deganda Rahmat aka kabi irodali insonlarni nazarda tutgan bo‘lsa ajabmas...

Salima XOLDOROVA,

Umrzoq BADALOV.

 

Учредитель - трудовой коллектив НГМК

Полная или частичная перепечатка материалов из газеты допустима только с письменного разрешения пресс-центра. Редакция знакомится с письмами читателей, не вступая в переписку. Газета распространяется по подразделениям НГМК.

Газета зарегистрирована в Агентстве по печати и информации Навоийского облхокимията 29 июня 2015 года. Регистрационный номер - 07-070, ISSN 2010-5266.

Редакция

Джураев Абдумажид Ирисович
Начальник пресс-центра НГМК - пресс-секретарь генерального директора НГМК..
АДРЕС РЕДАКЦИИ: 210100, г.Навои, улица Навои 27, управление НГМК.
ТЕЛЕФОНЫ: 77-464(редактор), 77-363(техн.редактор), 77-366, 77-464(пресс-центр), 77-566(факс).

Biz bilan bog'lanish

  • Umumiy bo‘limi (devonxona): 0(436) 227-71-64, +998 79 227-71-64
  • Ishonch telefoni: 0(436) 227-72-22, +998 79 227-72-22

    Mualliflik huquqi © NKMK, 2015. Barcha huquqlar himoyalangan.   

Axborotdan foydalanish shartlari

Siz bu yerdasiz: Bosh sahifa Выпуск №23 от 08.12.2016 Toqatliga tog‘lar egar boshini