Система Orphus

Shriftning o'lchamini

Qarama-qarshilik

        
Siz bu yerdasiz: Bosh sahifa Выпуск №23 от 14.12.2017 MISLSIZ EVRILISHLAR IJODKORI

MISLSIZ EVRILISHLAR IJODKORI

Uch ming yillik davlatchilik tarixiga ega, o‘ttiz ikki million nafardan ortiq mehnatkash va salohiyatli xalqi bo‘lgan qudratli davlatning jahon siyosiy sahnasida yangidan qad rostlayotganini butun jahon hamjamiyati ziyraklik bilan kuzatmoqda. YOlg‘on mulozamatlardan yiroq dono koreys xalqi O‘zbekiston Prezidenti SHavkat Mirziyoevning bir yillik rahbarlik faoliyatiga yuksak baho berib, bu haqda 50 ming nusxada kitob chop etgani buning yorqin isbotidir.

Kishilik taraqqiyotida shunday davrlar bo‘ladiki, butun boshli xalq tarixning o‘ziga xos sinovlaridan o‘tadi. Bunday paytda millat yuragi elu yurtga buyuk muhabbat bilan bog‘langan, Vatan kelajagi uchun butun borlig‘i bilan qayg‘uradigan YUrtboshiga ehtiyoj sezadi. Biroq bunday tarixiy shaxslar hamma vaqt ham tug‘ilavermaydi. 

YAratgan Egam sabr-qanoatli, duogo‘y o‘zbek xalqini adolatli, shijoatli, xalq dardi bilan yashaydigan xolis Yo‘lboshchi bilan siyladi. O‘zbekistondagi hayotning deyarli barcha sohasini qamrab olgan bir yil oldingi islohotlarning natijasi bugun bo‘y ko‘rsatib jahon ahlini lol qoldirmoqda. Uchqur vaqt tulporida yurt yukini zabardast elkasida ortmoqlab, jahdu shiddat bilan borayotgan Prezidentimiz SHavkat Mirziyoevning yorqin fenomeni nafaqat O‘zbekistonda, balki yaqin va olis yurtlarda ezgu o‘y-maqsadlar bilan yashayotgan millionlab insonlar qalbini yoritib, millatlararo totuvlik va hamjihatlikni qaror toptirayotganini yaqinda ota yurtim – Qirg‘izistonga qilgan safarim chog‘ida ko‘rib, guvoh bo‘ldim.

Mustaqillikning ilk kunlaridan boshlab Navoiy kon-metallurgiya kombinati tizimida konchi ishchi-xodimlar va yoshlar o‘rtasida milliy istiqlol g‘oyasini targ‘ib qilish yo‘lidagi halol mehnatlarim qadr topib, joriy yilning noyabr oyida Prezidentimiz SH.Mirziyoev farmoni bilan O‘zbekiston fuqaroligiga qabul qilindim. Fuqarolik pasportini qo‘lga olgach, ikki yillik ayriliqdan so‘ng otam va yaqin jigarlarim diydoriga oshiqdim. Navoiydan Andijon tomon borayapmanu, xayolimda bitta fikr charx uradi: «CHegaradan qanday o‘tarkinman?». Negaki, o‘tgan besh-o‘n yillarda chegara hududidan o‘tish men uchun adoqsiz azob-uqubat va tahqirlashlardan boshqa narsa emas edi.

Ming xil o‘y-fikrlar bilan Andijon viloyatidagi «Madaniyat» chegara postiga yaqinlashdim. Belgilangan tartibda deklaratsiya to‘ldirib, bojxona xodimlariga yo‘liqdim. Xodimlarning chiroyli muomala madaniyati, samimiyati ko‘nglimni ko‘tardi. Ular yuklarimni maxsus tekshiruv lentasidan o‘tkazishgach, oq yo‘l tilab kuzatib qolishdi. Bu izzat-hurmatdan xursand bo‘lib, Qirg‘iziston chegara posti tomon yo‘naldim. Hududdagi chegarachi askarlarning intizomi, mehribonligi hayratimni oshirdi. Bojxona xodimlari ham xushmuomalik bilan «Xush kelibsiz», - deya qarshi olishdi. YUklarimga, hujjatlarimga biron bir e’tiroz bo‘lmadi.

Bu go‘zal iltifotlardan ko‘nglim chog‘ bo‘lib, «Madaniyat-Bozor­qo‘rg‘on» yo‘nalishidagi avtoulovga yaqinlashdim. Qirg‘iz millatiga mansub haydovchidan tortib, hamrohlik qilayotgan yo‘lovchilarning yumshoq muomalasi, hazil-mutoyibasi men uchun kutilmagan g‘ayritabiiy bir holat edi. CHunki bundan oldingi tashriflarimda bu erdagi keskin vaziyat, odamlarning asabiy kayfiyati va qo‘pol muomalalari xayolimda muhrlanib qolgandi.

Orasi ming kilometr ham chiqmaydigan ota uyimga pasport va chegara muammolari sabab ikki yil degandagina tashrif buyura oldim. Bu, otam va jigarlarim uchun haqiqiy bayramga aylanib ketdi. «O‘zga yurtda qolgan qizim», - deya farzandi diydoriga zor o‘tayotgan g‘amgusor otam pasportimni qo‘liga olib, yosh boladek suyunishini aytmaysizmi? «Voh, buni qaraya, buni qara, iloji bor ekan-u», - deb u yoqdan bu yoqqa yurib quvonishini ko‘ring... Oh, u bu kunlarni qanday kutdi.

Kelgan kunimning ertasiga uyimizda katta izdihom bo‘ldi. Hovlimiz to‘la odam. YOshu qari, erkagu ayolning kayfiyati charog‘on. Hamma birdek xursand, hamma birdan gapiradi. Gap ko‘proq O‘zbekistondagi mislsiz o‘zgarishlar, chegaralarning ochilishi, qirg‘iz va o‘zbeklarning bir-biriga bo‘lgan iliq munosabatlari haqida bo‘ldi. Ora-chirada menga ham savol berib qo‘yishadi:

– O‘zbekiston xuddi televizorda ko‘rsatganday chiroylimi? Rostdanam shunaqa o‘zgarishlar bo‘layaptimi? 

Javob berishga ulgurmayman. Gapni chegaralar ochilishi bilan O‘zbekistonga kelib, mehmon bo‘lib ketishga ulgurgan bir xolam ilib ketadi: 

– Voy, nima deyapsiz, O‘zbekiston televizordagidanam chiroyli. Bu qurilishlar, bu obodonchiliklar... Ko‘rib esingiz og‘ib qoladi. Ana O‘zbekiston, mana O‘zbekiston.

Bag‘ri bahor yurtdoshlarimni kuzatib huzur qilaman, diltortar gaplariga zavqim keladi. Qalbimda bolalarimni bag‘rimga bosib yashayotgan tinch-osuda makonim, halol mehnatlarim, ijodiy ishlarim qadr topayotgan baxtli oshiyonim – O‘zbekistondan faxrlanish tuyg‘ulari jo‘sh uradi. Suhbat endi ulug‘vor ishlar sohibi, mislsiz evrilishlar ijodkori O‘zbekiston Prezidenti SHavkat Mirziyoevga borib taqaladi. Mehmonlar YUrtboshimizga sog‘lik, omonlik, uzoq umr tilab duolar qilishadi. Eng qizig‘i, sodda va samimiy yurtdoshlarim hamma tilaklarini menga qarab aytishadi. Xuddiki, O‘zbekiston menikidek. Xuddiki, men ularning hamma tilaklarini to‘g‘ri Prezidentga borib etkazadigandek...

Ha, ming yillardan beri quda-anda bo‘lib inoq yashab kelgan ikki xalq o‘rtasida oxirgi yillarda sodir bo‘lgan kelishmovchilik va yovqarashlardan qalblari ozurda qirg‘izistonlik o‘zbeklarning O‘zbekistonning dono Yo‘lboshchisiga ixlosi baland. SHavkat Miromonovichning bag‘rikenglik bilan qilayotgan ulug‘vor harakatlari tufayli qirg‘iz va o‘zbek xalqlari o‘rtasidagi munosabatlar iliqlashib, ular yana do‘st-qadrdon bo‘lganidan ko‘ngli to‘lgan, yillab ko‘rmagan jigarlarini ko‘rib bag‘ri to‘lgan vatandoshlarimning samimiyatga yo‘g‘rilgan dil so‘zlarini qalbimga jo qilib, ularni tezroq o‘zbekistonliklarga etkazishga shoshildim. Zero, o‘zbek xalqining tinch-omonligi, farovonligi yo‘lida fidoyilik va qat’iyat bilan mehnat qilayotgan YUrtboshimiz YAratganning bizga bergan buyuk ne’mati ekanligini, biz har bir ishda unga madadkor bo‘lishimiz va bu dorilamon kunlar qadriga etishimiz zarurligini unutmasligimiz kerak.

Salima XOLDOROVA.

 

Biz bilan bog'lanish

  • Umumiy bo‘limi (devonxona): 0(436) 227-71-64, +998 79 227-71-64
  • Ishonch telefoni: 0(436) 227-72-22, +998 79 227-72-22

    Mualliflik huquqi © NKMK, 2015. Barcha huquqlar himoyalangan.   

Axborotdan foydalanish shartlari

Siz bu yerdasiz: Bosh sahifa Выпуск №23 от 14.12.2017 MISLSIZ EVRILISHLAR IJODKORI