Система Orphus

Shriftning o'lchamini

Qarama-qarshilik

        
Siz bu yerdasiz: Bosh sahifa 24.12.2015 dan №24 nashr Yangi dovonlarga otlangan karvon

Yangi dovonlarga otlangan karvon

Bu kun aql-zakovatli, irodasi kuchli, maqsadi qat’iy zabardast o‘g‘lonlarning shaxdu shiddatidan ayozli qishdan darak berib esayotgan izg‘irinli shamol ham ortga chekindi. Navoiy kon-metallurgiya kombinati va 5-kon boshqarmasi rahbariyati, bosh mutaxassislaridan tarkib topgan guruh eng uzoq «Sugrali» konida jamuljam bo‘ldi. Asosiy Qonunimiz qabul qilingan kunning erta tongida Qizilqumning adoqsiz kengliklari aro O‘zbekiston Respublikasi Davlat madhiyasi yangradi.

Yurtimiz iqtisodiyotini rivojlantirish yo‘lida bilim, tajriba va imkoniyatlarini ishga solib, g‘ayrat-shijoat namunalarini ko‘rsatayotgan aksariyat mardu maydon yigitlardan tashkil topgan 5-kon boshqarmasi mehnat jamoasi va Zarafshon qurilish boshqarmasi ishchi-xodimlarining sa’y-harakatlari bilan «Sugrali» konida qurib bitkazilgan qator ijtimoiy va ishlab chiqarish ob’ektlarning foydalanishga topshirilishi chinakam bayramga aylanib ketdi. Tantanada Navoiy kon-metallurgiya kombinati bosh direktori, O‘zbekiston qahramoni Quvondiq Sanaqulov murakkab iqlim sharoitlarida jonbozlik ko‘rsatayotgan ishchi-xodimlar  va quruvchilarga fidokorona mehnatlari uchun minnatdorchilik bildirdi hamda  barchani bugungi shodiyona munosabati bilan qutladi.

Asriy sahro bag‘rida zamonaviy axborot-kommunikatsion texnologiyalar bilan jihozlangan ma’muriy-maishiy majmua hamda xalqaro standartlar talablariga to‘liq javob beradigan innovatsion uskunalar o‘rnatilgan eritmalarni qayta ishlash uchastkasining barpo etilishini mo‘‘jizaga qiyoslasa bo‘ladi. Konda issiqlik energiyasini 10 foizgacha iqtisod qilish imkonini beradigan yangi rusumdagi ekonomayzer qozonxona, yoz mavsumida suvni quyosh energiyasi orqali isitib beradigan geliokollektorlar o‘rnatilishi, turli ixtisoslashtirilgan dastgohlarga ega ta’mirlov-mexanika ustaxonasining barpo etilishi, shubhasiz, ish samaradorligini oshirishga xizmat qiladi.

Eng quvonarlisi, yuz o‘rinli shinam oshxona hamda «Avtomat» funksiyali zamonaviy kir yuvish, quritish, tikuv mashinalari, dazmollash presslari bilan jihozlangan maishiy kombinat foydalanishga topshirildi. Issiq va yorug‘ echinish-kiyinish, yuvinish xonalari, zamonaviy sanitariya uzellariga ega ushbu inshoot  og‘ir ishlab chiqarishda band bo‘lgan  konchilarga ish kuni yakunida huzur bag‘ishlashi tabiiy.

Tadbirda mazkur ob’ektlarning ishga tushirilishiga munosib hissa qo‘shgan 4-geotexnologik kon bosh mexanigi Mustaqim Ergashev, chilangar-ta’mirlovchi Avaz Turdiev, duradgor Najmiddin Adizov, 5-kon boshqarmasi markaziy issiqlik va suv ta’minoti uchastkasi boshlig‘i Dusebay Xudoyberdiev, Zarafshon qurilish boshqarmasi jamoasi vakillari Anatoliy Dushkin, Ilhom Tuyg‘unov, Erkin Samatov, Sayfiddin Amonov, Ulug‘bek Boboqulov, Alisher Qozoqov,  Zamira Baymaxanova, SHerzod Jabborov, G‘abiddin Abduramonovlarga  6-Birlashgan kasaba uyushma qo‘mitasining qimmatbaho sovg‘alari topshirildi.

Tushlik paytida bayram shodiyonalari kon boshqarmasining «Shimoliy Konimex» konida davom etdi. Mazkur kon hududida ham 2-geotexnologik kon jamoasi uchun zamonaviy ma’muriy-maishiy majmua, eritmalarni qayta ishlash uchastkasi, qozonxona va ta’mirlash-mexanika ustaxonasi foydalanishga topshirildi. Bugungi kunda geotexnologik kondagi yangidan ishga tushirilgan mahsuldor eritmalarni qayta ishlash uchastkasidagi barcha texnologik jarayonlar to‘liq avtomatlashtirilganligi tufayli  mehnat resurslarini iqtisod qilishga erishiladi. Eng zamonaviy o‘lchov vositalari o‘rnatilishi esa u yoki bu jarayonlarni katta aniqlik bilan amalga oshirishga yordam berib, ishlab chiqarilayotgan mahsulot miqdorini ko‘paytirish va sifatini yaxshilashga imkon yaratadi.  

Yangi qozonxonaga avtomatik rejimda ishlaydigan KPA-2,5 rusumli ixcham bug‘ qozoni o‘rnatildi. Bu  foydali ish koeffitsientini oshiradi va kon boshqarmasining ishlab chiqarish ob’ektlariga issiqlik energiyasini uzluksiz etkazib beradi.

NKMK bosh direktori Q.Sanaqulov foydalanishga topshirilayotgan ob’ektlar bilan alohida tanishib chiqar ekan, ularda yaratilgan sharoitlarni yanada yaxshilash yuzasidan o‘z fikr-mulohazalarini bildirib, zarur ko‘rsatmalar berdi. Tadbirda ob’ektlarda olib borilgan keng ko‘lamli qurilish va obodonlashtirish ishlarida astoydil ishtirok etgan bir guruh fidoiy insonlar sovg‘alar bilan taqdirlandilar. 2-geotexnologik kon bosh muhandisi Otabek Ro‘ziev, elektr va gaz payvandchisi Yigitali Umarov, kamyob va nodir metallarni  ajratish bo‘yicha apparatchi Asliddin Ahmedov, nazorat-o‘lchov asboblari va avtomatika sozlovchisi Igor Samalykov, Zarafshon qurilish boshqarmasi ishchilari Xolmat Jo‘raev, Sherzod Hasanov, Ulug‘bek Sharopov, Akmal Normurodov, Rustam Yusupov, Dilshod Rajabovlar shular jumlasidandir. Kombinat kasaba uyushma Kengashi tomonidan 4-geotexnologik kon jamoasiga televizor, 2-geotexnologik kon jamoasiga mikroto‘lqinli pech va elektr choynak¬lar taqdim qilindi.

Bayram tantanasi konchilar shaharchasi - Zafarobodga ko‘chdi. «Farhod» va «Yoshlik» madaniyat saroylari ijodiy jamoalarining dilrabo kuy-qo‘shiqlardan iborat chiqishlari bayram ishtirokchilariga o‘zgacha shukuh bag‘ishladi.

G‘ayrat-shijoatga to‘lib toshgan va qalbida kelajakka ishonch ruhi mujassam jonkuyar mutaxassis kadr¬lardan iborat kon boshqarmasining ahil jamoasi Valijon Nazarov boshchiligida yangi dovonlarni ko‘zlab dadil odimlamoqda. Biz yaqin kunlarda 45 yilligini nishonlaydigan, 5 ta kondan iborat 5-kon boshqarmasi mehnat ahlining ishlari har doim «5» bo‘lishini istaymiz.

Jo‘rayev Abdumajid Irisovich

Matbuot markazi boshlig‘i – NKMK bosh direktorining matbuot kotibi – axborot siyosati masalalari bo‘yicha maslahatchisi.

+ (998 79) 2277-473

Sadriddinov Nizomiddin Xayriddinovich

“Konchilar hayoti” gazetasi muharriri.

+ (998 79) 2277-464

Biz bilan bog'lanish

  • Umumiy bo‘limi (devonxona): 0(436) 227-71-64, +998 79 227-71-64
  • Ishonch telefoni: 0(436) 227-72-22, +998 79 227-72-22

    Mualliflik huquqi © NKMK, 2015. Barcha huquqlar himoyalangan.   

Axborotdan foydalanish shartlari

Siz bu yerdasiz: Bosh sahifa 24.12.2015 dan №24 nashr Yangi dovonlarga otlangan karvon