Система Orphus

Shriftning o'lchamini

Qarama-qarshilik

        
Siz bu yerdasiz: Bosh sahifa Выпуск №3 от 11.02.2016 Qoyaga chiqqan cho‘qqini ko‘zlar

Qoyaga chiqqan cho‘qqini ko‘zlar

Uchquduqni Navoiy kon-metallurgiya kombinatining beshigi deyishadi. Bu haq gap. O‘tgan asrning ikkinchi yarmida asriy Qizilqum bag‘rida uranning katta zaxiralari borligi aniqlanishi cho‘lda  zamonaviy shahar va korxona qad rostlashiga zamin yaratdi. Sahro er osti boyliklarini o‘zlashtirish  maqsadida tashkil etilgan Shimoliy kon boshqarmasi hozirgi paytda kombinatning ko‘p tarmoqli yirik bo‘linmalaridan biri bo‘lib, uning tarkibida oltin va uran ishlab chiqaradigan korxonalar faoliyat ko‘rsatayapti. Uranni er ostida eritmaga o‘tkazib qazib olish usuli O‘zbekistonda birinchi bo‘lib bundan ellik to‘rt yil muqaddam aynan ana shu bo‘linmada boshlangan edi. Kon boshqarmasiga qarashli geotexnologik konda ayniqsa, so‘nggi yillarda quvonchli ko‘rsatkichlarga erishilmoqda. Fikrimni isboti sifatida quyidagi raqamlarga e’tiboringizni qaratmoqchiman: keyingi uch yilda reja muvofiq tarzda 106, 120, 108 foizga uddalandi. Eng muhimi, yillik o‘sish sur’ati 3-5 foizni tashkil etmoqda. Geotexnologik quduqlarni jihozlash va ta’mirlash  uchastkasida burg‘ilash ishlarini bajarishda yuqori natijalar qo‘lga kiritilayapti.


Uran asosan Uchquduq, Moylisoy, Kindiktepa singari konlardan olinayotgan bo‘lsada, boshqa maydonlarni o‘zlashtirishga ham etarli e’tibor berilayotganligi tufayli tayyor mahsulot ishlab chiqarish topshirig‘i oshirib uddalanayapti. Tabiiy uranni gidrometallurgik jihatdan konsentratlash bilan shug‘ullanadigan mahsuldor qorishmani qayta ishlash uchastkasi jamoasi amalga oshirayotgan ishlar maqtovga munosib. Ilmiy-texnik taraqqiyotni hisobga olgan holda uchastkada uranni qayta ishlash bo‘yicha texnologik jarayonlarni takomillashtirish, modernizatsiyalash va avtomatlashtirish yuzasidan qator tadbirlar amalga oshirilganligi reja bajarilishini ta’minlash, mahsulot tannarxini arzonlashtirishda muhim ahamiyat kasb etayapti.


Moylisoy konida ruda uyumining murakkab geologik va gidrogeologik sharoitlarga egaligi uni o‘tgan asrning oxirlarida sanoat asosida o‘zlashtirishga imkon bermadi. Mazkur konni o‘zlashtirishning qulay texnologiyasini tanlash uchun tajriba ishlari olib borildi. Bugungi kunda konda quduqlar yordamida er ostida eritmaga o‘tkazish usuli qo‘llanilmoqda. Shimoliy kon boshqarmasi va geotexnologik kon mutaxassislari uchastkada er osti boyligini qazib chiqarish hajmini oshirish, tannarxini kamaytirishning har tomonlama qulay usullarini qidirib topish yo‘lida jiddiy izlanishlar olib borayaptilar. Bu, istiqbolda yaxshi samaralar berishi aniq.
Geotexnologik konda olti yuz nafardan ortiq ishchi-xizmatchilar va muhandis-texnik xodimlar xizmat qilishadi. Jamoaga izlanuvchan muhandis Fazliddin Mamajonov etakchilik qilmoqda. Uning Shimoliy kon boshqarmasi ta’mirlash-mexanika sexida oddiy chilangarlikdan boshlab, sex boshlig‘i lavozimigacha bo‘lgan xizmat pillapoyalarini bosib o‘tgan davrida to‘plagan bilim va tajribasi ishni zamon talabi darajasida tashkil etish hamda iqtisodiy tejamkorlikka erishishda qo‘l kelmoqda. Yosh rahbarning ratsionalizatorlik taklifini qo‘llanish evaziga geotexnologik quduqlarini jihozlash uchun ishlatiladigan shag‘alli qum bevosita konning o‘zida ishlab chiqarilmoqda. Ilgari kerakli o‘lchamdagi shag‘al olish uchun zarur qum Zarafshon qurilish boshqarmasiga qarashli qum yuvish fabrikasidan keltirilardi. Bunda qum qo‘l kuchi yordamida elanar, uning yarmi talab qilingan o‘lchamga mos kelmasdi. Kon mutaxassislarining kuchi bilan qumni elash uchun tebranma saralash qurilmasi ishga tushirildi. Endilikda shag‘alli qum yaqin karerlardan tashib keltirilayotganligi hisobidan transport xarajati kamaymoqda. Saralash qurilmasida elangan qumdan uch xil o‘lchamdagi shag‘al ajralayapti va u o‘lchamiga mos ravishda qurilish ishlari, quduqlarni jihozlash, yo‘llarni ta’mirlashda ishlatilayapti.
Korxonada mahsulot ishlab chiqarish davlat rejasining muddatidan ilgari bajarilishiga arzigulik hissa qo‘shib kelayotgan fidoyi mutaxassislar va ilg‘or ishchi-xodimlardan bosh muhandis Dilshod Ikromov, bosh geotexnolog Murod Abdiev, bosh geofizik Erkin Mahmudov, mahsuldor qorishmani qayta ishlash uchastkasi boshlig‘i G‘ayrat Kattaqulov, 2-geotexnologik uchastka boshlig‘i Ilhom Utamuratov, quduqlarni burg‘ilash va foydalanish bo‘yicha chilangar Dmitriy Shevchenkolar uchinchi darajali «Konchilik shuhrati» ko‘krak nishoniga sazovor bo‘lganlar. Birinchi darajali gidrogelog Margarita Lomovseva «NKMK faxriysi» degan yuksak nom sohibidir. Geotexnologik quduqlar operatori Mayrambek Oshanov, kompressor qurilmalari mashinisti Kenshilik Jumabekov, stanokchi Vahobjon Isanov, chilangar Ayrat Rakaev, nodir er elementlarini ajratish bo‘yicha apparatchi Aziz Teshaev, dispetcher  Latif Hamroev, burg‘ilash qurilmasi mashinisti Anuarbek Jumabekov kabi o‘z kasbining ustalari nafaqat kon, balki Shimoliy kon boshqarmasi ko‘pming kishilik jamoasi orasida ham xurmat-e’tibor qozonishgan. Ular o‘zlarining boy bilim va tajribalarini yosh ishchi-xodimlarga qunt bilan o‘rgatishayapti. Darvoqe, korxona kelajagini o‘ylab, konda yosh mutaxassislar bilan ishlash yaxshi yo‘lga qo‘yilgan. Jamoa safi oliy va o‘rta maxsus bilim dargohlari bitiruvchilari hisobiga yildan-yilga kengayib bormoqda. Birgina 2015 yilda Navoiy davlat konchilik instituti va Toshkent davlat texnika universitetini tugallagan o‘n nafar, Uchquduq, Qo‘shrabot, Shofirkon, Kattaqo‘rg‘on, Karmana kasb-hunar kollejlarini tugatgan 33 nafar yoshlar geotexnologik konda ish o‘rniga ega bo‘ldilar. Jamoa ishlab chiqarish ob’ektlari hududi, shuningdek, Uchquduq shahri ko‘cha va xiyobonlarini obodonlashtirish maqsadida o‘tkazilayotgan shanbaliklarda faol ishtirok etib kelmoqda. O‘tgan yili umumxalq hasharlarida kon ma’muriy binosi yonida ishchi-xizmatchilar uchun ovqatlanish xonasi qurib bitkazilib, foydalanishga topshirildi.
«Qoyaga chiqqan cho‘qqini ko‘zlaydi», degan naql bor. Geotexnologik kon ishchi-xizmatchilari, mutaxassislari joriy yilda uran ishlab chiqarish hajmini yanada ko‘paytirish, yillik rejani 20 dekabrgacha ado etishga ahd qilishgan. Jamoaning ahilligi, har bir uchastkada erishilayotgan yaxshi natijalar, yanvar oyi rejasining oshirib bajarilganligi bu yuksak marra sharaf bilan zabt etilishidan  dalolat berayapti.


Nizomiddin SADRIDDINOV.
Jumamurot MIRZAEV olgan suratlar.

Jo‘rayev Abdumajid Irisovich

Matbuot markazi boshlig‘i – NKMK bosh direktorining matbuot kotibi – axborot siyosati masalalari bo‘yicha maslahatchisi.

+ (998 79) 2277-473

Sadriddinov Nizomiddin Xayriddinovich

“Konchilar hayoti” gazetasi muharriri.

+ (998 79) 2277-464

Biz bilan bog'lanish

  • Umumiy bo‘limi (devonxona): 0(436) 227-71-64, +998 79 227-71-64
  • Ishonch telefoni: 0(436) 227-72-22, +998 79 227-72-22

    Mualliflik huquqi © NKMK, 2015. Barcha huquqlar himoyalangan.   

Axborotdan foydalanish shartlari

Siz bu yerdasiz: Bosh sahifa Выпуск №3 от 11.02.2016 Qoyaga chiqqan cho‘qqini ko‘zlar