Система Orphus

Shriftning o'lchamini

Qarama-qarshilik

        
Siz bu yerdasiz: Bosh sahifa Выпуск №4 от 22.02.2018 BUYUK NAVOIYGA YUKSAK EHTIROM

BUYUK NAVOIYGA YUKSAK EHTIROM

O‘zbek adabiyotining asoschisi, buyuk shoir va mutafakkir Alisher Navoiyning nomi jahonning daho ijodkorlari qatoridan munosib o‘rin egallaydiki, bu har bir yurtdoshimiz qalbida cheksiz faxr-iftixor tuyg‘usini uyg‘otadi.

SHu boisdan ulug‘ alloma tavallud topgan kun ma’naviy hayotimizda ulkan voqea, bayram sifatida nishonlanadi. Bu, hazrat nomi bilan atalgan go‘zal va zamonaviy shahar aholisiga ko‘proq daxldordir. 6-7 fevral kunlari viloyatimiz markazida shoir tavalludining 577 yilligi munosabati bilan «Alisher Navoiy ijodiy merosining umumbashariyat ma’naviy- ma’rifiy taraqqiyotidagi o‘rni» mavzusida II xalqaro ilmiy konferensiya bo‘lib o‘tdi. Respublikamizning taniqli adabiyotshunoslaridan tashqari Eron, Turkiya, Afg‘oniston, Ozarbayjon, Mongoliya, Rossiya, Ukraina, Tojikiston, Qozog‘iston kabi davlatlarning navoiyshunos olimlari ishtirok etgan xalqaro anjuman 6 fevral erta tongdan buyuk ajdodimizga shahrimizning markaziy istirohat bog‘ida o‘rnatilgan haykal poyiga gulchambarlar qo‘yishdan boshlandi. Korxona va tashkilotlar, mehnat jamoalari vakillari, talaba va o‘quvchi yoshlar ulug‘ bobokalonimizga yuksak ehtiromlarini namoyish etdilar.

Xalqaro konferensiyaning akademik Baxtiyor Nazarov boshqarib borgan va Navoiy ijodining jahonshumul ahamiyati, xorijiy davlatlarda o‘rganilishi, bugungi kunda barkamol insonlarni tarbiyalashdagi o‘rni masalalariga oid ma’ruzalardan iborat  yalpi majlisi YOshlar markazi majlislar zalida davom etdi.

Viloyat hokimi Q.Tursunov xalqaro ilmiy anjuman qatnashchilarini samimiy qutlab, Navoiy asarlarini o‘qishimiz va yaxshi bilishimiz zarurligini ta’kidladi. So‘z mulkining sultoni o‘z ijodida insonparvarlik g‘oyalarini ilgari surgan. Uning doston va g‘azallari qator xorijiy tillarga tarjima qilingani va sevib o‘qilayotganligi bejizga emas. Respublika Ma’naviyat markazi rahbari A.Qodirov, akademik N.Karimov, Navoiy kon-metallurgiya kombinati bosh direktori Q.Sanaqulovlarning chi­qishlari qiziqish bilan kutib olindi. Bobur xalqaro jamoat fondi rahbari Z.Mashrabov fondning adabiy merosimizni to‘plash, xalq mulkiga aylantirish, yurtimiz shuhratini olamga yoygan ajdodlarimiz mangu qo‘nim topgan muqaddas qadamjolarni obodonlashtirish borasidagi xayrli ishlari xususida gapirdi. O‘zbekistonning Ukrainadagi elchisi A.Abdullaevning konferensiyada Navoiyning «Farhod va SHirin» dostoni ukrain tiliga o‘girilgani va kitob holida chop etilgani haqida aytgan so‘zlarini ishtirokchilar hayajon bilan tingladilar. Elchi bu asarni ingliz tiliga tarjima qilib, kitobning taqdimot marosimini Oksford universitetida o‘tkazishga bosh bo‘lish niyatida ekanligini bildirdi. Xalqaro anjumanda Turkiyaning Egey universiteti Turk dunyosi tadqiqotlari instituti professori Fikret Turkmen, Eronning Tarbiyati mudarris universiteti professori Ibrohim Xudoyor, Ozarbayjon Fanlar akademiyasining Nizomiy nomidagi ozarbayjon-turkman-o‘zbek adabiy aloqalar instituti sektor mudiri, filologiya fanlari doktori, professor Olmos Ulvi, Tojikistonning Xo‘jand davlat universiteti professori, akademik Abdusalom Abduqodirov, Olmaota shahridagi Qozoq milliy universiteti dekani, professor Azamat Akbarov, Ozarbayjon Milliy fanlar akademiyasi akademigi, professor Moxsun Nagisoylu, Mongoliya Fanlar akademiyasi Til va adabiyot instituti etakchi ilmiy xodimi Alimaa Ayuuashjav, Rossiyaning Sankt-Peterburg universitetidan filologiya fanlari nomzodi Aleksey Pilev, O‘zbekiston Fanlar akademiyasi O‘zbek tili, adabiyoti va folklori instituti o‘zbek adabiyoti tarixi bo‘limi mudiri, professor Ibrohim Haqqul va boshqa olimlarning ma’ruzalarida Alisher Navoiy ijodining o‘ziga xos qirralari, qardosh xalqlar adabiy muhitiga ijobiy ta’siri chuqur ochib berildi.

Ilmiy konferensiyaning tushdan so‘nggi sho‘‘ba yig‘ilishlarida Alisher Navoiyning shoir, mutafakkir, davlat arbobi sifatidagi faoliyatiga doir qiziqarli ma’ruzalar tinglandi. SHuningdek, xorijdan kelgan navoiyshunos olimlar ishtirokida matbuot anjumani o‘tkazildi.

Adabiyotimiz quyoshi Alisher Navoiy doston, g‘azal va ruboiylarida insonlarni o‘zaro do‘stlik, birodarlik, halollik, mehr-muhabbat, ezgu ishlarga da’vat etgan. Konferensiya dasturi doirasida «Farhod» madaniyat saroyida tashkil etilgan adabiy-badiiy kechada yangragan kuy, qo‘shiqlar, sahna ko‘rinishlarida ham ana shu ruh yolqinlanib turdi. Kechada maktab o‘quvchilari o‘rtasida o‘tkazilgan «YOsh navoiyxonlar» tanlovi viloyat bosqichi g‘oliblariga mukofotlar topshirildi. Tanlovda uchinchi o‘rinni olgan Navoiy shahridagi 8- maktab o‘quvchisi Quvonchbek G‘aybullaev, 11- maktab o‘quvchisi Lobar Jalolova, Karmana tumanidagi 2- maktab o‘quvchisi Marvarid Akramovalar noutbuk, ikkinchi o‘ringa sazovor bo‘lgan 12- maktab o‘quvchisi E’zoza Umrzoqova hamda 7- maktab o‘quvchisi Faxriyor Baxtiyorovlar zamonaviy kompyuter bilan taqdirlandilar. Karmana tumanidagi 4- maktabning 8- sinf o‘quvchisi Ibrohim G‘afforov tanlovda birinchi o‘rinni egalladi va unga viloyat hokimi Q.Tursunov tantanali tarzda Prezident sovg‘asi – «Spark» avtomobilining kalitini topshirdi.

Navoiy o‘zi orzu qilganidek, besh yarim asrdan ko‘proq davrdan so‘ng ham ellarni-ellarga, dillarni-dillarga bog‘lamoqda. Konsertda o‘zbek, ozarbayjon, tojik tillarida qo‘shiqlar yangradi. O‘zbekiston xalq artistlari Munojot Yo‘lchieva, YOdgor Sa’diev, O‘zbekiston xalq hofizi Mahmudjon Tojiboevlarning Navoiy g‘azali bilan ijro etgan qo‘shiqlari barchaga zavq-shavq bag‘ishladi. Konferensiya qatnashchilari 7 fevral kuni viloyatimiz markazining diqqatga sazovor joylari, oliy ta’lim muassasalarida bo‘ldilar.

Nizomiddin SADRIDDINOV.

Viktor YAKOVLEV olgan surat.

 

Biz bilan bog'lanish

  • Umumiy bo‘limi (devonxona): 0(436) 227-71-64, +998 79 227-71-64
  • Ishonch telefoni: 0(436) 227-72-22, +998 79 227-72-22

    Mualliflik huquqi © NKMK, 2015. Barcha huquqlar himoyalangan.   

Axborotdan foydalanish shartlari

Siz bu yerdasiz: Bosh sahifa Выпуск №4 от 22.02.2018 BUYUK NAVOIYGA YUKSAK EHTIROM