Loyihalar - kelajakka xizmat qiladi

Yangi innovatsion g‘oyalarning paydo bo‘lishi ishlab chiqarishni rivojlantirish bilan iqtisodiyotning yuksalishiga yordam beradi. Bu jihatdan ayniqsa ratsionalizatorlik harakati muhim ahamiyat kasb etmoqda. Chunki ixtirochilik takliflari mehnat sharoitini yaxshilashga, issiqlik va energiya sarfini tejashga, ishlab chiqarish texnologiyasi, jihozlar, avtomatik asbob-uskunalarning ishlashini yanada takomillashtirishga, mahsulot ishlab chiqarishda xom ashyo me’yoriy sarfini kamaytirishga, mehnat xavfsizligini yaxshilashga, qo‘lda bajariladigan ishlarni mexanizatsiyalashtirishga, atrof-muhit ifloslanishini kamaytirishga yo‘naltirilgan bo‘lib, muhandis-texnik xodimlarning izlanuvchanlik iqtidorini ro‘yobga chiqarishiga ham imkoniyat tug‘diradi.

Davlatimiz rahbarining 2008 yil 15 iyuldagi «Innovatsion loyihalar va texnologiyalarni ishlab chiqarishga tatbiq etishni rag‘batlantirish bo¬rasidagi qo‘shimcha chora-tadbirlar to‘g‘risida»gi qarorini bajara borib, Navoiy kon-metallurgiya kombinati bo‘¬linmalarida mutaxassislarni ishlab chiqarishga foyda keltiradigan ratsionalizatorlik harakatiga keng jalb qilish yo‘lida qator ibratli ishlar amalga oshirilmoqda. Birgina «1-gidrometallurgiya zavodi» kon boshqarmasi misolida bunga to‘la ishonch hosil qilish mumkin. Korxonada izlanuvchan xodimlarning ratsionalizatorlik tak¬liflarini o‘rganish va ishlab chiqarishga joriy etishga etarli e’tibor berilmoqda. Korxonada o‘tgan yili 25 ta ixtirochilik takliflari ro‘yxatga olinib, shulardan yigirmatasi ishlab chiqarishda qo‘llanildi hamda 93 million so‘mdan ko‘proq iqtisodiy samaraga erishildi.

 

Ma’murjon Toshev yosh bo‘lishiga qaramasdan jamoada hurmatga sazovor bo‘layotgan ratsionalizatorlardan biridir. So‘nggi besh yilda uning bir nechta takliflarini joriy etish boshqarmaga 150 million so‘m foyda keltirdi. M.Toshev faolligi, tirishqoqligi bilan tengdosh hamkasblaridan ajralib turadi. SHu boisdan oliy o‘quv yurtini tugallab, yosh mutaxassis sifatida korxonada ish boshlagan davrdan buyon tez orada ko‘pchilikka tanildi. Kon boshqarmasida yoshlarning o‘z kasbini chuqurroq egallashi, izlanishi, yangiliklar yaratishi uchun etarli shart-sharoitlarning mu¬hayyoligi Ma’murjonga qanot bag‘ishladi. Uning ratsionalizatorlik takliflari mutaxassislar tomonidan qizg‘in ma’qullandi. Qahramonimizning, hamkasblari Baxodir Babaev, Sirojiddin Po‘latov, Umrzoq Xudoyberdiev va Ametxan Nezirovlar hammuallifligidagi 1- texnologik sexning magnitli fraksiyani qayta ishlash uchastkasida texnik suvning sarfini kamaytirish, temir kuporosini ishlab chiqarishda sovutgichlarning ishlab chiqarish quvvatini oshirish, uran chala oksidini ishlab chiqarishda karbonatli eritma sarfini kamaytirish, temir sulfati eritmasini ishlab chiqarishda sulfat kislotasi sarfini kamaytirish, KV 12/8P kompressorining elektr sxemasini mukammallashtirishga oid takliflari ishlab chiqarishda qo‘llanilib, iqtisodiy samara bermoqda.

Kon boshqarmasi ixtirochilarining aksariyatini yosh mutaxassislar tashkil etadi. Alisher CHo‘liev, Alisher Avezov, Nurali Rahmonov, Ametxan Nezirov, Umrzak Xudayberdiev, Iskandar Suyunov, Evgeniy Gadjievlar shular jumlasidandir. Boshqarma yoshlari nafaqat ishlab chiqarish, balki ma’naviy-ma’rifiy tadbirlarda ham faollik ko‘rsatishmoqda. Darvoqe, Ma’¬murjon Toshev korxona «Kamolot» yoshlar ijtimoiy harakati etakchisi, Respublika «Kamolot» YOIH tomonidan o‘tkaziladigan «Eng namunali boshlang‘ich tashkilot» ko‘rik-tanlovining viloyat va respublika bosqichlari doimiy ishtirokchisi hamdir.

Suhbat jarayonida M.Toshevning «Inson kasbiga chin dildan mehr qo‘ysa, u o‘z sohasining bilimdoniga aylanadi, albatta, maqsadiga erishadi. Men bunga juda ishonaman va jamiyatga foydam tegishi uchun intilayapman», - degan so‘zlari diqqatimni tortdi. Ayni paytda yosh ratsionalizatorning yana 4 ta taklifi o‘rganib chiqishga taqdim etilgan. Ulardan 22 million so‘mlik samara olish kutilmoqda.

Nafisa VAXIDOVA.