Система Orphus

Shriftning o'lchamini

Qarama-qarshilik

        
Siz bu yerdasiz: Bosh sahifa Выпуск №5 от 08.03.2018 Qizilqumda mumtoz navolar

Qizilqumda mumtoz navolar

Qizilqumning beadoq kengliklari bo‘ylab qish etagida taralgan mumtoz kuy-qo‘shiqlar bahorga tashna ko‘ngillarga ajib hayotiy zavq bag‘ishladi. G‘azal mulkining sultoni Mir Alisher Navoiy tavalludining 577 yilligi hamda shoh va shoir Zahiriddin Muhammad Bobur tavalludining 535 yilligiga bag‘ishlab «Farhod» madaniyat saroyida o‘tkazilgan «Nazm va navo» maqom kechasida jonli ijroda yangragan murodbaxsh taronalar milliy merosimizning bebaho gultoji atalmish maqom ijrochilik san’atining jozibador qirralarini namoyon etib, muxlislarni yana bir bor hayratga soldi.

Madaniyat saroyining muhtasham zalidagi parda ko‘tarilganda kamalakrang milliy matolarimiz uyg‘unligida nafis did bilan bezatilgan sahnada «Tarona» xalq cholg‘u asboblari orkestri va «Favvora» maqomchilar ansambli ijrochilari sharqona liboslarda turnaqator tizilib turishardi. Ular ijrosida ajib nola bilan yangragan dastlabki «Gulzorim» qo‘shig‘i tinglovchilarni san’atning sirli olamiga etaklab ketdi.

«Ishq ayladi», «Tarahhum qilmadi» va «Galdir» qo‘shiqlarini jonli ijroda maromiga etkazib kuylagan umidli xonandalar Nigora YUldosheva, opa-singil Kamola va Sabina Qodirovalar nafaqat ijro mahorati, balki o‘zbekona milliy liboslari, sharq qizlariga xos latofatiyu nazokati, samimiyati bilan dasturga o‘zgacha tarovat baxsh etdi.

Navoiy shahridagi 8- bolalar musiqa maktabi o‘qituvchisi, «Nihol» davlat mukofoti sovrindori Farruh Bahronov «Dutorim», «Parvo etib kel» va maqomchi qizlar bilan hamohanglikda ijro etgan «Mustahzod» qo‘shiqlari bilan muxlislar ko‘nglini zabt etgan bo‘lsa, yosh iste’dod egalari Ulug‘bek va Hamza Saidovlar ijrosidagi «Bo‘ylaringga» va «Lazgi» qo‘shiqlarini tinglagan san’at shinavandalari o‘rinlaridan turib raqsga tushishdan o‘zlarini tutib turolmadilar.

An’anaviy sozandalik yo‘nalishi bo‘yicha «Nihol» davlat mukofoti sovrindori SHerzod SHodiev va sozandalar ansabli ijrosidagi «Gulbahor va tanovar», «Xorazmcha», «Farg‘ona ruboiysi», «Tarji navo», «Hayoli qiz», «Jilg‘a» kuylari yuksak ijro mahorati bilan tinglovchilar qalbiga nurli tuyg‘ularni hadya etdi. «SHirin» xalq raqs ansambli bosh baletmeysteri Anvar G‘aniev va baletmeyster Hurmatoy Kenjaeva tomonidan sahnalashtirilgan jozibador raqslar san’at ixlosmandlariga bir olam zavq-shavq ulashdi. «Tarji navo» kuyiga raqsga tushgan Navoiy madaniyat va san’at kolleji o‘quvchisi Durdona Zokirova nafis, jozibali harakatlari bilan tomoshabinlar olqishiga sazovor bo‘ldi.

Kecha ansambl ishtirokchilari ijrosidagi «Vatan madhi» qo‘shig‘i bilan yakunlandi. Biroq, dastur yakun topganiga qaramay, kuy va qo‘shiq sehridan sarmast tinglovchilar o‘rinlaridan turishga shoshilmas, hech kim zalni tark etgisi kelmasdi.

Ha, jonli ijrodagi mumtoz kuy va qo‘shiqlar ko‘ngillarni zabt etib, inson ruhiyatini nurli cho‘qqilarga chog‘lashi bor gap. Ustoz san’atkor Gulmurod Jo‘raev rahbarlik qilayotgan «Tarona» xalq cholg‘u asboblari orkestri va «Favvora» maqomchilar ansamblining ilk dasturidan joy olgan kuy va mumtoz qo‘shiqlar rang-barangligi, xalqonaligi bilan tinglovchilarni ohanrabodek o‘ziga tortdi. Dasta rahbarining maqom san’atining ijodiy, ilmiy-uslubiy va ijro an’analarini, ko‘p asrlik ijro yo‘llarini puxta o‘zlashtirib, ularni yangicha usullar bilan boyitish yo‘lidagi izlanishlari besamar ketmadi.

Toshkent shahridagi madaniyat-oqartuv texnikumini tamomlagan Gulmurod Jo‘raev «Farhod» madaniyat saroyida faoliyat boshlaganiga 22 yil bo‘ldi. Ortda qolgan yillar iste’dodli san’atkor uchun ijodiy izlanishlar, muvaffaqiyat va mag‘lubiyatlarga boy bo‘ldi. 1996 yilda  uning rahbarligida tashkil qilingan «Tarona» xalq cholg‘u asboblari orkestri «Farhod» madaniyat saroyining bayram tadbirlariga bezak berdi. Orkestr qatnashchilarining mahorati yildan-yilga takomillashib, Navoiy viloyati va respublika miqyosida o‘tkaziladigan bayram tadbirlarida faol qatnashib kelmoqda. Ijod va izlanish dunyosida toblangan yosh san’atkor bugun ustoz-murabbiy darajasiga etdi.

Gulmurod Jo‘raev 2014 yilda san’atsevar, iqtidorli yoshlardan iborat «Favvora» maqomchilar ansamblini tuzdi. U ishni maqomchilar va cholg‘ular ijrosini bir maqsadga yo‘naltirishdan boshladi. YOsh maqomchilar 2015 yilda NKMK tasarrufidagi madaniyat muassasalariaro o‘tkazilgan «Qizilqum ohanglari» ko‘rik-tanlovida I o‘rinni egallagan bo‘lsalar, 2017 yilda tanlovning Gran-pri sohibi bo‘ldilar. Hozir ansambl repertuaridan o‘ttizdan ortiq maqom va mumtoz ashula o‘rin olgan. Ansambl qatnashchilari bo‘lgan ko‘pgina yoshlar mamlakatimizning san’at oliygohlarida tahsil olmoqdalar. Xususan, 2017 yilda ansambl ishtirokchilaridan 14 nafari Toshkent davlat san’at va madaniyat instituti talabasi bo‘lishdi.

– Madaniyat muassasamizda o‘z kasbining ustalari va san’atning chinakam fidoyilari faoliyat yuritishadi, - deydi «Farhod» madaniyat saroyi direktori SHavkat Tuxtaev. – «Tarona» xalq cholg‘u asboblari orkestri va «Favvora» maqomchilar ansambli ijodkorlarining Qizilqum hududida maqom san’atini rivojlantirish yo‘lida olib borayotgan izlanishlari va sa’y-harakatlari alohida e’tirofga sazovor. Bugun ularning sermashaqqat mehnatlari mahsulini ko‘rdik va ishonchimiz komilki, bundan keyin ham ular marrani baland olib ijod qiladilar.

O‘zbekiston Prezidentining maqom san’atining rivoji yo‘lida amalga oshirayotgan xayrli ishlaridan ruhlangan  Gulmurod Jo‘raev bu haqda shunday deydi:

–  Prezidentimizning «O‘zbek milliy maqom san’atini yanada rivojlantirish chora-tadbirlari to‘g‘risida»gi qarori biz san’atkorlarni behad quvontirish bilan birga, faoliyatimizni yangi bosqichga ko‘tarishga, yoshlarni milliy qadriyatlarimiz asosida tarbiyalashga, iqtidorli yoshlarni katta hayotga yo‘llashda bor kuch va imkoniyatimizni safarbar qilishga qanotlantirdi. Zero, milliy san’at rivoji – millat rivoji demakdir. Biz bu yo‘lda o‘z kuch-quvvatimizni ayamaymiz.

YAngi g‘oyalar va ulkan rejalar og‘ushida mehnat qilayotgan ansambl rahbari va qatnashchilariga ijodiy barkamollik tilaymiz.

Salima XOLDOROVA.

 

Biz bilan bog'lanish

  • Umumiy bo‘limi (devonxona): 0(436) 227-71-64, +998 79 227-71-64
  • Ishonch telefoni: 0(436) 227-72-22, +998 79 227-72-22

    Mualliflik huquqi © NKMK, 2015. Barcha huquqlar himoyalangan.   

Axborotdan foydalanish shartlari

Siz bu yerdasiz: Bosh sahifa Выпуск №5 от 08.03.2018 Qizilqumda mumtoz navolar