Система Orphus

Shriftning o'lchamini

Qarama-qarshilik

        
Siz bu yerdasiz: Bosh sahifa Выпуск №6 от 17.03.2018 YANGI DOVONLARGA – MUSTAHKAM ZAMIN

YANGI DOVONLARGA – MUSTAHKAM ZAMIN

Navoiy kon-metallurgiya kombinati ahil jamoasi mamlakat iqtisodiyotini rivojlantirishga munosib hissa qo‘shish uchun mahsulot ishlab chiqarish hajmini yildan-yilga oshirmoqda. Tarkibida qimmatbaho metall bo‘lgan rudani qayta ishlash korxonalarida yuksak ish maromi va quvonchli yutuqlarga erishish oson emas, albatta.

Buning uchun ruda qazib chiqarishni muttasil ko‘paytira borish talab etiladi. Er osti qazilma boyliklariga ega yangi konlarni o‘zlashtirish zamonaviy texnika va texnologiya bilan jihozlantirilgan oltin saralash zavodlariga zarur miqdorda ruda etkazib berish imkonini yaratadi. Kombinatda bu masalaga etarli e’tibor berilmoqda va qator loyihalar amalga oshirilayapti. «1- gidrometallurgiya zavodi» kon boshqarmasi oltin ishlab chiqarish quvvatlarini sifatli ruda bilan ta’minlash borasida so‘nggi yillarda olib borilgan ishlar ham buning yorqin namunasidir. 2012 yilgacha korxona uchun ruda Adjibugut konidan tashib keltirilardi. Ana shu sanada «Qoraqo‘ton» koni «1-GMZ» kon boshqarmasi tarkibiga kiritildi va Ziyatdin oltin rudali hudud zavodning asosiy xom ashyo manbai bo‘lib qoldi. Ammo, kon boshqarmasining tarkibida oltin bo‘lgan rudani qayta ishlash quvvatlaridan to‘la foydalanish uchun istiqbolli yangi konlarni ochish zaruriyati bor edi. Ana shunday ezgu niyat bilan Aristantov rudali maydon bazasida qazib olish konini ochish yuzasidan investitsion loyiha tasdiqlandi hamda 2015 yilning martidan konni o‘zlashtirish ishlari boshlab yuborildi. Konimex tumani hududidagi bu maydon «Aristantov», «Umid», «Beshashi» va «G‘arbiy Umid» uchastkalaridan iborat. Ma’lumki Prezidentimiz tashabbusi bilan qabul qilingan Navoiy kon-metallurgiya kombinatini rivojlantirishning 2017-2026 yillarga mo‘ljallangan das­turiga muvofiq 27 ta investitsion loyihani ro‘yobga chiqarish ko‘zda tutilgan. «Aristantov» konining foydalanishga topshirilishi 2017 yilda amalga oshirilgan eng muhim investitsion loyihadir. Ayni paytda kondan ochiq usulda ruda qazib chiqarilmoqda. O‘tgan ikki yildan ortiqroq davrda ob’ektni ishga tushirish va moddiy-texnika bazasini yaratish bilan bog‘liq juda katta hajmdagi qurilish, tashkiliy texnik ishlar bajarildi. Konni avtomobil trassasi va temir yo‘l bilan bog‘lash uchun 30 kilometr shag‘al yo‘l barpo etildi. Nasos stansiyasidan kon oralig‘igacha 24,5 kilometr masofada suv quvuri yotqizildi, 180 kub metr sig‘imli 3 ta rezervuar o‘rnatildi. Ta’mirlash-mexanika uchastkasi va nazorat-texnik punkti qurilishi nihoyasiga etkazildi. Ishchi-xizmatchilarga yashash va dam olish sharoitlarini yaratishni ko‘zlab Qizilqum fosforit majmuasi hududidagi bino tartibga keltirilib, har tomonlama qulayliklarga ega 162 o‘rinli yotoqxonaga aylantirildi. Barcha xonalar konditsioner, televizor, sovutgichlar bilan ta’minlandi, ma’naviyat va ma’rifat xonasi ajratilib, zarur buyum va vositalar bilan jihozlantirildi. Qish mavsumida yotoqxonani markazlashgan tizim asosida isitish yo‘lga qo‘yilgan.

Yangi konning moddiy-texnik bazasini mustahkamlash borasidagi ishlar, ayniqsa maqtovga munosibdir. Aslida busiz ishlab chiqarishda yaxshi natijalarni qo‘lga kiritib bo‘lmaydi. Konga transport xizmati ko‘rsatish maqsadida kon hududida 8- avtogaraj tashkil etildi. Hozirgi kunda transportchilar samarali faoliyat ko‘rsatishayapti. Kon qurilishi boshlangandan buyon 128 ta kon transport va yordamchi asbob-uskunalar, jumladan 55 tonna yuk ko‘tarish quvvatiga ega 14 ta «BelAZ-7555» rusumli avtoag‘dargich, yuk ko‘tarish quvvati 25 tonna bo‘lgan 14 ta MAN rusumli avtoag‘dargich, 4 ta frontal yuklash mashinasi, 3 ta kompressorli burg‘ilash qurilmasi, 3 ta EKG-5A markali ekskavator, 2 ta TY-320 rusumli buldozer, 2 ta porshenli kompressor, 2 ta vilkali yuklash texnikasi, 4 ta ISUZU markali avtobus, yuk tashish avtomobili va tez yordam mashinasi, MAN markali avtokran va yonilg‘i tashish mashinasi, g‘ildirakli ekskavator, «CAPTIVA» engil avtomobili va boshqa texnika vositalari olindi.

Bularning barchasi kon jinslari va ruda qazib chiqarish bo‘yicha keskin o‘sish sur’atini ta’minladi. 2017 yilda rejalar oshirib uddalandi yoki ko‘rsatkichlar 2016 yildagiga taqqoslanganda mos tarzda 164 va 127 foizni tashkil etayapti. «1- gidrometallurgiya zavodi» kon boshqarmasida o‘tgan yili oltin ishlab chiqarish yuzasidan yillik reja noyabr oyida sharaf bilan bajarildi. Bunday muvaffaqiyatga «Aristantov» koni ishchi-xizmatchilari, muhandis-texnik xodimlari arzigulik ulush qo‘shdilar. Navoiy kon-metallurgiya kombinati bosh direktori Q.Sanaqulov kon boshqarmasi mehnat ahlini erishilgan ulkan yutuq munosabati bilan qutlab, tabrik maktubi yo‘lladi. Maktub kon ishchi-xizmatchilarini yanada unumliroq ishlashga ruhlantirmoqda. Jamoa bahor va yasharish ayyomi – Navro‘zi olamni mehnat sovg‘alari bilan kutib olayapti. Konda ruda qazib olish bo‘yicha joriy yilning ikki oylik rejasi 110 foizga ado etildi. YOtoqxona binosi atrofida tozalash va obodonlashtirish ishlari bajarildi.

«Aristantov» koni va 8- avtogarajda fidokorona mehnatlari bilan jamoaning hurmat-e’tiborini qozonayotgan jonkuyar insonlar ko‘pchilikni tashkil etadi. Ochiq kon ishlari uchastkasi boshlig‘i O.Habibullaev, etakchi  muhandis A.Nazarov, uchastka marksheyderi F.Mo‘minov, uchastka geologi SH.Nurmatov, ekskavator mashinistlari A.Shanazarov, A.Muratov, G.Niyazov, burg‘ilash qurilmasi mashinistlari M.Ziyatov, Ya.Jo‘raev, F.Husanov, kon ishchisi X.Mavlonov, 8- avtogaraj boshlig‘i A.Ravshanov, ta’mirlash ustasi F.Hayitov, texnikadan foydalanish bo‘yicha usta A.Rahmonov, BelAZ haydovchisi R.Barmatovlar shular jumlasidandir. Fidoyi konchilar va transportchilarning astoydil intilishlari tufayli «Aristantov» konida kelgusidagi yuksak marralarga mustahkam poydevor yaratilayapti.

Nizomiddin SADRIDDINOV.

 

Biz bilan bog'lanish

  • Umumiy bo‘limi (devonxona): 0(436) 227-71-64, +998 79 227-71-64
  • Ishonch telefoni: 0(436) 227-72-22, +998 79 227-72-22

    Mualliflik huquqi © NKMK, 2015. Barcha huquqlar himoyalangan.   

Axborotdan foydalanish shartlari

Siz bu yerdasiz: Bosh sahifa Выпуск №6 от 17.03.2018 YANGI DOVONLARGA – MUSTAHKAM ZAMIN