Система Orphus

Shriftning o'lchamini

Qarama-qarshilik

        
Siz bu yerdasiz: Bosh sahifa Выпуск №7 от 12.04.2018 MEHNAT – BAXT KALITI

MEHNAT – BAXT KALITI

Bugun xotin-qizlar ijtimoiy hayotimizning barcha jabhalarida samarali faoliyat olib borishayapti. Ayol – davlat va jamoat arbobi, ilm-fan fidoyisi, erkaklar bilan yonma-yon turib, nozik jussasiga ulkan vazifalarni yuklab, el xizmatiga kamarbasta bo‘layotgan xilqat. Ana shu yumushlar bilan birga ro‘zg‘or tashvishi, farzand tarbiyasi ham uning zimmasida. Bu esa ayolning irodasi metindek mustahkamligidan dalolatdir.

Markaziy kon boshqarmasi 2-gidrometallurgiya zavodi kran mashinisti Sanam Abdullaeva fidoyi zamondosh ayollarimizdan. 2018 yil mart oyi Sanam opa uchun qo‘shaloq bayram sifatida esda qoladigan bo‘ldi. U O‘zbekiston Respublikasi Prezidentining “8 mart – Xalqaro xotin-qizlar kuni bayrami munosabati bilan mukofotlash to‘g‘risida”gi farmoniga muvofiq “Do‘stlik” ordeni bilan taqdirlandi.

“Kamtarin xizmatlarim yuksak baholanib, davlat mukofotiga sazovor bo‘lganligim meni yanada g‘ayrat-shijoat bilan mehnat qilishga ruhlantirayapti. Chunki bunday ishonch faxr-iftixor bag‘ishlashdan tashqari mas’uliyat ham yuklaydi. Ochig‘i, bu xushxabardan hanuzgacha hayajondaman. Ushbu xabarni eshitgach, dastlabki yillardan hozirgacha bo‘lgan faoliyatimni ko‘z o‘ngimdan o‘tkazdim. Bunday e’tirofga amaliy ishlarim bilan javob beraman”, - deydi g‘ururlanib qahramonimiz.

Sanam Raimovnaning hamkasblari orasida hurmati baland. U qariyb o‘n yildan buyon 2-sexda kran mashinisti sifatida asosiy ko‘tarish mexanizmi 80 tonna va yordamchi ko‘tarish mexanizmi 20 tonnali  ko‘priksimon kranni boshqarib, yuklarni bloklarga tashish va o‘rnatilgan asbob-uskunalarni ta’mirlash ishlari tez va soz amalga oshirilishiga munosib hissa qo‘shib kelmoqda. Kran yordamida 2015 yilda 17 ming 800 tonna, keyingi yilda 18 ming 400 tonna, o‘tgan yili esa 20 ming 200 tonna yuk ko‘tarish ishlari bajarildi.

Kran uchastkasi zavodning asosiy yordamchi bo‘limlaridan hisoblanadi. Texnologik jarayonlarni ta’minlash, asbob-uskunalarni ta’mirlash, yuk va temiryo‘l transportida moddiy tovar boyliklarini yuklash va tushirishda kranlardan keng foydalaniladi. Mazkur mexanizmlar boshqaruvchilarining 39 nafari ayollardir. El nazariga tushgan S.Abdullaevaning Dilobar Pardaeva, Dilfuza Hojieva singari shogirdlari samarali mehnat qilib kelmoqda.

“Sanam opa jamoamizning yuragi, u kishini barchamiz faol, mehribon va samimiy hamkasb sifatida bilamiz. Fidokorona mehnatlari yuksak qadr topganligi bizni behad quvontirayapti”, - deydi kran uchastkasi brigadiri o‘rinbosari Zulfiya Shukurova.

S.Abdullaeva singari fidoyi, jonkuyar ayollar mehnati aslo izsiz ketmaydi. Zero, yurtimiz ravnaqi, jamiyatimiz rivoji yo‘lida astoydil xizmat qilganlar doimo e’zozda.

Dildora KARIMOVA.

 

Biz bilan bog'lanish

  • Umumiy bo‘limi (devonxona): 0(436) 227-71-64, +998 79 227-71-64
  • Ishonch telefoni: 0(436) 227-72-22, +998 79 227-72-22

    Mualliflik huquqi © NKMK, 2015. Barcha huquqlar himoyalangan.   

Axborotdan foydalanish shartlari

Siz bu yerdasiz: Bosh sahifa Выпуск №7 от 12.04.2018 MEHNAT – BAXT KALITI