Система Orphus

Shriftning o'lchamini

Qarama-qarshilik

        
Siz bu yerdasiz: Bosh sahifa 14.05.2015 dan №9 nashr «BUNDAN HAM YAXSHIROQ ISHLAGAN BO‘LARDIM...»

«BUNDAN HAM YAXSHIROQ ISHLAGAN BO‘LARDIM...»

Hamalning ilk kunlari. Qizilqum bahorining tabiati o‘zgacha, kunlarning birdan isib, birdan sovib ketishi bor. Shaharning orasta ko‘chalariga bir qator ekilgan teraklar barg yozish yoki yozmaslik haqida go‘yoki bahslashayotgandek sirli bosh chayqashadi. Erta tongning mayin shabboda esib turgan mana shunday maftunkor lahzalarida sayr qilishga odatlangan nuroniy otaxonning shirin xayollarini ayol kishining jarangdor ovozi to‘zg‘itib yubordi:

- Assalomu alaykum, doktor, sog‘-salomatmisiz. Siz davolagan Aziza qizim katta bo‘lib qoldi, hamshira bo‘lib ishlayapti, yaqinda uzatamiz. Sizni to‘yga chaqirmoqchimiz. O‘zingiz oq fotiha berasiz... Ayol to‘lib-toshib yana nimalardir, deya-deya yo‘lida davom etdi. Otaxon kulimsiragancha bosh irg‘ab, rahmat, deyishga ulgurdi xolos.

Ha, bunday uchrashuvlar deyarli har kuni yuz beradi. Kimdir otasi, yana kimdir onasiga, boshqa birov aziz farzandiga o‘z vaqtida ko‘rsatilgan beminnat yordam uchun minnatdorchilik aytib, tilaklar bildiradi. Shunday onlarda aziz umrining navqiron yillarini odamlar salomatligi yo‘lida sarflagan insonning ko‘ngli o‘sgandan o‘sib, qalbi yorishib ketadi.

Yuz-ko‘zlaridan ajib bir shukronalik ufurib turgan bu salim qalb sohibi - Navoiy kon-metallurgiya kombinati faxriysi, oliy toifali sog‘liqni saqlash tashkilotchisi, umrining 46 yilini tibbiyotga bag‘ishlagan tajribali ustoz shifokor Sharipov To‘yin Sharipovichdir.

To‘yin Sharipovich Urgutning Tegirmon qishlog‘ida tavallud topgan. Onajonisi Xolbibi ayaning hikoya qilishicha, bo‘lg‘usi shifokor tug‘ilgan kun ularning ko‘chasidan bir otliq qo‘lidagi durrasini boshi uzra aylantirgancha «G‘alaba, g‘alaba!», deb jar solib o‘tgan ekan. Tug‘ilganlik to‘g‘risidagi guvohnoma kichkina doktorga bir necha yillardan keyin yozib berilgan bo‘lsa ham, uning 1945 yil 9 may kuni dunyoga kelgani oyday ravshan edi. Buyuklardan biri «Bu dunyoda hech qanday tasodifiy hodisa yo‘q», deganidek, To‘yin SHaripovichning fashistlar ustidan qozonilgan g‘alaba kuni dunyo yuzini ko‘rishida ham bir hikmat borga o‘xshaydi. G‘alabada tug‘ilgan o‘g‘lon bir umr g‘alabalar ichra yashadi, umrini yaxshilikka, ezgulikka bag‘ishladi. Kasalliklar ustidan qozongan g‘alabalari unga el olqishini, xalq e’tirofini olib keldi.

Yana bir e’tiborli jihati, el ardog‘idagi shifokor ismining hech kimnikiga o‘xshamasligida. Nima uchun u kishiga bunday ism qo‘yishgani meni ham ko‘pdan beri qiziqtirib kelardi. Savolimga kulimsiragancha o‘zlari javob qaytardi: «Urush yillari ocharchilik zamoni bo‘lgan. Odamlar to‘yib non eyishni orzu qilishgan. To‘kinchilik, to‘yinchilik bo‘lsin, deb ismimni To‘yin qo‘yishgan. Ming shukur, ocharchilik ko‘rmay unib-o‘sdik. Mana shunday farovon kunlarga ham etib keldik». Ko‘rinib turibdiki, shifokorimiz ulug‘ niyatli, iymon-e’tiqodli insonlar sulolasidan bo‘lgan, salim daryolardan suv ichgan.

To‘yin Sharipovich Samarqand davlat tibbiyot institutini bitirganidan so‘ng harbiy xizmatga chaqirildi. 1968-1970 yillarda Leningrad harbiy okrugi harbiy qismi tibbiy punktida xizmat qildi. Xizmatdan qaytganidan keyin esa Samarqand davlat tibbiyot instituti rektori taklifi bilan oliygoh umumiy xirurgiya kafedrasining anesteziologiya va jonlantirish bo‘limida dastlab vrach anesteziolog, keyinchalik bo‘lim mudiri vazifalarida ishladi. 1972 yilda To‘yin Sharipovich NKMK Tibbiy-sanitariya qismi rahbariyati taklifi bilan Navoiy shahriga keldi va mazkur dargohdagi shifokorlik faoliyatini anesteziolog-reanimatolog vazifasidan boshladi. Yosh shifokordagi kasbga bo‘lgan o‘zgacha mehr-muhabbat, izlanuvchanlik, ishni to‘g‘ri tashkil qilishga sidqidildan yondashuv kabi fazilatlar rahbariyatning diqqat e’tiborini tortdi va tez orada unga anesteziologiya va reanimatsiya bo‘limi mudirligi ishonib topshirildi. U mazkur mas’uliyatli vazifada bor bilimi, kuch-quvvati, irodasini ishga solib faoliyat yuritib, jamoani yagona maqsadlar yo‘lida safarbar eta olish qobiliyatini namoyon qildi.

To‘yin Sharipovich yangi tibbiy texnologiyalarni tadbiq qilish bo‘yicha Moskvada malaka oshirib qaytgandan so‘ng viloyatda birinchi bo‘lib nafas yo‘llari, qizilo‘ngach, oshqozon, o‘n ikki barmoqli ichak, to‘g‘ri va yo‘g‘on ichak kasalliklarini to‘g‘ridan-to‘g‘ri apparat bilan ko‘rishni yo‘lga qo‘ydi. 1980 yilda viloyat kasalxonasida endoskopiya kabinetini tashkil qildi.

Tug‘ma shifokorning sog‘liqni saqlash tizimida muhim sanalgan - har bir bemor ahvoliga jiddiy yondashuv, boshlagan ishni ixlos bilan oxiriga etkazish, ishni tashkil qilishda izchillikka rioya qilish kabi fazilatlari 1982 - 1991 yillarda Tibbiy-sanitariya qismi boshlig‘ining tibbiyot masalalari bo‘yicha o‘rinbosari, 1991 - 2005 yillarda mazkur tibbiy muassasa boshlig‘ining davolash ishlari bo‘yicha birinchi o‘rinbosari lavozimlarida qaynoq faoliyat yuritishida qo‘l keldi va unga katta obro‘ keltirdi, hamkasblari, kombinat ishchi-xodimlari ishonchiga, olqishiga sazovor bo‘ldi. To‘yin Sharipovich Gippokrat qasamiga sodiqlik borasida yosh shifokorlarga ibrat namunasini ko‘rsata oldi.

O‘zbekiston Respublikasi Sog‘liqni saqlash vaziri buyrug‘iga asosan, T.Sharipov Navoiy tibbiyot bilim yurti bitiruvchilari imtihon komissiyasi raisi etib tayinlandi. 2006 yildan 2014 yilgacha Navoiy tibbiyot kasb-hunar kollejida “Jarrohlik va reanimatsiya» fanidan dars berdi. Shifokor hamiisha el dardi, tashvishi bilan yashadi. U o‘tgan kunlar haqida shunday xotirlaydi: «Tungi soat ikkilar chamasi, to‘satdan qo‘ng‘iroq jiringladi. Viloyat sog‘liqni saqlash boshqarmasi boshlig‘i Muruntovning uzoq bir ovulida ko‘ngilsiz voqea sodir bo‘lgani, og‘ir ahvoldagi jabrlanuvchiga zudlik bilan yordam ko‘rsatish zarurligini aytdi. Tezda transport bo‘limi boshlig‘ining uyiga telefon qildim. U transportni hal qilguncha bo‘limga borib kerakli dori-darmonlarni, plazmalarni tayyorladim. Shifokorlar va hamshiralardan iborat shoshilinch yordamni yuborib, uyga qaytganimda tong otayotgan edi. Yana ertalab ishga kelib kundalik tashvishlarga sho‘ng‘ib ketdim. Buyog‘i Uchquduq, Zarafshon, Bessopan, Tomdi, Ko‘kchaning uzoq ovullaridan tortib, u yog‘i Nurobodning beadoq dashtlarigacha mana shunday tezkor yordamlarni tez-tez tashkil qilishga to‘g‘ri kelgan».

NKMK Tibbiy-sanitariya bo‘limi boshlig‘ining davolash ishlari bo‘yicha o‘rinbosari Ro‘zimurod Qodirovich Toshev ustozi To‘yin Sharipovichning odamiylik, insonparvarlik, ishchanlik, tibbiy yordamga muhtoj bemorlarga tegishli masalani har qanday vaziyatda ijobiy hal qilishi kabi asl shifokorga xos fazilatlari haqida to‘lqinlanib gapirdi:

«To‘yin Sharipovich ish boshlagan paytlar tibbiy texnologiya hozirgidek rivojlanmagan, bemorga tashxis qo‘yadigan apparatlar bo‘lmagan. Shu boisdan og‘ir kasallar haqida oxirgi xulosani chiqarish ancha mushkul kechgan. Tashxis qo‘yish shifokordan katta bilim, kuchli intuitsiyaga ega bo‘lishni talab qiladi va bunday nozik jarayonni ustozimiz har doim san’atkorona uddalagan. Ustoz o‘zidan keyingi avlodga sidqidildan ish o‘rgatdi, tajribalari bilan o‘rtoqlashdi. Tajribali shifokordan dardiga davo topgan minglab insonlar bugun respublikamizning turli hududlarida umrguzaronlik qilmoqdalar».

NKMK TSB 5-Tibbiy-sanitariya qismi boshlig‘i o‘rinbosari Ilmira Ilgizarovna Subbotina T.SHaripovni tibbiyot ilmining bilimdoni, g‘amxo‘r va talabchan rahbar, samimiy va mehribon ustoz sifatida hurmat qilishini ta’kidlab: «To‘yin Sharipovich tibbiyot muassasalari faoliyatini yuqori darajada tashkil qila olish qobiliyatiga ega. Barcha mutaxassislarning bilim darajasi, ishiga odilona baho berish bilan ularni o‘z ustida yaxshiroq ishlashga rag‘batlantirardi. O‘z oldiga aniq maqsadlar qo‘yish, muhim va ikkinchi darajali masalalarni ajrata bilish va boshlagan ishini oxiriga etkazish unga xos bo‘lgan eng xarakterli xususiyatlardan. Bunday umrga havas qilsa arziydi», deya iliq fikrlar bildirdi.

Elimizning sevimli shifokori bilan suhbatimiz bugungi hayotimizga ko‘chganda, uning ko‘zlarida bolalarcha shodumonlik jilva qilganini ko‘rdim:

«Muhtaram Prezidentimiz 2015 yilni - Keksalarni e’zozlash yili deb e’lon qilganlarida qalbimda o‘zgacha bir g‘urur uyg‘ondi. Sevinchimni ichimga sig‘dirolmay, barcha tengdoshlarimni tabriklab chiqdim. Yoshlarga e’tibor, keksalarga bu qadar g‘amxo‘rlik davlat siyosati darajasiga ko‘tarilgan O‘zbekistonday mamlakatda yashayotganimga shukronalar aytaman”.

Darhaqiqat, To‘yin Sharipovich Alloh tomonidan ato etilgan umrni to‘lib-toshib yashayapti, qulochini keng yozib shu yurtga, shu elga xizmat qildi. Tibbiy-sanitariya qismida 31 yildan ortiq halol mehnat qilgan turmush o‘rtog‘i Liliya Aleksandrovna Sharipova bilan to‘rt farzandni o‘stirib kamolga etkazdi. Bugun jondan aziz nevaralari – Tibbiy-sanitariya bo‘limida hamshira bo‘lib ishlayotgan Maftuna va bobosiga juda o‘xshaydigan Asliddinning quvonchu tashvishlari bilan umri nurafshon, xonadoni fayzli.

G‘alabaning 70 yilligi kunida etmish yoshini qarshilagan aziz inson To‘yin Sharipovich Sharipovning hayot va kasbga muhabbat haqida o‘z jiddiy xulosalari bor: «Ishlaganda ishga ko‘ngil berib, yurakdan ishlash kerak. Kasbga sidqidildan yondashishni bilish kerak. Men bir umr o‘z kasbimdan faxrlanib, quvonib yashadim. Shuning uchun ham turli qiyinchiliklarni osongina engib o‘tdim. Agar qaytadan yosh bo‘lib qolsam, yana mana shunday, balki bundan ham yaxshiroq ishlagan bo‘lardim».

Salima XOLDOROVA.

Учредитель - трудовой коллектив НГМК

Полная или частичная перепечатка материалов из газеты допустима только с письменного разрешения пресс-центра. Редакция знакомится с письмами читателей, не вступая в переписку. Газета распространяется по подразделениям НГМК.

Газета зарегистрирована в Агентстве по печати и информации Навоийского облхокимията 29 июня 2015 года. Регистрационный номер - 07-070, ISSN 2010-5266.

Редакция

Джураев Абдумажид Ирисович
Начальник пресс-центра НГМК - пресс-секретарь генерального директора НГМК..
АДРЕС РЕДАКЦИИ: 210100, г.Навои, улица Навои 27, управление НГМК.
ТЕЛЕФОНЫ: 77-464(редактор), 77-363(техн.редактор), 77-366, 77-464(пресс-центр), 77-566(факс).

Biz bilan bog'lanish

  • Umumiy bo‘limi (devonxona): 0(436) 227-71-64, +998 79 227-71-64
  • Ishonch telefoni: 0(436) 227-72-22, +998 79 227-72-22

    Mualliflik huquqi © NKMK, 2015. Barcha huquqlar himoyalangan.   

Axborotdan foydalanish shartlari

Siz bu yerdasiz: Bosh sahifa 14.05.2015 dan №9 nashr «BUNDAN HAM YAXSHIROQ ISHLAGAN BO‘LARDIM...»