Система Orphus

Shriftning o'lchamini

Qarama-qarshilik

        
Siz bu yerdasiz: Bosh sahifa Выпуск №9 от 16.05.2018 “SHIRIN”NING SHIRIN ONLARI

“SHIRIN”NING SHIRIN ONLARI

Yaqinda “Farhod” madaniyat saroyi “Shirin” xalq raqs ansamblining 40 yillik shodiyonasi tantana qilindi. Maftunkor bahorning ana shu kunida bayramona bezalgan muhtasham zal milliy raqs san’atining haqiqiy shinavandalari bilan to‘ldi.

O‘zbek raqs san’ati joziba, hayo, andisha, betakror nafosatga asoslanadi. Har bir millatning qiyofasi uning raqs san’atida ham yaqqol namoyon bo‘ladi. Bosh baletmeyster Anvar G‘aniev va baletmeyster Hurmatoy Kenjaevalar tomonidan sahnalashtirilgan “Qushcha”, “Jilg‘a”, “Gulbahor”, “Tanovor”, “Dilxiroj”, “Xorazmcha”, “Doiram”, “Buxorcha”, “Uyg‘onish”, “Munojot”, “Sho‘x qizlar”, O‘zbegim”, “Sharq estradasi”, “Surxon qizlari” raqslarida xalqimizga xos bo‘lgan go‘zal qadriyatlar tarannum etildi. Raqslar boy kompozitsiyasi, serjiloligi bilan muxlislar qalbidan joy oldi. Ayniqsa, Anvar G‘aniev va Hurmatoy Kenjaevalar ijrosidagi “Layli va Majnun” kompozitsion raqsi tomoshabinlarda katta taassurot qoldirdi.

Katta ekranda namoyish qilingan videorolikda “Shirin” raqs dastasining qirq yillik jo‘shqin faoliyati, repititsiya jarayonlari, xorijiy davlatlarga qilgan safarlari va nufuzli tanlovlardagi yorqin chiqishlari aks ettirildi. “Shirin”ning yubileyiga “Marvarid” va “Farhod” xalq raqs ansambllari “Egipet” raqsini, “Baxtli bolalik” xalq raqs ansambli “Kavkaz” raqsini, Ulug‘bek Ochilov esa “Shahzoda” yakka raqsini taqdim qildi.

Ansamblning birinchi rahbari “El-yurt hurmati” ordeni sohibi Muhiddin Kenjaev va ustoz-murabbiy Roza Kenjaevalar tadbirning aziz mehmonlari bo‘ldilar. “Farhod” madaniyat saroyi direktori Shavkat Tuxtaev “Shirin” raqs ansamblining ijodiy jamoasini qutlab, aziz ustozlarga alohida ehtirom ko‘rsatdi.

“Shirin” xalq raqs ansamblining ko‘p yillik murabbiyi Roza Kenjaeva ansambl murakkab davrda mashaqqatlar bilan katta yo‘lga chiqqanligini, repertuardagi har bir raqs intilish va zahmatli mehnat bilan sahnalashtirilganligini, uning ishtirokchilari o‘z farzandlari kabi aziz va qadrli ekanligini bildirib, ko‘zlariga yosh oldi. Mo‘’tabar, mehribon ustozning bag‘ri gullarga to‘lib ketdi.

“Shirin” xalq raqs ansamblining bosh baletmeysteri Anvar G‘aniev kuylagan “Sevdirib” qo‘shig‘i muxlislar uchun yangilik bo‘ldi. Qo‘shiqqa “Flesh dens” ansambli ajoyib raqs sahnalashtirgan. Dastur “Do‘stlik mahallasi” final raqsi bilan yakunlandi. Tadbir so‘ngida ansambl ishtirokchilariga diplomlar va maxsus sovg‘alar topshirildi. “Shirin”ning yubiley dasturi quvonchli va hayajonli lahzalarga, shirin onlarga boy bo‘ldi. 

Salima BAHODIROVA.

 

Biz bilan bog'lanish

  • Umumiy bo‘limi (devonxona): 0(436) 227-71-64, +998 79 227-71-64
  • Ishonch telefoni: 0(436) 227-72-22, +998 79 227-72-22

    Mualliflik huquqi © NKMK, 2015. Barcha huquqlar himoyalangan.   

Axborotdan foydalanish shartlari

Siz bu yerdasiz: Bosh sahifa Выпуск №9 от 16.05.2018 “SHIRIN”NING SHIRIN ONLARI