• Yaratildi: 06.08.2022
• Yangilandi: 06.09.2022
• O'qildi: 2363

Yangi temir yo‘l liniyasi foydalanishga topshirildi

2022-yil 5-avgust kuni O‘zbekiston Respublikasi temir yo‘l transporti xodimlari kuni arafasida Tomdi tumani hududida “Tomdibuloq” konini 2-gidrometallurgiya zavodi bilan bog‘lovchi 35 kilometrlik temir yo‘l liniyasi foydalanishga topshirildi.

Tadbirda “Navoiy kon-metallurgiya kombinati” AJ Boshqaruvi raisi – Bosh direktori Q.Sanaqulov, Tomdi tumani hokimi Q.Aldabergenov,  Markaziy kon boshqarmasi rahbar-xodimlari, kombinat temir yo‘l sohasi mutaxassislari, nuroniylar va ommaviy axborot vositalari vakillari ishtirok etishdi.

Temir yo‘l transporti kombinatda muhim o‘rin tutadi. Keyingi yillarida olib borilgan saʼy-harakatlar natijasida temir yo‘l eng zamonaviy sohaga aylandi. Yana shuni alohida taʼkidlash joizki, bugungi kunda kombinatda 2 ming nafarga yaqin temir yo‘lchilar mehnat qilmoqda. Kombinat balansidagi 317 kilometrdan ortiq temir yo‘llarda kuniga 141 ming tonnadan ortiq maʼdan tashilmoqda. Korxonadada maʼdan tashish hajmining 60 foizdan ko‘prog‘i temir yo‘l transporti hissasiga to‘g‘ri keladi.

Taʼkidlanganidek, o‘tgan yili noyabr oyida kombinat tomonidan 5,5 mln dollarlik temir yo‘l qurish texnikalari sotib olinib, qisqa vaqt ichida, chetdan hech qanday ko‘maksiz NKMK tarixida ilk bor korxona mutaxassislari kuchi bilan “Tomdibuloq” konini 2-gidrometallurgiya zavodi bilan bog‘lovchi 35 kilometrlik temir yo‘lni qurib bitkazildi.

Tomdi hududida “Balpantov” va “Tomdibuloq” konlari, yangi karyerlar, temir yo‘l, boshqa obyektlar barpo etilishi bilan bir qatorda hududda yangi ish o‘rinlari yaratiladi. Jumladan, “Balpantov” konini o‘zlashtirish loyihasini amalga oshirish doirasida 442 ta yangi ish o‘rinlari tashkil etilib, unga asosan tomdilik yoshlar qabul qilindi.

Shu kuni Markaziy kon boshqarmasi Temir yo‘l transporti boshqarmasida korxona ishchi-xodimlari uchun bayram tadbiri o‘tkazildi. Tadbirda “NKMK” AJ Boshqaruvi raisi – Bosh direktori Q.Sanaqulov so‘zga chiqib, O‘zbekiston Respublikasi davlat mustaqilligining 31 yilligi va Temir yo‘l transporti xodimlari kuni munosabati bilan sharafli kasb egalarini samimiy muborakbod etdi.

Shuningdek, bir guruh soha vakillari "Konchilik shuhrati" ko‘krak nishoni, tashakkurnoma va esdalik sovg‘alar bilan taqdirlandi.

“NKMK” AJ Matbuot xizmati.