• Yaratildi: 15.08.2022
• Yangilandi: 15.08.2022
• O'qildi: 912

Bunyodkorlik namunasi

Hayot sinovlarida toblangan, ishning ko‘zini biladigan, mehnatkash, mard va matonatli quruvchilarimiz bugun istiqbolli loyihalarni amaliyotga samarali joriy etib kelishmoqda.

Davlatimiz rahbari tomonidan qabul qilingan kombinatni 2026-yilgacha rivojlantirish dasturi bo‘yicha umumiy qiymati 3,4 milliard dollar bo‘lgan investitsion loyihalar bugun amalda. O‘tgan besh yilda bu boradagi loyihalar uchun 2,3 milliard dollar mablag‘ yo‘naltirilib, 18 ta obyekt foydalanishga topshirildi. Mahsulot ishlab chiqarish hajmining yildan-yilga o‘sishi kombinatda modernizatsiyalash, texnik va texnologik jihatdan qayta jihozlash hamda yangi quvvatlarni foydalanishga topshirishni taʼminlanmoqda.

Bugungi kunda dastur doirasida 2, 5, 7-gidrometallurgiya zavodlarida qurilish obyektlari muddatidan oldin foydalanishga topshirilib, to‘liq quvvatda ishlamoqda.

Loyihalarni amalga oshirishda ilm-fan yutuqlaridan, jumladan, ishlab chiqarishga keng tatbiq etilgan innovatsion loyihalar, noyob texnologiyalardan samarali foydalanilmoqda. Buning natijasida nafaqat mahsulot tannarxini pasaytirishga, balki yuqori samaradorlikka ham erishilmoqda.

Istiqbolli loyihalarning amalga oshirilishi yangi ishlab chiqarish quvvatlarini foydalanishga topshirish bilan bir qatorda, yangi ish o‘rinlarini tashkil qilishga, aholi bandligini taʼminlashga ijobiy taʼsir ko‘rsatmoqda.

Ayni kunlarda quruvchilarimiz kombinatning Investitsiya dasturi ko‘rsatkichlarining bajarilishini taʼminlash bo‘yicha ishlarni jadal surʼatlarda davom ettirmoqda. Xususan, “Pistali” konida oltin tarkibli maʼdanlarni qazib olish va qayta ishlash majmuasini qurish (6-GMZ) loyihasi doirasida keng ko‘lamli bunyodkorlik ishlari olib borilayapti. Loyihani amalga oshirish natijasida yiliga 4 million tonna tarkibida oltin bo‘lgan maʼdan qayta ishlanadi va 2100 ta ish o‘rni yaratiladi. Obyektlarda qurilish-montaj ishlari to‘lig‘icha Zarafshon qurilish boshqarmasi tomonidan olib borilmoqda. Ishlar asosan qayta ishlash majmuasi, infratuzilma va boshqa yordamchi obyektlarni qurish bo‘yicha jadal surʼatlarda davom etayapti. Obyektlar qurilishga boshqarmaning 366 nafar ishchi-xodimi va 76 dona maxsus qurilish texnikalari jalb qilingan.

Shuningdek “Balpantov” va “Tomdibuloq” konlari negizida qazib olish karyerini ochish, “Turbay” konlarini o‘zlashtirish uchun qazib olish va qayta ishlash quvvatlarini kengaytirish, Muruntov konini o‘zlashtirish (V navbati), “2-gidrometallurgiya zavodi chiqindi omborini kengaytirish va qayta tiklash” hamda “Yo‘l – transport va muhandislik infratuzilmalarini qurish” loyihalari doirasida ham qurilish-montaj ishlari yuqori surʼatlarda olib borilayapti.

Ushbu qurilish-bunyodkorlik ishlarida kombinatimizning 3,5 ming nafarga yaqin mohir, tajribali quruvchilari ishtirok etayotganliklari va ularning munosib hissasi borligini faxr bilan eʼtirof etishimiz kerak.

Bir so‘z bilan aytganda, reja va vazifa – aniq, maqsad va marra – ulkan. Joriy yilda mashaqqatlarga qaramasdan, albatta, yuksak ishonchni fidokorona mehnatimiz bilan oqlaymiz.

Respublikamizda avgust oyining ikkinchi yakshanbasi quruvchilar kasb bayrami sifatida keng nishonlanadi. Fursatdan foydalanib, kombinatda mehnat qilayotgan quruvchilarni kasb bayrami bilan chin qalbimdan tabriklayman.

Mirzaboy ALQAROV,

“NKMK”AJ Kapital qurilish boshqarmasi boshlig‘i.