• Yaratildi: 06.12.2022
• Yangilandi: 07.12.2022
• O'qildi: 3054

Kelajakka mustahkam zamin

Navoiy kon-metallurgiya kombinatida, qaysi kasbda bo‘lmasin, mehnat qilayotgan insonlar borki, dunyoga mashhur korxonada ro‘y berayotgan o‘zgarishlar, zamonaviy ishlab chiqarish obyektlari qurib bitkazilib, foydalanishga topshirilayotganligi bois yangi ish o‘rinlari ochilayotganligi, ijtimoiy muammolar hal etilayotganligidan ko‘ngli tog‘ qadar yuksalib, ertangi kunga ishonchi oshayapti.

Yurt rahbari tomonidan ilgari surilayotgan va amalga oshirilayotgan iqtisodiy islohotlar ham aslida inson va uning manfaatlari, odamlarni hayotidan rozi qilishga yo‘naltirilganligi bilan ahamiyatlidir. Ana shunday xalqparvarlik siyosatining amaliy ifodasini “Navoiy kon-metallurgiya kombinati” aksiyadorlik jamiyati misolida yaqqol ko‘rish mumkin. Kombinatni 2026-yilgacha rivojlantirish va qimmatbaho metallar ishlab chiqarishni oshirish dasturi doirasida istiqbolli investitsiyaviy loyihalar ro‘yobga chiqarilmoqda.

Bugun Zarafshon sanoat hududi ulkan qurilish maydonini eslatadi. Bu yerda yangi korxonalar bunyod etilmoqda, amaldagilari modernizatsiya qilinib, zamonaviy texnika va texnologiyalar bilan jihozlantirilmoqda. Ayniqsa, temir yo‘l tizimida amalga oshirilayotgan ishlar diqqatga sazovordir. Temir yo‘l transporti mamlakat iqtisodiyotining qon tomiriga qiyoslanishi bejizga emas. Temir yo‘l transportining kombinat iqtisodiyotida tutgan o‘rnini ifodalovchi bir faktni keltirmoqchiman. Ayni paytda ulkan korxonada 60 million tonnadan ortiqroq turli yuklar temir yo‘l transporti yordamida tashib berilmoqda. Bu ishlarning katta qismi Markaziy kon boshqarmasi Temir yo‘l transporti boshqarmasi hissasiga to‘g‘ri kelyapti. Mahsulot ishlab chiqarishni ko‘paytirish maqsadida kombinatda yangi temir yo‘llar qurish, mavjud liniyalarni rekonstruksiya qilish, yuk hamda yo‘lovchi tashish transportini modernizatsiyalashga alohida eʼtibor qaratilmoqda.

O‘tgan yili 5-gidrometallurgiya zavodi foydalanishga topshirilgach, korxonani uzluksiz va bir maromda maʼdan bilan taʼminlash vazifasi kun tartibiga qo‘yildi. Zavodga maʼdan yangi o‘zlashtirilgan “Turbay” konidan tashib keltirilishi mo‘ljallangan bo‘lib, qo‘shimcha temir yo‘l qurilishi talab etilardi. Buning uchun kombinat rahbariyati va soha mutaxassislari tomonidan 2-gidrometallurgiya zavodidan, Qizilquduq, Uchquduq-2, Zavod stansiyalaridan “Turbay” koniga temir yo‘l tortib borish nazarda tutilgan to‘rtta variant atroflicha o‘rganib chiqildi. Iqtisodiy samaradorlikka erishish nuqtai-nazaridan “Turbay - Zavod stansiyasi - 5-GMZ” temir yo‘lini qurish maqsadga muvofiq degan xulosaga kelindi. Shimoliy kon boshqarmasining “Dovgiztov” konidan 3-gidrometallurgiya zavodiga jo‘natilayotgan yukli vagonlarning ortga bo‘sh holda qaytishining oldi olinishi shu variant tanlanishiga asos bo‘ldi. Ochiqroq aytganda, “Dovgiztov” konidan maʼdanni 3-GMZga tashib borgan vagonlarga qaytishda “Turbay” konidan qazib chiqarilgan maʼdan yuklanadi va 5-gidrometallurgiya zavodiga tashib keltiriladi.

Hozirgi kunda “NKMK” aksiyadorlik jamiyatining investitsion loyihalari doirasida uzunligi 52 kilometrdan ziyodroq bo‘lgan “Turbay – Zavod stansiyasi” temir yo‘l shaxobchasi qurilishi jadal surʼatlarda olib borilmoqda. Yaqinda bu yerda amalga oshirilayotgan ishlar bilan tanishish maqsadida temir yo‘l qurilish maydonida bo‘ldik. Safarimizda bizga soha xodimlari – “Navoiy kon-metallurgiya kombinati” AJ temir yo‘l bo‘limining yetakchi muhandisi Husniddin Sharipov va MKB Temir yo‘l transporti boshqarmasi bosh muhandisi Sulton Mansurovlar hamrohlik qildilar.

5-gidrometallurgiya zavodiga yiliga 2 million tonna maʼdan tashish va 50 ga yaqin yangi ish o‘rinlari yaratish imkonini beradigan mazkur obyekt qurilishida tuproq to‘shamasi ishlarini Zarafshon qurilish boshqarmasi, temir yo‘l yotqizish ishlarini Temir yo‘l transporti boshqarmasi jamoalari amalga oshirishyapti. Muhim loyihani kelgusi yilning birinchi choragida tugallash rejalashtirilgan. Temir yo‘l shaxobchasi qurilishi joriy yilning avgust oyida boshlangan edi. Hozirgacha Zarafshon qurilish boshqarmasi “Zarafshon” qurilish-montaj boshqarmasining Asad Saidov boshchilik qilayotgan 3-qurilish uchastkasi bunyodkorlari obyektda qariyb 790 ming kub metr tuproq ishlarini bajardilar. Qurilish ishlarida prorablar Elyor Yusupov, Azim Saidov, usta Mirjalol Berdiqulov, yo‘lsoz ishchilar G‘ofur Komilov, Shuhrat Qodirov, Jasur Bozorov, montajchi Ro‘ziqul G‘aybullayev, mexanizatorlar Saʼdullo Ochilov, Hayot Bo‘riyev, Davirxon Qidirbayev, avtoag‘dargich haydovchilari Sunnat Toshev, Qiyom Aslonov, Bahriddin Ismatovlar jonbozlik ko‘rsatishyapti.

Temir yo‘l transporti boshqarmasining Sodiq Islomov boshchiligidagi Yo‘l xizmati ishchi-xizmatchilari, muhandis-texnik xodimlarining ob-havo murakkabliklariga qaramasdan bu obyekt qurilishida amalga oshirayotgan ishlari har qancha maqtovga arzigulik bo‘lyapti. Rels va shpal panjaralarini yig‘ish va yotqizish uchastkasi boshlig‘i Jasur Shodiyev, yo‘l ustalari Maʼruf Samadov, Jamshid Murtazoyev va 62 nafar yo‘l soz­lovchilarning saʼy-harakatlari bilan 9 kilometrdan ortiqroq masofada temir yo‘l izlari yotqizildi. Muhimi, bu ishlar investitsiya loyihasiga muvofiq xarid qilingan temir yo‘l panjaralarini yotqizish krani yordamida bajarilyapti. Shuningdek, bugungacha 20 dona dumpkar vagonlar ham xarid qilinib, foydalanishga topshirildi.

Xulosa o‘rnida aytish kerakki, “Turbay – Zavod stansiyasi” temir yo‘l liniyasining qurilishi bilan qimmatbaho metal ishlab chiqarishni ko‘paytirishda mustahkam poydevor yaratiladi.

“NKMK” AJ Matbuot xizmati.