• Yaratildi: 19.03.2023
• Yangilandi: 19.03.2023
• O'qildi: 2518

Navro‘z umumxalq bayrami keng nishonlandi

19-mart kuni Navoiy shahridagi “So‘g‘diyona” o‘yingohida “Navoiy kon-metallurgiya kombinati” aksiyadorlik jamiyati, “Navoiyran” davlat korxonasi, “NKMK jamg‘armasi” davlat muassasasi ishchi-xodimlari va ularning oila aʼzolari uchun Navro‘z umumxalq bayramiga bag‘ishlangan “Navro‘z sayli” o‘tkazildi.

Bayram tadbiri erta tongdan karnay-surnay va musiqa sadolari ostida barchani “So‘g‘diyona” o‘yingohi maydoniga chorladi.

Uchta korxona va ularning bo‘linmalari tomonidan tashkil etilgan rang-barang anʼanaviy ko‘rgazmalar namoyishi, ayyom taomlari bezangan dasturxonlar, aviashou va varrak uchirish musobaqasi, sport musobaqalari, milliy sanʼat va hunarmandchilikning namunalari, “Farhod” madaniyat saroyi ijodiy jamoalari chiqishlari, xalq o‘yinlari barcha ishtirokchilar, turli millat va elat vakillari, mehmonlarga bayramona zavq bag‘ishladi.

“Sug‘diyona” o‘yingohining maydoni aviashou va varrak uchirish ishtiyoqmandlariga to‘ldi. Bu manzilga kelgan ota-onalar, mehmonlar, maktab o‘quvchilari, yoshlar, bolajonlar o‘ziga xos bayram shousidan cheksiz bahramand bo‘ldilar. 

"Farhod” madaniyat saroyiga qarashli Bolalar ijodiyoti markazi tarbiyalanuvchilari tomonidan tayyorlangan qiziqarli aviashou namoyish etildi.

“NKMK” AJ Matbuot xizmati.