• Yaratildi: 10.05.2023
• Yangilandi: 10.05.2023
• O'qildi: 2415

Ishni to‘g‘ri tashkil etishning amaliy samarasi

Navoiy kon-metallurgiya kombinatida transport sohasi muhim ahamiyat kasb etadi. Shimoliy kon boshqarmasi Avtomobil transporti boshqarmasi kombinat tarkibidagi yirik va zamonaviy texnologik avtotransport korxonalaridan biri hisoblanadi. 

Bugungi kunda boshqarma 2 ta uchastka va 4 ta avtokolonnadan iborat bo‘lib, korxonada 1,5 ming nafarga yaqin ishchi-xodim mehnat qilmoqda. Boshqarmaning asosiy vazifasi “Sharqiy”, “Dovgistov” konlarida qazib olinayotgan oltin tarkibli maʼdanni 3-gidrometallurgiya zavodiga yetkazib berishdan iborat. Bunda 200 dan ortiq konchilik texnikalari va transport vositalaridan keng foydalanilmoqda.

Avtomobil transporti boshqarmasining katta yutuqlaridan biri uning faoliyati to‘la avtomatlashtirilganidir. Butun ish jarayoni, maʼdan tashish ko‘rsatkichlari, texnikalar harakati, transportlar yoqilg‘i bakidagi yoqilg‘i miqdori raqamlashtirilgan holda kecha-yu kunduz kuzatib boriladi. Shuningdek, ish vaqtidan unumli foydalanish, texnikalarda kuzatilgan kamchiliklarni tezkor bartaraf etish maqsadida ko‘chma texnik xizmat ko‘rsatish yo‘lga qo‘yilgani ishni bir maromda olib borish imkonini bermoqda.

Boshqarmada 2018-yilda kon massasini tashish 43,8 mln kubometrni tashkil etgan bo‘lsa, 2022-yilga kelib bu ko‘rsatkich 70,5 mln kubometrga yetkazildi, yoqilg‘i-moylash materiallarini va ehtiyot qismlarini tejash hisobidan tannarxni kamaytirish bo‘yicha 2018-yilda 14,7 mlrd so‘mlik samaradorlikka erishilgan bo‘lsa, 2022-yilda bu ko‘rsatkich 66,2 mlrd so‘mni tashkil etdi. Joriy yilda kon massasi tashilishini 73 mln kubometrga yetkazish mo‘ljallangan. 

Ishni to‘g‘ri tashkil etish, texnikalardan oqilona foydalanish, ish jarayonini raqamlashtirish, innovatsiya va ratsionalizatorlik ishlanmalarini faoliyatga keng joriy qilish korxona rivojlanish yo‘lidan borayotganidan dalolatdir.

“NKMK” AJ Matbuot xizmati.