• Yaratildi: 04.03.2020
• Yangilandi: 21.12.2020
• O'qildi: 1016

Kon-metallurgiya tarixiga oid kitob taqdimoti bo‘lib o‘tdi

Joriy yilning 3 mart kuni Navoiy davlat konchilik institutida “O‘zbekistonda kon-metallurgiya tarixi” kitobi taqdimoti marosimi bo‘lib o‘tdi. Tadbirda kitob mualliflari, professor-o‘qituvchilar, Navoiy kon-metallurgiya kombinati mutaxassislari, talabalar va ommaviy axborot vositalari vakillari ishtirok etdilar.

 “O‘zbekistonda kon-metallurgiya tarixi” kitobi sohaning tajribali mutaxassisi, texnika fanlari doktori, professor Q.Sanaqulov hamda tarix fanlari nomzodlari X.Raupov va O.Xaitovalar tomonidan yozildi. Kitob sakkiz bobdan iborat bo‘lib, unda kon-metallurgiya sohasining eng qadimgi davrdan to bugungi kungacha bo‘lgan tadrijiy rivojlanish yo‘li keng yoritilgan. Soha tarixini yoritishda arxeologiya, sharqshunoslik, manbashunoslik, geologiya va fan tarixiga oid tadqiqotlardan keng foydalanilgan.

Tadbirda NDKI dotsenti, geologiya-minerologiya fanlari nomzodi A.To‘rayev, “Metallurgiya” kafedrasi katta o‘qituvchisi A.Aripov, “Konchilar hayoti” gazetasi muharriri N.Sadriddinov va talaba-yoshlar so‘zga chiqib, kitobning ahamiyati, unda respublikadagi kon-metallurgiya sanoatining yirik korxonalari, ularning tashkil etilishi va bugungi kundagi faoliyatiga keng o‘rin ajratilganligini e’tirof etdilar. Navoiy kon-metallurgiya kombinati, Olmaliq kon-metallurgiya kombinati, O‘zbekiston metallurgiya kombinatlari faoliyati, jumladan “Muruntov”, “Qalmoqqir” konlari tarixi va ular bilan bog‘liq boshqa ko‘plab ma’lumotlar berilganligi alohida ta’kidlandi.

– Bugungi tadbir taassurotlarga boy bo‘ldi. Biz yangi kitobdan ko‘plab ma’lumotlar oldik. Bu kitob yoshlarni O‘zbekiston kon-metallurgiya tarixini o‘rganishga, izlanishga, o‘qishga, eng muhimi kitob bilan oshno bo‘lishga undaydi, – deydi Navoiy davlat konchilik instituti talabasi X.To‘xtayev.

Tadbirda yosh olimlar va talabalarning savollariga mualliflar tomonidan javoblar qaytarildi.

NKMK Matbuot markazi.