• Yaratildi: 26.10.2020
• Yangilandi: 24.12.2020
• O'qildi: 1023

Tariximsan, taqdirimsan, kelajagimsan, ona tilim!

Navoiy shahridagi “Farhod” madaniyat saroyida mamlakatimizda o‘zbek tilini yanada rivojlantirish va til siyosatini takomillashtirish masalalariga bag‘ishlangan “Tariximsan, taqdirimsan, kelajagimsan, ona tilim!” mavzusida madaniy-maʼrifiy tadbir bo‘lib o‘tdi.

Navoiy kon-metallurgiya kombinati bo‘linmalari korxonalari xodimlari ishtirokida onlayn muloqot tarzda o‘tkazilgan tadbirda Maʼnaviyat va maʼrifat markazi viloyat bo‘limi xodimlari, xalq taʼlimi boshqarmasi, Navoiy davlat konchilik instituti va Navoiy davlat pedagogika instituti professor-o‘qituvchilari, talabalar ishtirok etishdi. Unda o‘zbek tilining xalqimiz ijtimoiy hayotida va xalqaro miqyosdagi obro‘-eʼtiborini tubdan oshirish, yoshlarni vatanparvarlik, milliy anʼana va qadriyatlarga sadoqat ruhida tarbiyalash hamda o‘zbek tili va til siyosatini rivojlantirishning strategik maqsadlari haqida so‘z yuritildi. Madaniyat saroyining sanʼat ustalari tomonidan kuy-qo‘shiqlar ijro etildi.

– Hozirda dunyoda o‘zbek tilida so‘zlashuvchilar soni qariyb 50 million kishini, turli hududlarda tashkil etilgan 140 ga yaqin milliy madaniyat markazlarining faoliyat olib borishi, xorijiy davlatlardagi 65 ta oliy o‘quv yurtida o‘zbek tili va adabiyoti o‘rganilayotganligini hisobga olsak, tilimiz rivojlanishda ekanligini anglaymiz, – deydi NKMK bosh direktorining maʼnaviy-maʼrifiy ishlar samaradorligini oshirish, davlat tili to‘g‘risidagi qonun hujjatlariga rioya etilishini taʼminlash masalalari bo‘yicha maslahatchisi Xolmamat Raupov.

Tadbirda NKMK korxonalarida o‘zbek tili nufuzini yana-da oshirish, ish yuritish hujjatlarining o‘zbek tilida olib borilishida yuzaga kelayotgan muammolar va ularni hal etish choralari xususida ham fikr-mulohazalar bildirildi.

NKMK Matbuot markazi.