• Yaratildi: 25.01.2021
• Yangilandi: 25.01.2021
• O'qildi: 2015

Navoiy dahosiga ehtirom

Navoiy kon-metallurgiya kombinati tashabbusi bilan buyuk mutafakkir, shoir va davlat arbobi Alisher Navoiy tavalludining 580 yilligiga bag‘ishlab Navoiy shahridagi “Farhod” madaniyat saroyida kombinat ishchi-xizmatchilari, yoshlar, Navoiy davlat konchilik instituti va akademik litsey o‘qituvchi-talabalari, jamoatchilik vakillari ishtirokida maʼnaviy-maʼrifiy tadbir bo‘lib o‘tdi.

Navoiyxonlik kechasida taniqli olimlar - Alisher Navoiy nomidagi Toshkent davlat o‘zbek tili va adabiyoti universiteti kafedra mudiri, filologiya fanlari doktori, professor Nurboy Jabborov, Toshkent davlat sharqshunoslik universiteti dotsenti, filologiya fanlari bo‘yicha falsafa doktori Olim Davlatov, Navoiy davlat pedagogika instituti dotsenti, filologiya fanlari nomzodi Tohir Xo‘jayevlar alloma hayoti va ijodiga bag‘ishlangan maʼruzalari bilan ishtirok etishdi.

- Kombinat bo‘linmalarida uch kun davom etgan alloma yubileyi va ijodiga bag‘ishlangan tadbirlar har jihatdan yuqori saviyada, keng jamoatchilikning faol ishtirokida, ko‘tarinki ruhda bo‘lib o‘tdi. Men ham ushbu tadbirlarning tashkiliy jarayonlarida ishtirok etganimdan faxrlanaman. Ayniqsa, yirik korxona Navoiy dahosiga bo‘lgan yuksak ehtirom ramzi sifatida tadbirlarni birinchilardan bo‘lib boshlab bergani har qanday maqtovga arzigulikdir. “Farhod” madaniyat saroyida bo‘lib o‘tgan maʼnaviy tadbir, ilmiy va falsafiy talqindagi ustozlarimiz maʼruzalari shaxsan mening, qadrli hamkasblarim, o‘quvchi-talabalar va barcha ishtirokchilar qalbida buyuk allomamizning ibratli hayot yo‘li, yorqin ijodi haqidagi taassurotlarimizni yana-da boyitdi, - deydi NDKI akademik litseyi ona tili va adabiyoti fani o‘qituvchisi Raʼno Payzullayeva.

“Farhod” madaniyat saroyi badiiy jamoalari, Navoiy davlat konchilik instituti va akademik litsey o‘qituvchi-talabalari tomonidan ijro etilgan kuy-qo‘shiqlar va turli sahna ko‘rinishlari tadbir qatnashchilariga yana-da zavq ulashdi.

NKMK Matbuot markazi.