• Yaratildi: 08.02.2021
• Yangilandi: 09.02.2021
• O'qildi: 1886

Shoirga ehtirom namunasi

Buyuk shoir va mutafakkir, atoqli davlat va jamoat arbobi Alisher Navoiyning boy va serqirra ijodiy merosi, ona tilimizda beqiyos so‘z boyligi va cheksiz ifoda bilan talqin etilgan asarlari biz avlodlar uchun ulkan maʼnaviy xazinadir. O‘zligimizni anglash, farzandlarimiz kamolotida allomamiz bebaho asarlari jozibasi, tarbiyaviy ahamiyati har tomonlama beqiyos.

O‘zbekiston Respublikasi Prezidenti Shavkat Mirziyoyevning 2020 yil 19 oktyabrda qabul qilingan “Buyuk shoir va mutafakkir Alisher Navoiy tavalludining 580 yilligini keng nishonlash to‘g‘risida”gi qarori ijrosi yuzasidan Navoiy kon-metallurgiya kombinatida ham targ‘ibot, maʼnaviy-maʼrifiy tadbirlar boshlab yuborildi. 6 fevral kuni kombinat maʼmuriyati va kasaba uyushmasi Kengashi tashabbusi bilan “Farhod” madaniyat saroyida navbatdagi maʼrifiy-madaniy kecha tashkil etildi. Unda korxona ishchi-xizmatchilari, yoshlar, xotin-qizlar, ziyolilar va jamoatchilik vakillari ishtirok etishdi.

Kirish foyesida kutubxona xodimlari tomonidan mutafakkir g‘azallaridan namunalar o‘qilgani, mo‘yqalam sohiblari asarlarida Navoiy siymosi va asarlaridan namunalar yorqin ranglarda ifoda etilgani, o‘zbek va jahon adabiyoti namunalarini mujassam etgan kitob ko‘rgazmalari, mumtoz qo‘shiqlar va mavzuga mos sahna ko‘rinishlari barchada o‘zgacha taassurot qoldirdi. Bolalar ijodiyot markazi isteʼdodlari zardo‘zlik, kuydirib chizish, gildan yasash sanʼatida yaratgan yuksak mahorat bilan bobomiz siymosi talqini yuqori baholandi.

Kechada bobomiz g‘azallaridan ijro etilgan nasriy namunalar, mumtoz kuy-qo‘shiqlar, badiiy jamoalar chiqishlari, turli sahna ko‘rinishlari, boshqa rang-barang dasturlari ishtirokchilarga zavq bag‘ishladi.

Tadbirda Navoiy davlat konchilik instituti talabalari, Navoiy shahridagi qator maktablarning jajji o‘quvchilari o‘zlarining yorqin isteʼdodlari bilan katta sahnaga chiqqan bolajonlar bobomiz g‘azallarini ifodali o‘qish va qo‘shiqlar aytishi bilan muxlislar olqishiga sazovor bo‘lishdi. “Mard o‘g‘lon” davlat mukofoti sovrindori Ibrohimjon G‘afforovning chiqishi, 1-GMZ bog‘boni Bahromjon Hasanov tomonidan ifodali aytilgan g‘azal, NMZ katta ustasi Alijon Mardonov tomonidan ijro etilgan “Gulzorim” qo‘shig‘i barchada o‘zgacha taassurot qoldirdi.

– Navoiy bobomiz asarlaridagi milliy va umuminsoniy g‘oyalar yoshlarimizni tarbiyalashda muhim o‘rin tutadi. Betakror ijod namunalari insoniyatni ezgulikka chorlaydi. Bunday tadbirlar orqali Navoiy asarlaridagi g‘oyalarni keng targ‘ib etish ijobiy samara beradi, deb o‘ylayman, – deydi NKMK Kasaba uyushmasi Kengashi raisi o‘rinbosari M.Nurimova.

Alloma hayoti va ijodi, eng muhimi, Hazrat Navoiy qalbini anglash har birimiz uchun ham farz, ham qarz. Bu orqali har bir yurtdoshimiz, kitobxon tasavvufiy-falsafiy sirlardan voqif bo‘lishi, odamiylik saboqlarini olishi shubhasiz.

NKMK Matbuot markazi.