• Yaratildi: 05.03.2021
• Yangilandi: 09.03.2021
• O'qildi: 1979

Eʼtibor va ehtirom namunasi

Bahor va go‘zallik ayyomi bo‘lgan 8 mart – Xalqaro xotin-qizlar kuni bayrami Navoiy kon-metallurgiya kombinati va uning bo‘linmalarida keng nishonlanmoqda. Tantanali tadbirlarda kombinat xotin-qizlarining mehnati, korxona rivojiga qo‘shayotgan hissasi eʼtirof etilib, soha ilg‘orlari munosib rag‘batlantirilmoqda.

5 mart kuni “Farhod” madaniyat saroyida kombinatda mehnat qilayotgan xotin-qizlar vakillari uchun qutlug‘ ayyomga bag‘ishlangan bayram tadbiri bo‘lib o‘tdi. Tantanada Navoiy kon-metallurgiya kombinati bosh direktori Q.Sanaqulov kombinat xotin-qizlarini bayram munosabati bilan samimiy tabrikladi.

Tabrikda kombinatda bugungi kunda 16 ming nafarga yaqin xotin-qizlar, ular orasida 550 nafarga yaqin rahbar ayollar, 33 nafar davlatimizning yuksak mukofotlari sovrindorlari ulkan korxona ravnaqi yo‘lida astoydil xizmat qilib kelayotgani mamnuniyat bilan taʼkidlandi. O‘zbekiston Respublikasi Prezidentining 2021 yil 4 martda qabul qilingan “8 mart – Xalqaro xotin-qizlar kuni munosabati bilan mukofotlash to‘g‘risida”gi Farmoniga muvofiq, “Navoiy mashinasozlik zavodi” ishlab chiqarish birlashmasining uchastka kran mashinisti Dildor Tilabova “Mehnat shuhrati” ordeni bilan mukofotlanganligi alohida eʼtirof etildi.

Tadbirda bir guruh soha ilg‘orlari “NKMK faxriysi” unvoni va faxriy yorliqlar bilan taqdirlandilar.

“Farhod” madaniyati saroyi badiiy jamoalari va xonandalari tomonidan tuhfa etilgan musiqiy dastur tadbir ishtirokchilariga bayramona kayfiyat ulashdi.

NKMK Matbuot markazi.