• Yaratildi: 05.08.2021
• Yangilandi: 05.08.2021
• O'qildi: 2024

Hamkasblarimiz munosib taqdirlandi

4 avgust kuni Navoiy viloyati hokimligida Xalqlar do‘stligi kuni munosabati bilan O‘zbekiston Respublikasi Prezidentining Farmoniga asosan yuksak davlat mukofotlari, shuningdek, “Xalqlar do‘stligi” ko‘krak nishonlari bilan taqdirlangan bir guruh navoiyliklarga mukofotlar tantanali ravishda topshirildi.

Yurtimizda so‘nggi yillarda millatlararo munosabatlar, turli millat va elat vakillari o‘rtasida do‘stlik va hamjihatlikni mustahkamlash muhim ahamiyat kasb etmoqda. Davlatimiz rahbari tashabbusi bilan 30 iyul mamlakatimizda Xalqlar do‘stligi kuni, deb belgilangani buning yorqin ifodasidir. Bu, yangi O‘zbekistonda istiqomat qilib kelayotgan turli millatlar o‘rtasida o‘zaro hurmat, do‘stlik, hamjihatlikka asoslangan munosabatlar, do‘stlik rishtalarini yana-da mustahkamlashga xizmat qilmoqda.

Joriy yilda ushbu sana munosabati bilan samarali mehnati, turli millat va elat vakillari o‘rtasida do‘stlik va hamjihatlikni mustahkamlashga qo‘shib kelayotgan munosib hissasi uchun bir guruh yurtdoshlarimiz mukofotlandilar. Ular orasida “Zarafshon” qurilish-montaj boshqarmasi boshlig‘i Vaxtang Kapanadze hamda NKMK kasaba uyushmasi Kengashi raisi Isroil Rahmatovlarning ham borligi quvonarlidir.

Kuni kecha viloyat hokimligida mukofotlarni topshirish marosimi bo‘lib o‘tdi. Jumladan, “Zarafshon” qurilish-montaj boshqarmasi boshlig‘i V.Kapanadzega “Mehnat shuhrati” ordeni va NKMK kasaba uyushmasi Kengashi raisi I.Rahmatovga “Xalqlar do‘stligi” ko‘krak nishoni tantanali ravishda topshirildi.

Shundan so‘ng Navoiy kon-metallurgiya kombinati boshqarmasida ham hamkasblarimiz xizmatlari eʼtirof etildi.

NKMK Matbuot markazi.